وادي النسيان 3 شاهنده
نظر خالد إلى عيون فراس ليومئ له فراس برأسه مؤكدا وهو يقول مستطردا:
لو ضعفنا هتحس بضعفنا وساعتها هتضعف هي كمان..ليلة محتاجانا جنبها نقويها على مرضها ونعديها من محنتها..وبعدين فيه حاجة إسمها علاج..ليلة فى المرحلة الأولى من المرض وبإذن الله بعد العلاج تبقى كويسة..ولو فيه علاج برة هنسفرها..ولآخر نفس فينا مش هنستسلم.
كانت كلمات فراس داعم كبير لخالد..أخرجته من حالة الصدمة التى إعترته ومنحته القوة لينظر إلى فراس بإمتنان قائلا:
معاك حق..طول ما فية نفس مش هستسلم ..هعرضها على أكبر دكاترة جوة وبرة..وهتخرج ليلة من محنتها أقوى إن شاء الله.
قال فراس بتأكيد:
بإذن الله ياخالد ..بإذن الله.
تنهد خالد قائلا:
أنا لازم أدخلها وأقولها على الخبر ده.
قال فراس:
أنا جاي معاك.
هز خالد رأسه نفيا قائلا:
مش هينفع ..لازم أكون لوحدى معاها.
أومأ فراس برأسه متفهما..ليعقد خالد حاجبيه قائلا:
بس لازم الأول أعمل مكالمة لسمير وأبلغه بالخبر ده.
عقد فراس حاجبيه قائلا بصدمة:
سمير..سمير تانى ياخالد..إنت إمتى هتفهم إن ليلة مش ممكن تكون لحد غيرى؟..إمتى هتفهم إنى من اللحظة دى إعتبرتها مراتى ومحدش ممكن يكون جنبها فى محنتها غيرى أنا وإنت ولين وبس؟
لتقسو عيناه وهو يستطرد قائلا:
بص ياخالد..أنا مستحيل هخلى سمير ده يقرب منها أو يكلمها ولو فيها حياتى..مفهوم ياخ؟
قال خالد فى غموض:
متقلقش..لو طلع اللى بفكر فيه صح..فكل اللى بتقوله هيحصل يافراس..وده وعد منى ليك.
نظر إليه فراس عاقدا حاجبيه فى حيرة ليربت خالد على كتفه مطمئنا..ليشعر فراس بالراحة لحركته تلك…..مؤقتا.
*******************
إرتمت ليلة فى حضن أخيها ..تسيل دموعها على وجنتيها بصمت ليربت خالد على ظهرها قائلا بحنان:
عيطى ياليلة وخرجى كل اللى فى قلبك..بس أنا مش عايزك تخافى أو تقلقى..أنا هعرضك على أكبر الدكاترة برة مصر..وبإذن الله هتبقى كويسة وربنا هينجيكى من المرض ده..وإحنا كلنا معاكى..وجنبك ياحبيبتى.
قالت ليلة من وسط دموعها:
أنا مش خايفة من المرض ياخالد..ولا خايفة من الموت نفسه.
أبعدها عن محيط ذراعيه يمسك وجهها وهو يقول بلهفة إمتزجت بالحزن وهو يرى وجهها الملئ بالعبرات:
بعيد الشر عنك ياليلة.
نظرت إلى عيونه قائلة :
صدقنى ياخالد ..أنا مش خايفة على نفسى..أنا خايفة عليكم إنتوا..خايفة حياتكم من بعدى يملاها السواد والحزن..أنا مش عايزاكم تزعلوا لما أموت..عايزاكم تفتكرونى بإبتسامة..وتكونوا متأكدين إنى بقيت فى مكان أحسن.
