وادي النسيان 4 شاهنده

الفصل التاسع والعشرون كل قسوة منك ستذوب...فأنا أنثى من حرير في قلبي لمعت نجوم عينيك و حب عتيق بالله عليك كيف تهنأ و أذبح انا بلوعة حنين أما لاحت لك شظايا أشواق كمشاعل حريق تخترق الحواجز و تلهب آهات أيام و سنين أمسك بقلبي و ذراعي فأنت البعيد قريب خلت بعدك الأماكن و ما غيرك لقلبي أنيس بقلم..نور محمد ***************** وقفت شاهيناز على باب شقة مؤيد..ترن جرس الباب بلهفة..ليفتح لها مؤيد الباب..إبتسمت وعيونها تلمع بإعجاب وهي تراه بلباسه المنزلي المريح ..ينظر إليها مبتسما بدوره..مفسحا لها الطريق لتدخل إلى شقته..وما إن أغلق الباب خلفها حتى إندفعت إلى حضنه تضمه بقوة قائلة: وحشتنى. تفاجأ مؤيد من فعلتها تلك ولكنه تمالك نفسه بسرعة وهو يدفعها عنه برفق لتنظر إليه بحيرة..قبل أن تعقد حاجبيها قائلة: هو أنا موحشتكش ولا إيه؟ إبتسم قائلا: وحشتينى طبعا..بس إنتى أكيد عارفة عنى إنى مبلمسش واحدة متجوزة..ولا شكلك نسيتى ياشاهي؟ قالت فى حنق: لأ منستش..بس إنت عارف إنى هطلب الطلاق من خالد أول ما ييجى من السفر..وساعتها هكون حرة. أشار لها بالتقدم قائلا: لغاية ما تكونى حرة ياشاهى..مش هقدر ألمسك لإنى لو لمستك مش هسيبك وإنتى عارفة. تجاهلت إشارته وهي تتقدم منه قائلة: ومين قالك بس تسيبنى؟ أوقفها مؤيد بإشارة من يده ونبرة صوت صارمة رغم توتره من جرأتها وهو يقول: شاهي.. توقفت فى مكانها وهي ترفع يديها فى الهواء قائلة: خلاص خلاص..زي ماتحب. وإلتفتت تتجه إلى الأريكة..تخلع عنها جاكيت فستانها وتلقيه بإهمال عليها قبل أن تجلس بهدوء ليتقدم بدوره ويجلس على مقعد فى مواجهتها..ظهر الإحباط على وجهها ولكنها قالت بهدوء: قريب وقريب أوى هتكون لية يامؤيد..خلاص هانت..مبقاش فاضل كتير. نظر إليها قائلا بإبتسامة ساخرة: زي ما قلتى ياشاهي..هانت خلاص ومبقاش فاضل كتير.. عقدت حاجبيها قائلة: إنت مش على طبيعتك يامؤيد..أوعى تكون عرفت واحدة فى إسكندرية وده خلى مشاعرك تتغير؟ تراجع مؤيد يستند إلى ظهر مقعده قائلا بإسترخاء: ده كان زمان..أنا إتغيرت..ودلوقتى مفيش بنت تقدر تهز شعرة منى. قالت شاهيناز بحقد: إتغيرت فعلا يامؤيد..مش عارفة بنت نصار عملتلك إيه؟..زي ماتكون سحرتلك..غيرتك من مؤيد اللى كان مدوب البنات وراه لمؤيد الاستريت..اللى مش وراه غير بيته وشغله وبس.. تجمد مؤيد عند ذكر لين وإعتدل عاقدا حاجبيه قائلا بحزم: مبلاش السيرة دى..متقليبيهاش غم ياشاهي. قالت شاهيناز بإبتسامة: معاك حق..أنا مبكرهش فى حياتى أدها عشان خدتك منى..بس يمكن الحاجة الوحيدة اللى طلعت كويسة من موضوعها إنى بطلت أفكر فى مصايب لصاحباتك اللى تعرفهم..انا كنت مرة هقت*ل واحدة منهم ..بس انت سبتها قبل ما أقربلها..حظها بقى. قال مؤيد بإبتسامة يوارى بها شعورا مريعا بالإشمئزاز من تلك المرأة المريضة: أد كدة كنتى بتحبينى ياشاهى..إزاي بس كنت أعمى ومشفتش حبك ده؟ نهضت شاهيناز وجلست على ركبتيها أمامه..تمسك يديه..قائلة بعشق: أنا مش بس بحبك..أنا بعشقك يامؤيد. نهض مؤيد وقد شعر بالتوتر من إقترابها منه هكذا..قائلا بسخرية: بس الظاهر بطلتى تحبينى ياشاهى وإلا كنتى حاولت تدبرلى مصيبة للين..عشان تفرقى بينا زي ماكنتى بتعملى مع صاحباتى زمان. نهضت بسرعة مقتربة منه ..تقف أمامه وهي تنظر إلى عينيه بحب قائلة: مين قالك بس إنى محاولتش أفرق بينكم..أنا عمرى ما بطلت أحبك..وفضلت لآخر لحظة أحاول..بس مقدرتش. نظر إلى عيونها قائلا: مشفتش منك يعنى اللى يدل على كدة.. قالت بحقد: لإنك مكنتش بتشوف غيرها..أنا حاولت كتير أفرق بينكم بس دايما كان حبكم أقوى منى ..لغاية مالقيت السلاح اللى ممكن يقضى على أي علاقة حب..الشك والغيرة..بدأت واحدة واحدة أزرعها فى قلب لين..لغاية ماجتلى فكرة انك بتخونها مع واحدة تانية وأثبتلها ده بالدليل القاطع واللى مقدرتش تشكك فيه. عقد حاجبيه قائلا: دليل إيه ده..أنا عمرى ما خنتها؟ إبتسمت فى خبث قائلة: انت عمرك فعلا ما خنتها بس الشهادة اللى وريتهالها واللى أثبت فيها إنك ليك بنت من لحمك ودمك ومن غيرها..خلاها تتأكد من خيانتك. إزداد إنعقاد حاجبيه قائلا: زورتى الشهادة ؟؟ إتسعت إبتسامتها الخبيثة قائلة: لأ طبعا..إنت ليك فعلا بنت عايشة من أم غير لين..إنك متعرفش عنها حاجة فدى بقى غلطتك لإنك زمان مكنتش بتدور ورا علاقاتك وإذا كان ليها نتايج أو لأ. أمسك بذراعها يقول فى حدة: البنت دى فين دلوقتى؟ ..إنطقى. نظرت إليه فى توتر قائلة: إهدى بس..وهقولك..البنت دى تبقى..تبقى..... ريم. ترك مؤيد ذراعها وهو يتراجع .....بصدمة. ******************** قالت جورية بضعف: إفهمينى ياليلة..قرارى المرة دى مش ممكن هتراجع عنه..جدى معاه حق ..مينفعش أبنى علاقة مع واحد متجوز..لمجرد إنى بحبه و انه مش مرتاح مع مراته الأولانية..قراره بالإنفصال عنها مينفعش يكون متأثر بوجودى فى حياته..أنا هفضل بعيدة عنه..يمكن يرجع لمراته ويكمل معاها لما أختفى من حياته..ولو محصلش ..لو فعلا طلقها ساعتها ممكن يكون فيه أمل لعلاقتنا..لكن قبل كدة مستحيل. قالت ليلة بحزن: أنا مش معاكى ياجوري فى قرارك..علاقة خالد بشاهيناز منتهية من قبل ما يعرفك..والدليل على كدة إصراره على وجودنا لوحدنا فى بيت تانى بعيد عنها ..ووجودك إنتى فى حياته يمكن عوض من ربنا ليه على حاجات كتير إستحملها فى حياته وأولهم شاهيناز على فكرة..ورغم إعتراضى بس أنا هسيبك براحتك..لإنى واثقة إنى قريب وقريب أوى هفرح بيكوا انتوا الاتنين. قالت جورية : طيب سيبك من موضوعنا دلوقتى وطمنينى هتقدرى تنزلى الكلية امتى؟ قالت ليلة: مش قبل آخر الشهر..ده لو فراس سمحلى طبعا..عاملين علية هو وخالد كماشة..أوامر اوامر..متقوميش ..متنزليش..متعمليش..لسة مبقاليش يوم واحد فى مصر وقربت أتجنن.. إبتسمت جورية قائلة: معلش ياقلبى..كل الأوامر دى عشان خايفين عليكى..وياريت تكونى بنوتة شاطرة وتسمعى الكلام.... إبتسمت ليلة قائلة: بسمعه طبعا ..مضطرة بقى..واللى مصبرنى رواياتك..بكمل قرايتها..على فكرة..إنتى مبدعة..وتقريبا بقيتى كاتبتى المفضلة..حبيت رواياتك أوى. قالت جورى بإبتسامة باهتة: شئ يسعدنى ياليلة..وهتحبيهم أكتر لما تعرفى إن فى كل رواية فيه مواقف من الواقع..من قصتى مع فهد. تنهدت ليلة قائلة: حسيت بكدة على فكرة. قالت جوريةبلهجة تحذيرية: المهم ياليلة.. مش عايزة خالد يعرف مكانى ولا يعرف حاجة من اللى قلتهالك دلوقتى..مفهوم؟ قالت ليلة: مفهوم. قالت جورية: هسيبك دلوقتى ترتاحى وأكلمك بعدين..لا إله إلا الله. قالت ليلة: محمد رسول الله. ثم أغلقت ليلة الهاتف وهي تمنحه لفراس..الذى ولج للتو إلى الحجرة لينظر إليها بإستفهام لتهز رأسها نفيا قائلة بإحباط: مفيش فايدة. ******************** قال مؤيد بصوت مصدوم كلية: ريم تبقى بنتى أنا؟؟ كادت شاهيناز أن تتحدث حين قاطعها صوت يأتى من خلفها قائلا بصرامة: كنت متأكد على فكرة . إلتفتت شاهيناز بحدة تنظر إلى صاحب الصوت لتجده خالد يرمقها بوجه جليدي الملامح..تدرك الآن أنه فى قمة غضبه..لتقول بصوت مهزوز: خ..خا..خالد. إقترب منها خالد قائلا بنبرة حادة كالسيف تقطر غضبا: أيوة خالد..خالد اللى إستحمل قرفك ..سامحك لما عرف بغلطتك قبل الجواز..كمل معاكى وإداكى أكتر من فرصة عشان تبقى واحدة محترمة ونضيفة..بس مع الأسف ..اللى جاي من الوحل بيفضل طول عمره فى الوحل. قالت بإضطراب : ياخالد أنا.... هدر قائلا بصوت صارم: إنتى إيه ..ها؟إنتى واحدة حقيرة مكتفتش بإنها قربت من حبيبها بالغش..وحملت منه..لأ..راحت إتجوزت غيره ونسبت بنته ليه..وده طبعا مش كفاية عليها ..راحت كمان فرقت بين حبيبها ومراته..عشان يرجع ليها من تانى..تفكير مريض من واحدة مريضة..أنا عايز بس أسألك..ذنب ريم إيه؟..ذنب لين إيه؟..ذنب مؤيد إيه؟وذنبى أنا إيييييه؟ صرخت قائلة: كلكم مذنبين..كلكم مذنبين.. أشارت إلى مؤيد الذى مازالت علامات الصدمة واضحة جلية على ملامحه..قائلة: ذنبه إنه محسش بية وبحبى ليه ..وسابنى بعد ما غلط معاه..حتى لو كنت أنا السبب..فكان لازم على الأقل يستر علية ويشوف لو الليلة دى كانت نتيجتها طفل..وذنب لين إنها خطفته منى ومبصتش لماضيه قبل ما تتجوزه وذنبك انت عشان حسستتى إنك متجوزنى خلاصة حق..وإنك بتشفق علية مش أكتر..أما ريم فذنبها إنى أنا أبقى مامتها ومؤيد يبقى باباها..يبقى باباها ياخالد. نظر إليها خالد بإحتقار قائلا: متجيبيش الذنب علينا..الغلطة غلطتك من البداية..طول عمرى حاسس إن جوازى منك كان أكبر غلطة فى حياتى..والحمد لله إنى خلصت من الغلطة دى النهاردة..وعلى فكرة منصدمتش فيكى ولا إنصدمت من موضوع ريم..من أول مامؤيد ولين قالولى وأنا كنت متأكد من إن ريم هي البنت اللى انتى خدتى منها العينة..كل الشواهد كانت بتقول كدة..بس كنت محتاج إعترافك عشان أحرمك منها وأحرمك من كل حاجة حلمتى تاخديها ياشاهيناز. ليشير إلى الكاميرات قائلا : والحمد لله إتفقت مع مؤيد ليلة سفرى لباريس مع ليلة..انى أكون موجود وهو بيخليكى تعترفى بجرايمك..و قدرت معاه آخد إعترافك كله وأصوره صوت وصورة. ليخرج من جيبه ورقة الطلاق الخاصة بها..يلقيها فى وجهها المصدوم من كلماته وهو يقول: دلوقتى أقدر أقول إنى إتحررت منك..وحققت إنتقامى..إنتى طالق ياشاهيناز..طالق..طالق. نظرت إليه شاهيناز بصدمة ثم نظرت إلى مؤيد الجالس على كرسيه منهك القوى..لتقول له بهذيان: مؤيد الكلام ده صح؟إنت كنت متفق معاه؟عشان خاطرى قولى إن كل اللى قاله ده غلط..قول إنه مش صح..قول إنك مخونتنيش يامؤيد..قووول. رفع مؤيد عيونه إليها يظهر الكره فى طياتهما وهو يقول بحقد: هقول ياشاهيناز..هقول إنك أحقر بنى آدمة شفتها فى حياتى..وإنى مبكرهش فى حياتى أدك إنتى..ياريتنى ما قابلتك ولا عرفتك..روحى ياشيخة منك لله. نقلت شاهيناز عيونها بين خالد ومؤيد..لتطرق برأسها فى إنكسار تنهمر دموعها على وجهها وهي تبتعد بسرعة خارجة من الشقة تتابعها عيون كل من خالد ومؤيد النافرة الغاضبة المحتقرة..وما إن غادرت حتى إلتفت إلي خالد إلى مؤيد الجالس بإنكسار ليشعر خالد بالشفقة عليه..إقترب منه خالد قائلا: إنت كويس يامؤيد؟ رفع إليه مؤيد عينان دامعتان وهو يقول: وهكون كويس إزاي بعد اللى عرفته ده ياخالد؟بنتى كانت أدامى طول الوقت ده وأنا محروم منها ومحروم من كلمة بابا اللى حلمت بيها عمر بحاله..أنا مش قادر أستوعب المفاجأة. قال خالد برفق: أنا كمان كنت زيك..ضربة قوية خدناها بس الضربة اللى مبتموتش بتقوى يامؤيد..وأنا عايزك قوى عشان خاطر ريم. قال مؤيد: تفتكر هقدر أواجهها بالحقيقة دى؟ قال خالد بحزم: لازم نواجهها مع بعض ونمهدلها الموضوع ولازم كل حاجة غلط تتصلح يامؤيد..ما بني على باطل فهو باطل..ريم هتفضل بنتى طول العمر..الأبوة مش بالدم..بالعشرة والتربية.. بس لازم كمان تعرف إنك باباها..صحيح مش هينفع نقولها الحقيقة مرة واحدة..وهنجيبهالها بالتدريج..بس أنا واثق ان ريم هتقدر تستوعبها وتستحملها..ريم بنت ذكية..وميتخافش عليها..صدقنى. نظر مؤيد إلى عيون خالد الواثقة القوية ليستمد قوته منهما..يومئ برأسه بهدوء....