وادي النسيان 3 شاهنده
لتنهض..تحمل فنجال قهوتها تشربه مرة واحدة..ثم تتركه على الطاولة وتلتفت مغادرة المكان بكبرياء حمل إعجابا إلى عينيه..ليبتسم بهدوء قائلا:
مميزة..مختلفة..وتستاهلى الحب اللى حبيتهولك.
ليطرق رأسه قائلا بنبرة حزينة بعض الشئ:
بس الحب مش كل حاجة..الأهم من الحب ..الثقة..والثقة دى ضاعت مابينا خلاص يالين.
ليرفع رأسه مجددا بإتجاه طيفها المغادر وهو يقول :
ومعتقدش ممكن ترجع تانى.
********************
وقفت شاهيناز أمام باب منزل مؤيد ترن جرس الباب دون جدوى..فلا أحد يجيب..لتقول بعصبية:
روحت فين بس يامؤيد؟أنا متأخرتش أوى يعنى..
لتعقد حاجبيها مستطردة:
أوعى تكون نزلت..بجد هزعل منك..وأنا زعلى وحش.
لتمد يدها فى حقيبتها تبحث عن هاتفها..حتى وجدته ، لتتصل بمؤيد..إستمعت إلى تلك الرسالة لتقول فى حنق:
تليفونك كمان مقفول.
لتنظر إلى الهاتف قائلة بوعيد:
طب أنا هستناك فى العربية يامؤيد..وأبقى ألاقيك راجع ومعاك واحدة..ساعتها هقلب الدنيا على دماغك..وهعرفك مين هي شاهيناز حسان.
لتعيد هاتفها إلى حقيبتها وهي تتجه إلى المصعد لتستعد لقضاء ليلة طويلة فى سيارتها إنتظارا لمؤيد الذى ما إن غادرته حتى نفذ تهديده لها وذهب ليقضى الليلة مع إحداهن..فهي إن قبلت بتصرفاته تلك فى الماضى فلن تقبل بها بعد أن إعترفت له بمشاعرها وأصبح لها..قلبا وقرييا سيصبح لها بكل مافيه.
********************
قالت جورية بإبتسامة:
أنا مضطرة أمشى ياليلة.
قال خالد بلهفة:
وتمشى ليه بس؟
ليتبادل كل من ليلة وفراس النظرات..بينما قالت جورية بإرتباك:
الوقت إتأخر وبتهيألى المفروض أسيب ليلة ترتاح.. وهجيلكم بكرة المطار فى الميعاد.
قالت ليلة بإبتسامة:
أنا مرتاحة وانتوا جنبى..والطيارة أدامها ٤ ساعات..مش مستاهلة تروحى المعادى وتيجى تانى..مش هتلحقى تقعدى فى بيتك أصلا.
إبتسم خالد فى نفسه فقد قالت ليلة ما يود أن يقوله كلية..ووفرت عليه الإحراج..ليعقد حاجبيه وهو يستمع إلى كلمات جورية التالية وهي تقول:
الحقيقة أنا كنت بس عايزة أطمن على خالتى جليلة عشان سايباها لوحدها.
عقد فراس حاجبيه قائلا بصدمة:
خالة جليلة هنا فى مصر..وسايبة جدك عزيز فى الوادى..أهي دى عمرها ما حصلت ولا كنت أصدقها أبدا.
قالت جورية بإرتباك:
أيوة..أصلها..مرضيتش تسيبنى لوحدى وصممت تيجى معايا عشان تخلى بالها منى.
