نفوس قاسية 6 بقلم منى أحمد حافظ
اقترب منها ياسين ومد يديه واحتضن كفيها وقال بحب:
– مقدرتش أتحمل بعدك كل الوقت دا علشان كده قررت أني أرجع لك تاني يا جنتي.
لمحت جنة آدم من خلف ياسين فسحبت يدها بارتباك شديد وقالت:
– لسه فاكر دلوقتي تحس أنك مش قادر على بعدي يا ياسين وكنت فين طول الوقت اللي فات وأنت سايبني وعايش حياتك.
شاهدهم آدم فابتسم لياسين وأكمل سيره إلى داخل الفيلا فنظر ياسين إلى جنة وقال:
– سامحيني يا جنتي بس أنا فعلا كنت محتاج وقت أعيد فيه حساباتي تاني علشان أقدر أقرر حياتي هتمشي أزاي، وصدقيني طول الوقت دا مكنتش عارف أعيش من غيرك أنتِ حياتي أصلًا يا جنة وعشقى الوحيد.
وقفت جنة أمام ياسين تستمع لكلماته وعيناها تلاحق آدم حتى اختفى داخل الفيلا وأحست أنها لا ترى ياسين أمامها وكأن كلماته تلك يقولها لغيرها، أحست بأن قلبها لم يعد ينبض من أجله كالسابق كأن فترة غيابه عنها كانت هي ما تحتاج إليه، لتعلم أن حبها له لم يكن حبًا من الأساس إنما إعجاب بشخصية أقرب ما يكون لشقيقها رشدي فهزت رأسها بحدة وقالت وهي تشيح بعيناها عنه:
– الظاهر أن مش لوحدك اللي كنت محتاج البعد دا علشان تعيد حساباتك تاني يا ياسين، بس الفرق أني لسه محتاجة وقت علشان أقدر أحدد أنا عايزة أيه.
ابتسم لها ياسين وقال:
– خدي الوقت اللي أنتِ محتجاله يا جنتي وأنا هدخل دلوقتي أطلبك من عمي آدم وأهو الفرحة بدل اتنين تبقى تلاتة.
تابعته جنة بعيناها وهو يدخل فتبعته وهي شاردة الفكر ودخلت خلفه فشاهدته يقف مع آدم مازن يتحدث فاقتربت منهم وسمعته يقول:
– أنا مش عارف اشكرك أزاي يا آدم أنك اتصلت بيا وبلغتني أن عمي غير رأيه ووافق على جوازي من جنة، بجد جميلك دا هشيله فوق راسي أنا وجنة.
شهقة صدرت عن جنة فالتفت الاثنان نحوها وعلت ملامحهما الارتباك، فوقفت تنظر إليهما وقالت بإنكسار:
– يعنى أنت مجتش لوحدك يا ياسين، جيت لما الأستاذ آدم كلمك وقالك أن بابا وافق، والله برافو ياه بجد أنا مش عارفة أقولكم إيه.
و نظرت جنة إلى آدم وقالت:
– بجد مش عارفة أشكرك أزاي يا آدم على معروفك دا مكنتش عارفة هعيش أزاي وياسين بعيد عني، بس للأسف أنا بقى مش هشيل جميلك دا فوق راسي زي يا ياسين لأنك وضحت لي حقيقة جديدة النهاردة مع ياسين.
هم آدم أن يتحدث ولكنها ابتعدت وصعدت إلى أعلى ووقفت مرة أخرى وقالت:
– تقدر تتفق مع بابا يا ياسين على أي حاجة إلا أنك ترتبط بيا، لأنك للمرة التانية بتثبت لي أنك محاولتش علشاني بأي طريقة، إنما جيت لما عرفت بس أن بابا اتنازل ووافق.