وراحة. ******************** وقفت شاهيناز فى هذا الوقت المتأخر تتطلع بصمت إلى صفحة النيل العميقة أمامها..تتطلع إلى مياهه السوداء تماما كقلبها الآن..قد خلقه الله صافيا فلوثه البشر..كذلك كان قلبها فى صغرها قبل أن تلوثه أفعال أباها وأمها..فلم تخبر أحدا قط عن نشأتها المتواضعة فى منزل بحي فقير من أحياء القاهرة..لاقت من أبيها تعذيبا وقسوة ولاقت من أمها إهمالا ولا مبالاة بما يحدث لها..لتنشأ حاقدة كارهة لهما..تمتلئ نفسها بالحقد أيضا على أقرانها ممن يمتلكون حياة طبيعية تختلف عنها..لتكون الطامة الكبرى حين قت*ل أباها شريكه فى التجارة وسرق المال..هكذا سمعته يخبر أمها فى تلك الليلة المشئومة..ليصبح بعدها والدها هو توفيق حسان صاحب الشركة التى حولها بالرشاوى والفساد إلى شركة مشهورة..لتنغمس والدتها فى الحفلات تاركة إبنتها تضيع ..تشرب المخدرات وتنتقل من أحضان رجل لآخر غير آبهة بأي شئ ..ليتوفى والدها وتتزوج والدتها بعده عدة مرات..حتى حينها لم تبالى شاهيناز سوى بنفسها فقط..وليذهب الجميع إلى الجحيم..لتستيقظ يوما فى المستشفى يخبرونها أنها كادت أن تموت بجرعة زائدة من الهيروين..وكالعادة وفى أي مصيبة لها وجدت نفسها وحدها تماما..لتقرر الإقلاع عن المخدرات وقد وجدت نفسها فجأة تحب الحياة..وبالفعل أقلعت عن المخدرات بعزيمة وإرادة..وحينها تزوجت والدتها بوالدة مؤيد وأصبح لديها إدمان من نوع آخر.. إسمه مؤيد..أحبته كثيرا بكل كينونته..مميزاته وعيوبه..وسامته وإستهتاره..عقله وجنونه..ولكنه لم يراها..ولن يراها قط..لتدرك فجأة أنها لن تشفى تلك المرة من الإدمان ولن تستطع الإقلاع عن حبه أبدا..سوى بالموت..نعم الموت..ربما هو الحل الوحيد لكل عقدها ..فربما لو ماتت ما شعرت بهذا الألم الذى يعتصر قلبها الآن بقوة..ولإبتعدت عن حياة طفلتها فلا تنشأ مثلها..رغم أنها تدرك أن خالد ومؤيد سيحرمانها منها بالتأكيد..وحتى إن تركوها تراها فماذا ستقول لها عن سبب إنفصالها عن خالد وماذا ستقول لها عن مؤيد؟لقد خربت حياتها بالكامل وخسرت كل شئ..إذا فلتخسر حياتها بدورها..فلاشئ فيها قد يجعلها تتمسك بتلك الحياة الغريبة البائسة..صعدت على السور بسرعة ونظرت إلى المياه المتلاطمة بخوف ولكنها مالبثت أن أغمضت عينيها وهي تقفز فى المياه..أحست بالمياه تغمرها..تخنقها ..تسحب أنفاسها وتزهق روحها..حاولت التمسك بحياة تنساب من بين يديها.. ومقاومة تيار المياه ولكنها كانت أضعف من أن تقاومها لتضعف مقاومتها رويدا رويدا حتى خفتت تماما وغاصت إلى الأعماق.. وإختفت تماما من على سطح الماء..لترحل شاهيناز وقد خسرت دنياها وآخرتها.. نسيت فى غفلة منها أننا مهما عانينا فى تلك الدنيا الفانية فعلينا أن نتمسك بالأمل فى الله وأن نرجوا منه فرجا لهمومنا.. فالمنتحر قانط من رحمة الله.. مثواه جهنم ......وبئس المصير. ........... الفصل الثلاثون ويوماً ما ستأخذنى بدرب الحب ننسانا .. سأجلس على أرجوحة أنت صانعها تفلتها لتعود يديك تلقاها ... سنجوب عالم الكذب سيطوف حولنا الحزن لتكون النجاة يوم لقائنا الحافل فننسي كل ما كان .. وعلى شرفات الانتظار سأبقى أفكر فى البعد يوماً لكن للقرب منك بالقلب قراراً.. خيالاً كنت أم وهماً سانتظر أن تأتى من الغيمات بأمطار تزرع على حدود صبرى أزهاراً.. بقلم..حنان صلاح ************** جلس مؤيد فلم تعد قدماه قادرتان على حمله من هول الصدمة قائلا: إحنا السبب ياخالد..صح؟ جلس خالد بجواره يغمض عينيه ويضع إصبعيه السبابة والإبهام على ذلك الجسر مابين عيناه يقول بحزن: لأ مش إحنا..ده قدرها..ومتحملش نفسك فوق طاقتها يامؤيد..اللى زي شاهيناز بتكون نهايتهم كدة وأسوأ من كدة كمان. نظر إليه مؤيد قائلا بمرارة: مفيش أسوأ من كدة ياخالد..دى ماتت منتحرة يعنى خسرت دنيتها وآخرتها وخليتنى أعيش طول العمر بذنبها..أفكر لو بس كنت خدت بالى من تصرفاتى معاها..لو كنت فهمتها بالراحة إنى مش ممكن أكون وياها ..لو كنت حاولت أصلح غلطتى..جايز كانت.... فتح خالد عينيه و نظر إليه قائلا بحزم: متفتحش للشيطان مكان يدخل لأفكارك منه..زي ما شاهيناز فتحتله وخلاها تفتكر إنها بكل اللى عملته تقدر تحقق اللى هي عايزاه..خلاها تتصور إن حتى بموتها هتقدر تنهى الفضيحة اللى كانت هتطولها لو حد عرف باللى هي عملته..سمعت كلام الشيطان اللى خلاها أنانية حتى فى موتها .. مفكرتش للحظة واحدة ممكن يأثر على بنتها إزاي؟ للأسف يامؤيد الشيطان لو إتمكن من أفكارنا هيودينا فى سكك مكناش نتصور إن إحنا نوصلها..ولا كنا نتخيل إن الحاجات دى ممكن تحصلنا..قاوم شيطانك يامؤيد بالإستغفار..واطلب ليها الرحمة..ده اللى فى إيدينا ليها دلوقتى . أومأ مؤيد برأسه ثم فرك وجهه بيديه وهو يقول: أستغفر الله العظيم..ربنا يرحمها ويغفر لها ويغفر لنا جميعا. ربت خالد على فخذ مؤيد قائلا: يارب ..قوم بقى إغسل وشك وتعالى معايا عشان هندفنها..ونعملها كمان فى البيت صوان عزا..أنا قدرت ألم الموضوع بسرعة عشان الفضايح وإتكتب فى المحضر إن موتها كان قضاء وقدر..كانت بتميل تتفرج على مية النيل..فقدت توازنها ووقعت..مش عايز أفتح علينا ألف باب..وأشوه سمعتها وسمعة ريم بنتها..هي خلاص ماتت..ربنا يغفر لها بقى. عقد مؤيد حاجبيه قائلا: والشريط اللى معانا؟ قال خالد: وريته للين ..هي الوحيدة اللى كان من حقها تشوفه..وده كان كمان قبل ما أعرف بخبر موت شاهيناز..دلوقتى هي ماتت والشريط ده مليان بذنوبها..كسرته طبعا..هعمل بيه إيه؟ أومأ مؤيد برأسه قائلا: معاك حق..