وادي النسيان 3 شاهنده
نظرت إليه خالتها تدرك جيدا من تتحدث عنه جورية لتقول بصوت رغما عنها إمتلأ بالحزن:
حتى لو واحشنى..مبقاش ينفع خلاص ياجورى..جدك قفلها فى وشى..عزيز محسش بية عمر بحاله ياجورى..أنا إتعذبت كتير وأنا جنبه..كان عندى أمل يحس بية ولما فقدت الأمل وخلاص السنين دى كلها عدت..قلت أهو كفاية أكون جنبه..يونسنى وأونسه..لكن فى الآخر يحولنى لحالة إنسانية بيعطف عليها..ويقولهالى فى وشى كدة..آسفة..ساعتها أدوس على قلبى أدام كرامتى..
ربتت جورية على يدها قائلة فى عطف:
بس إنتى عارفة إن الكلام ده مش صحيح..وعارفة إنه قاله فى لحظة غضب..إنتى متأكدة زي ما أنا متأكدة إن جدى بيعزك أوى ..أدى بالظبط ويمكن أكتر بس هو كدة على أد ما قلبه طيب بس فى غضبه بيخبط فى الكلام ومش بعيد يكون دلوقتى ندمان.
زفرت جليلة قائلة:
ندمان ولا مش ندمان..قلتلك ياجورى مبقاش ينفع خلاص..اللى قاله جدك مش ممكن هقدر أنساه ولا….
قاطعها رنين هاتف جورى لتنظر جورى إلى شاشته وتقول بعيون متسعة:
ده رقم جدى.
ظهر الحزن فى عيون جليلة قائلة:
ردى عليه ..ده مهما كان جدك..وأنا هقوم أسقى الزرع.
قالت جورية:
إستنى بس…
قاطعتها جليلة قائلة بحزم:
قلت هسقى الزرع ياجورى.
لتغادر بينما هزت جورية كتفيها بقلة حيلة قبل أن ترد على الهاتف..وما إن إستمعت إلى محدثها..حتى صرخت بجزع قائلة:
إنت بتقول إيه؟
********************
إقترب خالد من لين التى تجلس فى الكافيتريا ..شاردة ..أمامها فنجال من القهوة الباردة..تتذكر آخر موقف كان بينها وبين مؤيد..وكلماته عن القهوة..لتبتسم فى مرارة..ثم تزيح الفنجال جانبا..لتنتفض على صوت أخيها وهو يقول بحنان:
أنا قلت برده إنك مش هتشربيها.
نظرت إلى خالد الذى جلس أمامها قائلا:
طلبتلك فنجال قهوة تانى معايا.
أومأت برأسها دون أن تنطق بكلمة..ليستطرد قائلا بحنان:
مش آن الأوان يالين..تفتحيلى قلبك وتقوليلى اللى جواكى..مش آن الأوان تعرفينى إيه اللى بيحصل فى حياتك بجد..مش الكلام اللى بتحاولى تقنعينى بيه من يوم ما رجعت..عشان بجد أحلى ميزة فى إخواتى..إنهم مبيعرفوش يكدبوا.
نظرت إلى عيون خالد الحانية تكاد أن تخبره بمكنون قلبها..ولكن ماذا تقول؟وكل ما ستقوله سيجعل أخاها غاضبا منها لإخفائها الحقيقة عنه كل تلك السنوات..بل وماذا سيكون رد فعله أيضا عندما يعلم أن من فرق بينها وبين مؤيد هي زوجته شاهيناز؟بل ماذا سيفعل عندما يعلم بحقيقتها البشعة؟هي لا تستطيع المخاطرة بإخباره الآن..ربما عند عودتهما إلى القاهرة..وقتها..ستخبره بكل الحقيقة وتخرج مكنون صدرها الذى يمزق قلبها تمزيقا..
