نفوس قاسية 6 بقلم منى أحمد حافظ

وصمتت برهة وقالت:
– آه ولو تفتكر يا آدم أنا قلت أيه واحنا رايحين إسكندرية أن مش جنة اللي تشتري أبدًا حد باعها عن إذنكم كلموا كلامكم سوا.

راقب آدم ابنته وهي تكمل صعودها وهو يتكأ على باب مكتبه وبادل نظره بين آدم وياسين وتحرك صوبهم وقال:
– أقدر أفهم في إيه بيدور من ورايا ولا أنا بردوا هبقى أخر من يعلم.

أجابه ياسين وقال:
– أنا يا عمي مش فاهم جنة ليه رافضة ارتباطنا بعد ما حضرتك وافقت مش فاهم كلامها و.

ربت آدم على كتف ياسين وقال:
– لو أنت مش فاهم فأنا فاهم بنتي كويس، بص يا ياسين الجواز قسمة ونصيب وأنت نصيبك مش مع بنتي، أنا كمان آسف أني أقولك أن أنا سحبت موافقتى ليك، لأنك ببساطة خذلت بنتي فكل مرة كانت محتاجة أنك تثبت لها أنك شاريها وعايزها، عمومًا البيت بيتك وأنت هنا وسط أهلك احضر معانا الفرح وأرجع مكان ما جيت لأن جنة عمرها ما هتبقى ليك.

———–

– رفضتي ياسين ليه يا جنة.
رفعت جنة عيناها صوب باب غرفتها وطالعت وجه شقيقها عمران وقالت وهي تتمالك دموعها:
– لأني اكتشفت أنه مكنش حب يا عمران.

مجرد كلمات قالتها جنة لتوضح حقيقة أدركتها أخيرًا فجلس عمران بجانبها وقال:
– والحرب اللي كانت دايرة علشانه بينك وبين بابا وبيني.

أجابته جنة بصدق وقالت:
– كانت حرب من طرفي أنا يا عمران إنما هو كان مستسلم ومحاولش علشان يوصل لي ولو لمرة، وبعدين مش أختك اللي تتجوز واحد هرب واستسهل لنفسه الحياة من غيرها، ولما عرف بالصدفة أن الطريق مفتوح قصاده قال يرجع يلم الغنيمة.

احتضنها عمران وقال:
– صحيح أنك بنت آدم وسهر يا جنة فعلًا مش أختي أبدًا اللي ترتبط بواحد والده محمود.

حدقت جنة بوجه عمران وقالت:
– أهو أنا عايزة أعرف بقى حقيقة الموضوع اللي أنت مخبيه عني.

أجابها آدم وقال وهو ينضم إليهما:
– الحقيقة دي أنا اللي هقولها لك يا جنة علشان تفهمي ليه أنا رفضت ياسين من الأول.

جلس آدم مع ابنته جنة جلسة مصارحة وضح لها كل شيء دون ذكر بعض الأحداث التي يجب عليه إخفائها، استمعت جنة لوالدها وبكت في صمت حتى أنتهى ونظرت له وقالت:
– وكلامك دا يا بابا يخليني أرفض ياسين مليون مرة أنا أكيد هلاقى الإنسان اللي يحبني ويقدرني، وأنا مش مستعجلة أساسًا، وبعدين هو مش حضرتك وعدتني أنا وماما أننا هنسافر أنقرة، أهي الفرصة جت نسافر كلنا العرسان يقضوا شهر عسل واحنا نتفسح أيه رأيك.