الشريط ده كان دليل برائتى أدام أختك..وآداة فى إيدك لو شاهيناز طالبت بحضانة ريم..خلاص فعلا، مبقاش ليه أي لازمة..يلا بينا ياخالد..خلينا نقفل صفحة الماضى بحلوها ومرها. أومأ خالد برأسه موافقا فى ....صمت ******************** إنتهى العزاء سريعا وكأن الأيام لا تريد أن تتمهل..لتمنح أبطالنا فرصة لمداواة جروحهم القديمة وأحزانهم الحالية..ليقف خالد مودعا مؤيد الذى قال: أشوف وشك بخير ياخالد. قال خالد بهدوء: لسة مصمم تسافر وتسيب البلد؟ أومأ مؤيد برأسه قائلا: مش هينفع أعمل أي حاجة غير كدة..كل حاجة هنا هتفكرنى بالماضى اللى عايز أنساه..أنا خلاص عملت اللى كنت قاعد علشانه وأثبت برائتى أدام الكل..هقعد ليه تانى؟ قال خالد : طب وشغلك فى إسكندرية..و ريم؟ قال مؤيد بألم ظهر فى عينيه: إحنا مكناش لسة خلصنا ورق الشركة فى إسكندرية..يعنى مش هنخسر حاجة..ولو نبيل حابب يكمل عشان سها هيكمل ويختارله شريك غيرى..أما ريم فمن الأحسن ليها إنها تفضل مفكراك باباها أحسن ما أصدمها من دلوقتى وأخليها معقدة نفسيا..جايز مع الأيام أرجع وأفهمها الحقيقة ..بس الأكيد إنى مش هقدر أقولها أي حاجة دلوقتى. تنهد خالد قائلا: أنا مش معاك يامؤيد فى قرارك..بس هسكت على أمل إنك تقتنع لوحدك بإن وجودك معانا هو أنسب قرار ممكن تاخده. ربت مؤيد على كتف خالد قائلا: معتقدش..أشوفك بخير ياخالد..هروح أودع ريم وأمشى علطول. قال خالد بدهشة: إنت هتسافر باريس النهاردة؟ إبتسم مؤيد بهدوء وهو يقول : لأ..لسة هلغى كل حاجة فى إسكندرية الأول..فهسافر بكرة إسكندرية أخلص كل حاجة وبعدين هسافر على باريس علطول. إبتسم خالد قائلا: ربنا يوفقك يامؤيد. إبتسم مؤيد إبتسامة باهتة ثم تركه مغادرا بخطوات سريعة ..لينظر خالد فى إثره قبل أن يتنهد ويذهب فى الطريق المعاكس ليستنشق بعض الهواء ..فقط يريد بعض الهواء ..يشعر بالإختناق لما آلت إليه الأمور ..يود لو إختلفت تلك الأمور قليلا..ولكنه القدر..وهو نفسه ذلك القدر الذى سيحمله فى الغد إلى محبوبته ليريح قلبه المعذب فى بعدها ويفضى لها بمكنون صدره.. بينما تابعت عيون تحمل العشق والإصرار مؤيد وهو يودع طفلته بعيون غشيتها الدموع..لتهز رأسها تنوى تغيير خططه كلية بعد أن إستمعت لحديثه مع أخيها لتقول بهمس وإصرار: مش ممكن هكرر غلطة زمان وأسيبك تمشى من غير ما أصارحك باللى جوايا يامؤيد..وساعتها القرار هيكون فى إيدك ياتقت*لنى بسكينة بعدك.. ياترحمنى وتسيبنى أعيش. ******************** قال خالد لليلة عندما رآها تغلق هاتفها وهي تزفر بعمق : لسة بتتصل بيكى؟ قالت ليلة بحنق: أيوة ولسة مبردش عليها زي ما قلتلى وعلى فكرة ده هيقلقها ومش بعيد يجيبها القاهرة. قال خالد بغموض: مش هتلحق. إتسعت عينا ليلة بفرح قائلا: هتسافرلها ...صح؟ إبتسم قائلا: بكرة الصبح علطول..مش هوصيكى على ريم..خدى بالك منها إنتى ولين.. إتسعت إبتسامتها قائلة: فى عينينا ياخالد..متنساش توصل سلامى ليها ومترجعش من غيرها. إتسعت إبتسامته وهو يقول بعزم: هيحصل ياليلة..هيحصل. ******************** إقترب خالد من طفلته النائمة بهدوء..نعم طفلته ..يدرك أن الأبوة ليست بالجينات ولكنها بالشعور..لقد ولدت على يديه..وكان بجوارها أثناء نشأتها..يوم بيوم وسنة بسنة..حتى عندما أفاق من غيبوبته فى تلك المستشفى ..ورغم تخبطه من إدراكه بمرور عام كامل لا يدرى كيف مر وهل كان فى الغيبوبة طوال ذلك العام أم كيف مر عليه دون أن يدرى أو يعلم أحد فى المستشفى عنه شيئا ؟..إلا أنه ترك تخبطه وأفكاره على جنب وهو يسرع إلى المنزل..يفتقد بشدة رؤية طفلته الحبيبة ريم..تلك التى لم تفارق صورتها خياله طوال الطريق ولم يشعر بالراحة أبدا حتى ضمها بين حضنه..يشبع توقه إليها.. عاد من رحلة الذكريات إلى أرض الواقع وهو يتأمل ملامح ريم الجميلة..يرى الآن تشابه ذقنها مع ذقن أباها..أما باقى ملامحها فتشبه أمها بشدة..تنهد قائلا بحزن: إنتى بنتى ياريم..مهما حصل هتفضلى بنتى ياحبيبتى. ثم دثرها بحنان ومال مقبلا جبهتها برقة ليعتدل ويراها تنظر إليه بعيونها الدخانية الجميلة بنظرة حزينة دامعة..جلس على الفور بقربها قائلا: مالك ياقلب بابى ؟فيكى إيه؟ إعتدلت جالسة وهي تقول له بصوت متهدج: إنت مقلتش الحقيقة يابابى ..خبيت علية ..صح؟ نظر إلى عمق عينيها فى وجل قائلا: خبيت عليكى إيه ياحبيبتى؟ قالت ريم بحزن: قلتلى مامى سافرت..بس مامى مسافرتش..صح؟ لم يستطع أن يكذب عليها مجددا ..خاصة وهي ترمقه بتلك النظرة ليومئ برأسه فى هدوء..لتستطرد ريم قائلة: مامى ماتت وراحت عند ربنا زي ماسمعت دادة فريدة وهي بتقول لدادة سناء ..مامى ماتت زي مامة نودى صاحبتى..صح يابابى؟ أومأ برأسه مجددا لتنهمر الدموع من عينيها قائلة: يعنى أنا مش هشوفها تانى يابابى..ومش هلعب معاها؟مش هتقولى تانى ياأميرتى الحلوة؟ ضمها خالد بين ذراعيه بسرعة..يربت عل رأسها بحنان وهو يقول بحزن: مامى فى مكان أحسن ياحبيبتى وأنا هنا..مش هسيبك..هكون ليكى مامى وبابى..هلعب معاكى وهقولك كمان ياأميرتى الحلوة. ثم أخرجها من حضنه ناظرا إلى عينيها بثبات وهو يقول: مش أنا بس..آنطى ليلة وآنطى لين وآنطى جورية كمان..كلنا جنبك ومعاكى ومش هنسيبك أبدا. ليصمت لثانية يتأكد من إستيعاب طفلته لكلماته قبل أن يستطرد قائلا: أنا عارف إنك زعلانة ياريم..عشان مامى مش معانا..بس لازم تعرفى إن كلنا فى يوم من الأيام هنروح لربنا احنا كمان..هي دى الدنيا ياريم..كلنا هنموت..وهنتجمع تانى فى الجنة وعشان تكونى مع مامى وبابى فى الجنة لازم تكونى بنوتة طيوبة وتسمعى الكلام..