وادي النسيان 3 شاهنده
قال الحاج ممدوح:
والله اللى تشوفوه ياإبنى ..أنا معنديش أي مانع..المهم رأي أهل العروسة.
قال فوزى :
أنا موافق على اللى تقولوه..
لتنطلق زغرودة من والدتها..التى ظلت صامتة طوال الوقت..كانت تلك هي كل مشاركتها الوحيدة فى موضوع زواج إبنتها..بينما إحتضن مؤيد نبيل الذى همس فى أذنه قائلا:
تسلم ياكبير.
ليبتعد عنه مؤيد وهو يغمز له..ليبتسم نبيل ثم ينظر إلى عروسه التى نظرت إليه بدورها..تدرك أن الله قد كافأها على صبرها بهذا الزوج الرائع الذى تثق بأنه سيكون لها كل ما حرمت منه.
********************
إقتربت جورية من سرير جدها الذى ينام عليه..جلست على هذا الكرسي بجواره تتأمله بشوق..مدت يدها لتمسك يده ولكنها تراجعت خشية أن تقلقه لتقول بهمس وقد غشيت عيناها بالدموع:
كدة ياجدى..كدة تبقى تعبان بالشكل ده ومتكلمنيش..حتى لو زعلان منى..كنت ناديلى ..وزعقلى بعد ماتبقى كويس.. بس متحرمنيش منك بالشكل ده ومتحرمنيش أكون واقفة جنبك وإنت تعبان..إنت متعرفش إنت بالنسبة لى إيه..إنت مش جدى وبس..إنت بابايا وأخويا وعيلتى كلها..أنا من غيرك ولا حاجة..موحشتكش؟طب إنت وحشتنى..وحشتنى أوى لدرجة إنك كنت بتجيلى فى أحلامى..
لتمد يدها تمسك بيده تميل عليها تقبلها بدموعها ثم ترفع عيونها إليه تقول:
كنت بتمسك إيدى وتمسح دموعى وتقولى….
صمتت وهي تسمعه يقول بصوت ضعيف:
أنا جنبك ياجورى متخافيش.
نظرت إلى فمه تدرك أنها لا تحلم وأن هذه هي كلمات جدها..لتنظر إلى عينيه فتجده ينظر إليها بحنان قائلا بعيون دامعة:
وحشتينى ياجورى..وحشتينى أوى.
شعت السعادة فى عيون جورية وهي تندفع إلى حضنه قائلة:
انت كمان وحشتنى ياجدى..وحشتنى أوى.
ضمها بحنان يريت على ظهرها وهو يقول:
متسيبينيش تانى ياجورى..أنا كمان من غيرك ولا حاجة.
إبتعدت عنه جورية تنظر إلى عينيه قائلة بثقة وعزم:
مستحيل هبعد عنك تانى..إنت روحى ياجدى..إنت متعرفش أنا بحبك أد إيه؟
إبتسم عزيز قائلا:
أنا كمان بحبك ياجورى..ربنا يخليكى لية ياحبيبتى.
إبتسمت جورية قائلة :
ويخليك لينا ياجدى.
نظرت إليه بإبتسامة ملأت وجهها..لتجد جدها مترددا ..لتتسع إبتسامتها وهي تقول :
واقفة برة على فكرة .
نظر إليها قبل أن يقول بإضطراب:
هي مين دى؟
قالت جورية :
اللى عنيك وصوتك بيدوروا عليها..خالتى جليلة ياجدى.
