وادي النسيان 3 شاهنده
إبتسم نبيل قائلا:
طول عمرى كنت شايف فيك البنى آدم ده يامؤيد..وكنت مستنى بس تشوفه فى نفسك.
إبتسم مؤيد إبتسامة باهتة مريرة وهو يقول:
للأسف شفته فعلا..بس بعد فوات الأوان..بعد ماحياتى زمان أثرت على تفكير البنى آدمة الوحيدة اللى حبيتها وخليتها تصدق بسهولة إنى مطلعتش من مستنقع الخيانة اللى كنت عايش فيه.
نظر إليه نبيل قائلا:
الكل بيغلط يامؤيد..محدش فينا معصوم من الغلط..ولازم نسامح مادام بنحب.
نظر إليه مؤيد قائلا بمرارة:
مش قادر أسامحها..غصب عنى..أنا كنت بموت من غيرها..كنت بموت وأنا حاسس إنها إتخلت عنى عشان فية نقص ومش قادر أديها الحاجة اللى إتمنيتها هي زي ما إتمنيتها أنا كمان..الأطفال..ودلوقتى بعد ما أثبتتلى إن معندهاش أي ثقة فية..مش هقدر أكمل حياتى معاها وأنا خايف فى أي لحظة إنها تتخلى عنى بسبب غلطة عملتها فى الماضى..الماضى اللى هي عارفة ومتأكدة إن مكنش لية أي ذنب فيه..ما أنا مش ذنبى إنى إتربيت مع أب كل شوية كان بيتجوز ويطلق..بيغير فى الستات زي ما بيغير فى هدومه..مش ذنبى إنه ربانى على إن الستات خاينين وبياعين وملهمش أمان..بس لما شفتها عرفت الفرق وإتجوزتها علطول..وهي عند أول إختبار فى مواجهة الماضى بتاعى..إتخلت بكل سهولة عنى..خلاص يانبيل..مبقاش بينا الأمان والثقة اللى كنت حاططهم فى علاقتى بيها.
ربت نبيل على يده قائلا:
فى يوم هتعذرها وهتسامحها..أنا واثق من كدة..قلبك بيحبها ومن جواك متأكد إنك من غيرها مش هتقدر تعيش.
يدرك مؤيد أن ما يقوله صديقه صحيح فهو بالفعل لا يشعر بالإكتمال وهو بعيد عنها..لا يستطيع أن يتخيل أن يعيش مجددا بدونها ولكنه لابد وأن يحاول..لذا تجاهل كلماته وهو يسأله بهدوء قائلا:
المهم..قوللى ..الكاميرات فى مكانها؟
أدرك نبيل محاولات صديقه فى الهروب من مشاعره ليقول بهدوء:
كل شئ تمام وفى مكانه..وأنا كمان شوية وهنزل عشان أسهلك الأمور..
ليعقد حاجبيه مستطردا:
بس إنت مش قلت إنك كنت هتكلم خالد عشان يكون موجود ويسمع كلامها.
تنهد مؤيد قائلا:
خالد مسافر والله أعلم هيرجع إمتى وأنا عايز أخلص من الموضوع ده..لما يبقى الموضوع يخلص هبقى أوريله الشريط وأعتذر منه لإنه أكيد هيزعل إنى مقلتلوش..بس انا واثق إنه هيسامحنى وهيقدر موقفى.
مط نبيل شفتيه قائلا:
معتقدش..واحد زي خالد هيكون رد فعله مختلف خالص لما يعرف إنك مقلتلوش ومخدتش رأيه فى اللى بتعمله..ربنا يستر.