اوعدينى ياريم..اوعدينى إنك هتكونى بنت بابى الشاطرة اللى هتسمع الكلام. قالت ريم بصوت ضعيف: أوعدك يابابى. مد خالد يديه يمسح دموع ريم وهو يقول بحنان: عايز أشوف إبتسامة ريمو الحلوة عشان بابى مسافر بكرة ومش عايز يمشى من غير ما يطمن على بنوته. عقدت ريم حاجبيها قائلة: مسافر فين يابابى؟ إبتسم قائلا: هسافر أجيب مس جورية تعيش معانا ياريمو..إيه رأيك؟ شعت عيون ريم بالسعادة وهي تقول : ياريت يابابى ياريت. إبتسم ليقبلها فى جبهتها مجددا ثم يقول: طب نامى بقى وإسمعى كلام عماتك وأنا مسافر..عشان أرجع بسرعة ومتأخرش..إتفقنا؟ أومأت ريم برأسها ثم تمددت على السرير ليدثرها خالد بالغطاء ثم يتجه إلى الخارج ليستوقفه صوتها وهي تقول : بابى. إلتفت إليها بتساؤل لتستطرد قائلة: متنساش تدعى لمامى بالرحمة..وتقول الله يرحمك يامامة ريم ..مس سوزان قالت لنا نقول كدة لما مامة نودى ماتت..وقالت إن الدعاء ليهم بالرحمة حاجة حلوة وبتسعدهم وتعرفهم إن إحنا كمان بنحبهم. إبتسم خالد بحنان قائلا: ربنا يرحمها ياريم..ربنا يرحمها. إبتسمت ريم قبل أن تغمض عينيها ويدرك خالد أنها نامت على الفور من إنتظام أنفاسها..ليبتسم بحنان وهو يهز رأسه يمنة ويسارا قبل أن يغادر الحجرة مغلقا بابها......فى هدوء. ******************** قالت سها بإبتسامة: كدة تمام أوى..أنا مش عارفة أشكرك إزاي يانبيل. قال نبيل بمزاح: حد يشكر جوزه ياهبلة؟ عقدت سها حاجبيها قائلة بحنق: بس متقولش هبلة. قال نبيل بسرعة: خلاص ياستى متزعليش..حقك علية..وبعدين بتشكرينى على إيه؟ده أنا المستفيد الأول من تجميعهم مع بعض وتصفية أي خلاف ما بينهم..ما إنتى مأجلة فرحنا لغاية مايرجعوا لبعض..وأنا نفسى يجمعنى بيكى بيت..يالهووووى..أنا خلاص ياسها مبقتش قادر. إحمر وجهها خجلا وهي تقول: خلاص يانبيل هانت..أصبر شوية. قال نبيل: ما أنا صابر أهو..هو أنا إتكلمت؟ ضحكت سها برقة..ليتنهد نبيل قائلا: ضحكتك حلوة أوى ياسها. إحمر وجه سها خجلا وهي تنظر إلى وجه لين الحائر لتقول بإرتباك: طيب أنا ..يعنى..هقفل معاك دلوقتى..وهبقى أكلمك بعدين..سلام. إبتسم قائلا: سلام. أغلقت الهاتف..لتقول لها لين بلهفة: ها ..إيه الأخبار؟ إبتسمت سها قائلة: العربية هتيجى تاخد مؤيد الساعة عشرة الصبح..متقلقيش ..كل حاجة زي ما طلبتيها بالظبط. تنهدت لين بإرتياح وهي تتراجع فى مقعدها تلمع عيناها بقوة قائلة بإبتسامة: كدة حلو أوى..باقى ساعات ونبتدى اللعب بجد..وياأنا ياإنت يامؤيد ياحسينى. ******************** كانت جورية تجلس فى الحديقة ..تمسك دفتر رسوماتها..ترسم على تلك الورقة ملامح خالد..وهو يودعها فى المطار فى آخر لقاء جمعهما..نظرت إلى تلك الصورة بحنين إلى مالك فؤادها الذى تجسد الصورة ملامحه وكأنها حية..ليست فقط كملامح ولكن كتعبير وشعور أيضا..لتمد يدها وتقطع تلك الصورة من الدفتر..تمسكها بين يديها..تلاحظ نظرته إليها والتى حملت الكثير من المشاعر..تبا.. كم تجعلها تلك النظرة تتوق إليه..وتشعل قلبها قلقا عليه أيضا..خاصة وأن ليلة لا ترد على مكالماتها منذ أيام..وكذلك فراس..تخشى بكل ذرة فى كيانها أن يكون مكروها قد أصاب خالد أو أصاب أخته ليلة وهي بعيدة عنهما لا تدرى ماذا يحدث لهما..تمتمت بألم: وحشتنى أوى..وغصب عنى مش قادرة أجيلك..خايفة ..معرفش ليه؟ لتمد يدها تمسح بسبابتها على ملامحه بالصورة قائلة بعشق: ياريت كان المكان غير المكان والزمان غير الزمان..مكنتش هبعد عنك أبدا ياخالد..لكن دلوقتى غصب عنى لازم أبعد وغصب عنى هقطع صورتك بإيدى وأمحيك من حياتى كمان. كادت أن تقطع الصورة إلى نصفين..حين إستوقفتها يد رجولية وضعت على يدها..وصاحبها يقول بصوت حنون: وأهون عليكى برده؟ إنتفضت جورية تنظر إلى الخلف بصدمة لتنهض ببطئ وهي تراه يقف أمامها ..يطالعها بشوق..بعشق ظهر فى ملامحه..لتتأمله بدورها فى شوق..مالبثت أن نفضته عنها وهي تتمالك نفسها قائلة: خالد. إبتسم قائلا: قلب خالد. تلفتت حولها بسرعة ترى إن كان أحد غيرهما فى المكان أو كان جدها بالقرب منهما..وعندما تأكدت من خلو المكان من الناس..نظرت إليه بسرعة قائلة: إنت لازم تمشى بسرعة من هنا..أنا مش عايزة جدى يشوفك هنا. جلس خالد على الكرسي أمامها قائلا بإبتسامة كبيرة: بس أنا عايزه يشوفنا..أنا أصلا جاي مخصوص عشانه. عقدت جورية حاجبيها بحيرة قائلة: قصدك إيه..أنا مش فاهمة حاجة؟ إبتسم وهو يتراجع فى مقعده يضم كلتا يديه خلف رأسه مغمضا عينيه قائلا بإسترخاء: قصدى واضح ياجورى..أنا جاي النهاردة لجدك مخصوص.. ليفتح عينيه وهو يهز حاجبيه صعودا وهبوطا..مستطردا بإبتسامة واسعة: عشان أطلب إيدك منه ياحبيبتى. لتتسع عينا جورية فى.... صدمة. ******************** قال مؤيد بحزن: يعنى برده مصمم متسافرش معايا يانبيل؟ قال نبيل: إنت عارف يامؤيد ..حياتى كلها بقت هنا..شغلى ..وسها..مبقاش ينفع أسافر تانى ياصاحبى. اومأ مؤيد برأسه قائلا: ربنا يوفقك يانبيل..عموما ابقى طمنى عليك واعزمنى على الفرح..أكيد هاجى. قال نبيل بإبتسامة: وفرحى مش هيكون فرح من غيرك يامؤيد..أكيد هستناك ياصاحبى..بس إنت ليه محسسنى إنى مش هشوفك قبل ما تسافر ..ماأنا هجيلك اسكندرية بس لما أشوف والد سها عايزنى ليه. قال مؤيد: عادى يانبيل ..أهو بودعك إحتياطى جايز متعرفش تجيلى إسكندرية. قال نبيل: لأ جايلك متقلقش..هتوحشنى ياصاحبى. إحتضنه نبيل فضمه مؤيد بدوره قبل أن يبتعد عنه مؤيد و يصعد إلى السيارة..ملوحا له بإبتسامة لتبتعد السيارة بسرعة. أطرق مؤيد برأسه حزنا..