نفوس قاسية 6 بقلم منى أحمد حافظ
مسحت زهرة دموعها في نفس اللحظة التي صدح فيها هاتفها برقم أسامة، فتنهدت بحزن وأجابت اتصاله وقالت دون أن تعطي له أي فرصة بالحديث:
– أنا آسفة يا أستاذ اسامة أنا برفض طلبك، أنا مقدرش ارتبط بيك وأنت عايش حياتك كلها مع مراتك، أنا اسفة بجد بس فعلا مقدرش أوافق على طلبك.
انهت زهرة الاتصال وتنفست ببطء تشعر رغم حزنها بالراحة، فقبلت خطاب والدتها وضمته إلى صدرها وهي تهمس:
– أنا كمان بحبك أوي يا ماما وفعلًا كلامك معايا فرق كتير أنا عمري ما هكرر نفس غلطتك، حتى لو كنت بحب أسامة وحتى لو هتعب من بعدي عنه، إنما مش هقبل أبدًا أني اتجوزه وهو بيحب مراته حضرتك حاربتي واحدة عايشة وهي وقفت معاكِ، إنما أنا مش هقدر أحارب واحدة متوفيه أبدًا.
————
وقفت مريام أمام المرآة أحد المحال ومعها جنة وإحدى صديقاتها من الكنيسة، ونظرت إلى انعكاس صورتها بفستان زفافها، فلم تشعر بالبهجة أو السعادة ولمحت الحزن في عين جنة رغم اظهارها العكس، فزفرت بحدة وقالت بضيق ونفاذ صبر:
– خلاص أنا تعبت دا حلو أنا مش هقيس أي حاجة تانية.
ودلفت خلف الستارة تبدل فستان الزفاف بملابسها فسمعت صديقتها نيرفانا تقول:
– ماري هو ينفع أطلب منك طلب أرجوكِ.
أجابتها ماري وقالت:
– عايزة أيه يا نيرفي.
ضحكت نيرفانا وقالت:
– عايزاكِ زي الشاطرة تاخدي تبرع الكنيسة وتروحي بيه معهد الأورام وتوصليه، علشان أنا ورايا مشوار مهم أوي ومش هينفع اتأخر، وحياتي حتى جنة معاكِ ممكن تروحوا سوا طالما خلاص استقريتي على الفستان دا.
وافقت مريام وقالت:
– خلاص سيبي الظرف مع جنة ووروحي أنتِ مشوارك، بس خليكِ فاكرة أنا كدا ليا خدمة عندك ماشي.
سلمت نيرفانا المظروف لجنة وغادرت بسرعة فانتظرت جنة خروج مريام وقالت حينما وقفت بجانبها:
– ماري أنا مش هقدر أروح معاكِ المشوار دا أنتِ عارفة أني مصدعة وتعبانة ومش هقدر بجد ألف معاكِ.
حدقت بها مارى بقلق وقالت:
– مش عارفة مالك أنتِ وآدم كل شوية صداع وكل ما أقول لحد فيكم يجى معايا يهرب في، أيه حصل أنتم زعلانين مع بعض ولا أيه؟
تهربت جنة من الإجابة وهي تسير بجانبها وقالت:
– مافيش حاجة أساسًا أنا بس من كتر ما بفكر فـ ياسين ومش متقبله أنه خلاص معدتش معايا هنا، دا اللي مسبب لي عدم التوازن المهم خلي بالك أنتِ من نفسك وطمنيني لما تروحي، وعلى فكرة الفستان مش حلو أبدًا عليكِ مش حساكِ فيه سلام بس هعمل أيه دا قرارك أنتِ واختيارك.
