نفوس قاسية 5 بقلم منى أحمد حافظ

أجابها عمران بفتور وهو يضم يد ريهام إلى صدره وقال:
– لما أحدد هبعتلك الدعوة أنتِ وخطيبك يا مريام.

شعرت ماري أنها على وشك الانفجار بوجهه لما ألت إليه الأمور، فقالت تطعنه بقرارها الجديد وتصدم آدم وسهر معها:
– ابقى ابعت الدعوة بإسم جورج وحرمه لأننا هنتجوز بعد أسبوعين.

تمالك عمران أعصابه وقال بهدوء مريب:
– خلاص هأجل أي خطوة لحد ما نحضر فرحك الأول يا مريم عن اذنكم.

شدد عمران قبضته على يد ريهام التي اندفعت الدموع إلى عيناها وهمست له بعتاب:
– ليه يا عمران ليه توصل الأمور لكل دا أنت مش حاسس أنك بتقتلها كده، وهي كمان بتأذي نفسها بسببك أنت أزاي هتسيبها كده.

ضغط عمران على يد ريهام وقال:
– أرجوكِ بلاش كلام فالموضوع دا ياريهام أنتِ وافقتي أرجوكِ أنسي الموضوع دا خالص ومتفكريش فيه تاني.

————

استيقظت زهرة مبكرًا وأخذت تعد لابيها الفطور وطرقت باب غرفته لتوقظه فنادت عليه، فتملل في فراشه وصاح يناديها أن تدخل فقالت له بابتسامه وديعة:
– صباح الخير يابابا أنا حضرت لك الفطار وهنزل علشان هفتح المحل بدري النهاردة جاي لي طلبية ورد ولازم أكون هناك قبل الميعاد.

تنهد محمود بألم وقال:
– اخوكِ متصلش بيكِ يا زهرة.

تبدلت ملامح زهرة للحزن وقالت:
– ياسين سافر يا بابا له يومين أنا عرفت من زميله لما شوفته صدفه.

اعتدل محمود بحده على فراشه وقال:
– يعنى نفذ اللي فدماغه ومعملش اعتبار لكلامي ويا ترى بقى سافر من غير ما يودع جنة ولا مرسال الغرام ميعرفش.

شعرت زهرة بالحرج فأغمضت عيناها وقالت:
– أنا مبقتش مرسال ولا أي حاجة وعلشان اريح حضرتك ياسين نهى كل اللي بينه وبين جنة بسفره، عن اذنك يا بابا علشان أنا هتأخر سلام.

وصلت زهرة إلى المحل فوجدت سيارة التحميل تقف فابتسمت ورحبت بشادي وقالت:
– معلش اتأخرت عليك شوية جبت الورد الأحمر اللي طلبته.

حدق بها شادي ولم ينتبه لحديثها معه، فنادت عليه زهرة مرة أخرى وقالت بصوت أعلى:
– شادي جبت الورد الأحمر بقولك.

هز شادي رأسه وهو يحدق بملامحها بهيام فوقفت زهرة تشعر بالضيق وصاحت تنهره:
– معدتش تجيب لي حاجة تاني يا شادي أنا هبلغ عمي محمد ميبعتكش طالما هتفضل تتنح كده ومتجبش اللي طلبته.

انتبه لها شادي وقال مسرعًا:
– لا قلبك طيب أنا جبت لك كل حاجة بس بلاش تقولي لبابا حاجة خلاص مش هبص لك تاني أنتِ أيه يا شيخة قلبك دا حجر.