يعلم أنه يبتعد عن كل أحبته وكل من إهتم لأمرهم..فى البداية لين ثم ريم..والآن نبيل..ليتساءل فى صمت ..هل قراره بالهروب من الماضى هو قرارا صائبا؟أم أنه يحتاج إلى إعادة حساباته من جديد..ربما عليه العودة و التريث فى هذا القرار ..أو ربما عليه المضي قدما فيما إنتوى أن يفعله..زفر بحنق..فالآن لا يدرى ماذا يفعل؟رفع رأسه ينظر من نافذة السيارة..ليعقد حاجبيه بشدة عندما إتضح له أن هذا الطريق لا يؤدى إلى الإسكندرية ..مطلقا ..ليقول للسائق بحدة: إنت واخدنى على فين ؟ توقف السائق بالسيارة على جنب ثم أزال قبعته.. ليتهادى شعرها الأحمر الناري خلف ظهرها وهي تلتفت إليه قائلة بإبتسامة: على الجنة ياحبيبى. إتسعت عينا مؤيد فى صدمة وقبل أن يستوعب تلك الصدمة..وجدها توجه علبة إلى وجهه لينطلق منها رذاذا..جعل الدنيا تلف من حوله..ليتفوه بإسمها فى ضعف..قبل أن تسود الدنيا من حوله تماما..لتتأمله هي بإبتسامة حانية قبل أن تنطلق بسرعة إلى وجهتها. .................... الفصل الواحد والثلاثون لن أعود... عجبًا لحنين قتال، في القلب توًا مولود من خلف أنيني يراقبني، من جوف الأمل المسدود و خيال خصب يغرقني، يغريني بالعود المحمود كم كانت تسبر غاياتي، بخطيئة جرم مشهود و عبير شذاها يراودني، بخليطة عطر مورود لكن خيانتها توخزني، قد سفكت قلب بجحود جاءت قاتلتي تطلبني، هيهات تحرك جلمود لن أعود بقلم إيهاب سليمان **************** قالت جورية بجزع: تطلب إيدى من جدى إيه بس؟مش هيرضى طبعا..إنت ناسى إنك متجوز؟ رمقها خالد بإبتسامة هادئة دون أن ينطق بحرف..لتضرب بقدمها الأرض فى حنق قائلة وهي تذهب إليه تسحبه من ذراعه لينهض معها وهي تقول: إنت دلوقتى تقوم تمشى من هنا قبل ما حد يشوفك..مفهوم؟ لتتجه إلى بوابة المنزل تسحبه وراءها وهي تستطرد قائلة: وعشان خاطرى متجيش هنا تانى..أنا ياسيدى مش موافقة على جوازنا..مبحبكش ولسة بحب فهد..إرحمنى بقى ياخالد. توقف فجأة ليوقفها معه..إلتفتت تنظر إليه لينظر إلى عمق عينيها قائلا: بصى فى عينية وقوليلى تانى إنك مبتحبنيش. نظرت إلى عيونه تشعر بالتيه..لا تجد فى نفسها القدرة على نطق تلك الكلمات..ليبتسم بداخله وهو يمسك بيدها..يرفعها إلى ثغره يقبلها مغمض العينان ثم أنزلها وهو مازال متمسكا بها..يفتح عيناه يواجهها بنظراته الغائمة وهو يقول بمشاعر ظهرت فى نبراته: لو إنتى فعلا مبتحبنيش زي ما بتقولى..طب فسريلى رعشة إيدك جوة إيدى دلوقتى.. ليمد يده الحرة ويضعها على خافقها مستطردا: وفسريلى كمان نبض قلبك اللى زاد مع نبض قلبى فى اللحظة دى. كادت جورية أن تذوب عشقا لهذا الرجل..تضرب عرض الحائط بكل قرارتها وتستسلم لعشقه لتندفع إلى حضنه فى التو واللحظة لتشعر بالإكتمال ..ولكنها تركت يده وتراجعت خطوة إلى الوراء وسط حيرته..تبتلع ريقها بصعوبة ..ثم تنظر إلى عينيه بثبات قائلة: مفيش حاجة من اللى بتقولها حقيقية..كلها أوهام فى دماغك بتحاول تقنع بيها نفسك عشان تفسر رد فعل طبيعى من واحدة بيقرب منها راجل. أمسك خالد كتفيها يقربها منه فجأة..يهمس أمام شفتيها قائلا بحدة: بس أنا مش أي راجل وإنتى عارفة. ليتأمل ملامحها القريبة جدا منه لتلين نبراته وهو يقول بعشق: أنا الراجل اللى بيحبك وإنتى بتحبيه ياجورى . لفحتها أنفاسه فغمرتها عشقا..حاولت الإبتعاد عنه فلم تستطع..أغمضت عيناها تخفى ملامحه التى تسحرها..وتزلزل كيانها الذى يضعف الآن بين يديه..ولكن تبدلت صورته فى عيونها لصورة ريم فوجدت لديها القوة لتدفعه بعيدا قائلة: قلتلك..مبحبكش..مبحبكش. زفر بقوة وهو يجول بناظريه فى الحديقة يمرر يده فى شعره بعصبية فلقد كاد منذ لحظة واحدة أن يقبل ذلك الثغر الذى ينطق الآن بالأكاذيب..لتتوقف عيناه عند تلك النقطة ويعقد حاجبيه بشدة ..فهناك وبين الأشجار يوجد كوخ..أدرك أنه مألوف لديه وبشدة..ليقول بحيرة: الكوخ ده بتاع مين؟ أغمضت عينيها بقوة ثم فتحتهما مجددا تقول بثبات: بتاع البواب..من فضلك ياخالد إمشى بقى قلتلك..متعمليش مشاكل مع جدى..ده لسة قايم من أزمة قلبية وأنا خايفة عليه. تجاهل كلماتها كلية وهو يتجه إلى الكوخ..لتتبعه جورية وهي تدعوا الله أن لا يذكره هذا الكوخ بشئ آخر..ليتوقف خالد أمام الكوخ وصور تتراءى له..وتتوالى فى عقله..ليغمض عيناه ويدعها تتدفق إليه..يرى من خلال تلك الصور قصة لرجل يشبهه..ولكنه أكثر بساطة وسعادة ..ورأى أن هذا الرجل عاشقا لحبيبته..يكتب عنها كلمات العشق كل ليلة ثم يمزقها ولا يمنحها إياها..يرى جورية ترتب منزله..يراقبها من تلك النافذة الصغيرة بعشق ملك جوارحه..ثم رآها وسط النيران..وهو ينتشلها منها..مسرعا. إلتفت ينظر إليها عاقدا حاجبيه ثم إقترب منها يمد يده ويرفع جانب شعرها الأيمن ليرى أثر ذلك الجرح الذى أدرك مكانه على الفور وكأنه رآه من قبل..ليبعد يده عن شعرها وهو ينظر إليها فى دهشة قائلا: أنا إزاي عارف مكان الجرح ده وعارف سببه كمان ..وإزاي بشوف أدامى دلوقتى قصة حب عشتها وياكى مكنتش فاكر منها غير ملامح باهتة ودلوقتى بقت واضحة ..وإزاي قادر أوصف الكوخ من جوة وكأنى شفته قبل كدة وعشت فيه؟ أطرقت برأسها ليتأملها للحظة قبل أن يلتفت مقتربا من الكوخ ..ليدخله.. وتتبعه جورية مضطرة فى صمت وهو يقول: عارف إن فيه سرير وطرابيزة صغيرة وكرسيين..ومطبخ وحمام ..ودفاية فى الركن الشرقى من الكوخ. دار بعينيه فى المكان ليجد كل شئ كما قال تماما..ليلتفت إليها قائلا: مينفعش دلوقتى تسكتى ياجورى..لازم تتكلمى وتفسريلى اللى بيحصلى ..عيونك كانت دايما بتقولى إن عندك تفسير لكل اللى بيحصل ده.. أطرقت برأسها تخفى عنه عيونها..تود من كل قلبها لو تخبره ولكن ما يمنعها هو وجود ريم وشاهيناز فى حياة حبيبها..تخشى أن يتذكر فيتخلى عن زوجته وتدمر أسرته التى لاذنب لها حين أحب عائلها ، وهو فى حالة من النسيان.... وجدت صوتها لتقول بضعف: تناسخ أرواح زي ما بتقول..متحاولش تدى الأمر أكبر من حجمه ياخالد. لترفع عيونها إليه قائلة: إرجع لبيتك ولعيلتك وإنسى المكان ده خالص وإنسى كمان سكانه. إلتمعت عيناه وهو ينظر إلى نقطة ما بجانب السرير ..ليقول بثبات: لأ مش تناسخ أرواح ياجورى..أنا كنت عايش هنا معاكى ..والدليل على كدة هناك أهو ... ليتجه إلى الكومود القابع بجانب السرير يأخذ شيئا من عليه..يرفعه أمام وجهها لتبتلع جورية ريقها بصعوبة..تدرك الآن أن أمرها قد كشف للتو..وأنها على وشك الإعتراف بكل شئ. ******************** إستيقظ مؤيد يشعر بوجع فى رأسه..ليفتح عينيه ببطئ..ينظر إلى محيطه..إتسعت عيناه بقوة..وهو يدرك أنه فى هذا المنزل الذى إختطف فيه لين من قبل..ليتذكر مختطفته الصهباء..ويعقد حاجبيه بشدة يتساءل كيف عرفت الطريق إلى هذا المكان..وكيف أحضرته إلى هنا...ولماذا؟ أفاق من أفكاره على صوت دخول لين إلى الحجرة..تبتسم برقة قائلة: حمد الله على سلامتك يامؤيد.. ليدرك أنها تقتبس كلماته التى قالها لها فى موقف مماثل..وهي تستطرد قائلة: نورت بيتك ياحبيبى..ياريت الإقامة فيه تعجبك بجد..ما هي لازم تعجبك ..لإنك هتنورنا هنا ...كتير. نظر إليها قائلا بسخرية: طول عمرك تلميذة شاطرة يالين وبتقدرى تبهرينى..بس ممكن أعرف إيه هدفك من اللعبة السخيفة دى؟ تجاهلت سخريته اللاذعة وهي تقول بإبتسامة: تحب تاكل إيه على الغدا النهاردة؟يلا..أطلب وإتمنى..انا اللى هطبخلك زي زمان..فاكر زمان يامؤيد؟ إختفت ملامحه الساخرة لتحل مكانها القسوة وهو يقول بحدة: قول للزمان إرجع يازمان..زمان كنت فاكرك حاجة وطلعتى حاجة تانية خالص..زمان كنت بحبك ..دلوقتى مش فارقة معايا ومتهمنيش على فكرة..أنا مش هستنى هنا لحظة واحدة..وهمشى حالا ..مفهوم؟ نظرت إليه لين للحظات قبل أن تقول بثبات: مستنى إيه؟إتفضل إمشى. عقد حاجبيه وهو ينظر إليها للحظات قبل أن يتجه للخارج بخطوات غاضبة..أوقفه صوتها وهي تقول بسخرية : بس هتروح ماشى.. إلتفت إليها لترفع يدها بالمفاتيح تلوح بهم قائلة: لإن مفاتيح العربية معايا أنا. قال فى برود: هاتى المفاتيح يالين. إبتسمت بهدوء قائلة: مش هجيبهم يامؤيد..العربية دى أنا اللى مأجراها ومأجراها عشان أروح بيها الحتة اللى أنا عايزاها..والحقيقة أنا حابة أقعد هنا..إنت اللى عايز تمشى..تمام ..إمشى. أصابه الحنق ليقول بتهديد: لين..قلتلك تنسى لعبتك السخيفة دى وتدينى المفاتيح عشان أمشى..أنا ورايا طيارة بكرة الصبح ولازم أخلص كل حاجة النهاردة قبل ما أسافر. قالت لين بهدوء: الظاهر الطيارة هتفوتك يامؤيد لإنى مش هسمحلك المرة دى تبعد من غير ما أقولك على كل اللى فى قلبى..و.... قاطعها مؤيد قائلا بغضب: وأنا مش عايز أسمعك ..مش عايز..وزي ما حرمتينى من فرصتى زمان ..هحرمك من فرصتك دلوقتى..أنا خلاص مبقتش عايز أي حاجة تربطنى بيكى وكلامك مش هيفرق معايا فى حاجة..غير إنه هيقلل من صورتك فى نظرى..لإنك فى نظرى مش هتكونى أكتر من واحدة بائسة بتشحت الحب من واحد خلاص كرهها ومبقاش طايق يشوفها. رغما عنها..أغروقت عينا لين بالدموع تشعر حقا بأنه يعنى كلماته..لقد كرهها بالفعل وفات الأوان على إصلاح مابينهما..تبا كم يؤلمها هذا ..شعر مؤيد بالندم على كلماته الجوفاء..وكاد أن يتراجع عنها ولكنه خشي ضعفه ليقول بصوت حاول أن يجعله باردا فلم يستطع وخرج مهتزا رغما عنه وهو يقول: المفاتيح. مدت يدها إليه بهم ليأخذهم بهدوء..ثم يلتفت مغادرا ولكنه ما لبث أن توقف وهو يستدير إليها قائلا: مش هتيجى معايا أوصلك؟ هزت رأسها نفيا قائلة بصوت مخنوق بالعبرات: ملوش لزوم..أنا حابة أقعد شوية ..وكدة كدة كانت سها جايالى آخر النهار ..هستناها. هز رأسه بهدوء ثم غادر بخطوات سريعة..لتترك لين دموعها تتساقط بغزارة على وجنتيها..تشعر بالألم لفقدانه ربما للأبد..فقد أغلق كل السبل فى وجهها حين أخبرها أنها تشحذ الحب منه وأنه يكرهها..حقا كم هو مؤلم ذلك الشعور الذى ينتابها الآن..وهي تسمع صوت إنطلاق السيارة تعلن رحيل مؤيد عن حياتها تلك المرة للأبد..ولكن مع ضيق تنفسها ..أدركت أن هذا الألم الذى تشعر به فى صدرها ليس ألم نفسي بل هو ألم حقيقي..إهتزت وكادت تسقط..ولكنها تحاملت على نفسها لتصل إلى حقيبتها وتأخذ منها دواءها..ولكنها ما إن غادرت الحجرة حتى سقطت أرضا ولم تعد قدماها قادرتان على حملها لتدرك أنها الآن فى طريقها لفقدان حياتها ..لم يؤلمها أن ترحل عن تلك الدنيا فبعد رحيل مؤيد لا يوجد سبب لتعيش من أجله ولكن ما آلمها أنها حين حانت لحظة موتها لم تكن كما تمنت دائما..بين أحضان حبيبها.....مؤيد. ******************** نظرت جورية إلى هذا الخاتم الفضي ذو الفص الأزرق اللامع والذى يشبه فى لونه لون عيون صاحبه..تلعن غبائها الذى جعلها تترك خاتمه على الكومود فى زيارتها الأخيرة للكوخ الذى جددته بنفسها بعد الحريق..ليعود كالسابق تماما..ذلك الخاتم خاصته والذى أهداه إياها ليلة رحيلة منذ ما يقارب من أربعة سنوات..إنتفضت على صوت خالد وهو يقول: الخاتم بتاعى بيعمل إيه هنا ياجورى؟..جاوبينى ..ردى علية. إنهارت جورية كلية وعيونها تغشاها الدموع..لتجلس على السرير خلفها..تطرق برأسها ..وهي تقول من بين دموعها المتساقطة: إنت اللى إديتهولى ليلة ما سافرت من أكتر من ٣ سنين..وقلتلى إنك بالخاتم ده بتربطنى بيك طول العمر..وإنى أحتفظ بيه لغاية ما ترجع وألبسهولك وإنت بتلبسنى دبلتك. رفعت إليه عيناها تنظر إلى تلك الصدمة على ملامحه لتومئ برأسها قائلة بمرارة: أيوة إنت فهد..خطيبى وحبيبى..قابلتك من سنين..فى مستشفى الوادى..كنت عامل حادثة و فاقد الذاكرة..سميتك فهد وجبتك هنا المزرعة..وإشتغلت فيها..وواحدة بواحدة قربنا من بعض بس عمرنا ما حكينا لبعض عن مشاعرنا لغاية قبل ما تسافر بيومين ..الكوخ اتحرق وانت أنقذتنى وساعتها إعترفتلى بحبك وطلبت إيدى من جدى..بس كان لازم عشان نتجوز تجيب ورق يثبت هويتك..سافرت مصر لظابط عرفته هنا فى الوادى ومن ساعتها مرجعتش..عشت على أطلال حبك..وبعدين بدأت أألف روايات وأحط عليها صورتك..وجوة الروايات دى كانت هناك حاجات من مواقف ياما حصلت بينا..لغاية ما قابلتك من تانى..وإنت عارف الباقى. تأملها للحظات يدرك أن كلماتها تفسر له كل مامر به معها..ذكرياته معها والتى تتراءى له من وقت لآخر..مشاعره تجاهها منذ اللحظة الأولى للقاءهما من جديد والتى تجددت تلقائيا عندما تقرب منها..كل ما رآه فى عينيها وإحتار دوما فى تفسيره فقد تباينت مشاعرها ما بين عشق وشوق..عتاب وخوف..ألم دفين لم يفهم سببا له سوى الآن..وهو يشعر بألمها فى صدره..يهتز جسدها باكيا فيزلزل أركان قلبه حزنا..تتناهى إليه شهقاتها فيجد نفسه متقدما منها على الفور جاثيا على ركبتيه أمامها..ممسكا يديها لترفع عيونها إليه..عيون رغم حزنهما وتلك العبرات العالقة برموشها..إلا أنهما سحرتاه ليتأملهما قائلا بحنان: وليه خبيتى علية ؟ليه مصارحتنيش؟ قالت بصوت متهدج: عشان خفت..خفت تفتكر مشاعرك ناحيتى..وتأثر على حياتك وعيلتك. إبتسم قائلا: أولا جوازى كان منهار من الأول..وكدة كدة مكنتش هكمل فيه..سواء حبيتك أو لأ..خصوصا بعد اللى عرفته ..ثانيا ..من غير ما إفتكر كل اللى كان بينا فأنا وقعت فى حبك من جديد..وجه الأوان عشان أمشى ورا قلبى بعد ما مشيت ورا عقلى كتير. نظرت إليه فى حزن قائلة: مش هينفع..على الأقل عشان خاطر ريم. ترك يدها وهو يقف قائلا فى حنق: إنت ليه مصممة تحسسينى إن الناس كلها عندك أهم منى؟..ريم..شاهيناز..طب وأنا ..ومشاعرى وحبى ليكى..كل ده ملوش قيمة فى نظرك. نهضت بسرعة تمسك يده بيدها قائلة: إنت فاهمنى غلط..أنا مفيش فى الدنيا دى كلها حد أهم عندى منك..أنا عمرى ما حبيت غيرك ولا ممكن هحب حد أكتر منك. ضم يدها بيده بمشاعر حب جلية واضحة على محياه..لتستطرد قائلة: أنا لو خفت أفرقك عن عيلتك فمش عشانهم أكتر ما هو عشانك لإنى عارفة ومتأكدة إنك مش هتكون مبسوط..ولا مرتاح وإنت بعيد عن ريم.. إبتسم خالد قائلا: من الناحية دى إتطمنى خالص..المشكلة دى لقيتلها حل خلاص. عقدت جورية حاجبيها قائلة: حل إيه ده؟ إنتفضا سويا على صوت الجد الصارم وهو يقول من خلفهما: أنا كمان عايز أعرف..حل إيه ده؟ إلتفتا إليه سويا..يطالع خالد جدها بنظراته القوية الثابتة..بينما حاولت جورية أن تسحب يدها من يد خالد فلم تستطع وقد تمسك بها أكثر..ليقول خالد بثبات: أنا طلقت شاهيناز. نظرت إليه جورية فى دهشة..بينما لانت ملامح الجد قليلا..لينظرا إليه سويا فى جزع وهو يقول مستطردا: أنا عايزكم تعرفوا حاجة كمان..ريم هتفضل فى رعايتى..لإن للأسف..شاهيناز ماتت. ******************** إبتسمت ليلة وهي تطالع ريم التى تلهو فى الحديقة بحنان..قبل أن تلتفت إلى فراس الجالس بجوارها على تلك الأرجوحة الموجودة بالحديقة..يطالع هاتفه ويكتب رسالة إلى أحدهم..لتقول برقة: تفتكر طلب منها الجواز ولا لسة؟ نظر إليها فى حيرة قائلا: هو مين ده؟ قالت ليلة بحنق: ركز معايا يافراس وسيب الموبايل من إيدك..هيكون مين يعنى؟..خالد طبعا. إبتسم وهو يغلق هاتفه قائلا: وآدى التليفون ياستى قفلته..أما بقى من خلال معرفتى بجورى وخالد أخوكى فأحب أطمنك..وأقولك إننا هنتجوز ونخلف وهم لسة معترفوش لبعض بمشاعرهم أصلا. هزت رأسها نفيا قائلة: معتقدش..إنت مشفتش النظرة اللى كانت على وش خالد وهو مسافر..نظرة واحد بيحب وقرر خلاص يهد كل الحواجز اللى بينه وبين حبيبته..ده غير إنه بقى حر وده هيسهل كل حاجة بالنسبة له. أومأ فراس برأسه قائلا: معاكى حق.. ليلاحظ إنحسار شالها عنها..ليقوم بضمه عليها قائلا بحنان: ما تيجى تطلعى أوضتك أحسن ..الجو برد وده غلط عليكى..ولا الحب مدفيكى؟ وكزته قائلة فى خجل : بس بقى يافراس . تنهد فراس قائلا: قلب فراس وربنا..المهم قوليلى ياشرلوك هولمز..تفتكرى جورية هتقوله على ماضيه معاها؟ عقدت ليلة حاجبيها قائلة: دى حاجة بقى أعتقد هتترهن بالظروف ..يعنى لو خالد افتكر حاجات كمان أكيد هتقوله..لكن لو ما ألحش فى إنه يلاقى تفسير لذكرياته معاها واللى بتلاحقه من يوم ما رجع..يبقى جورى هتحط الماضى ورا ضهرها وهتبتدى مع خالد صفحة جديدة. تأملها فى حب قائلا: إنتى إزاي بتجمعى بين كل شئ ونقيضه بالشكل ده؟..العقل والرومانسية..المنطق والخيال..خدتى قلبى بشخصيتك الفريدة ..ومش عارف ألاقى حدود لإعجابى بيكى وقوة مشاعرى من ناحيتك..أنا بحبك أوى ياليلة. أطرقت ليلة رأسها بخجل ليقول بإبتسامة: طيب مفيش وأنا كمان بحبك يافراس. هزت رأسها نفيا وهي مازالت مطرقة الرأس بخجل ليمد يده إلى ذقنها يرفعها لتتواجه عيناها مع عينيه ..قال برقة: أوعى تانى تخبى عيونك عنى..عيونك دول حبايبى..واللى نظرتهم لية بتحيينى ياليلتى. تاهت ليلة بين ثنايا عينيه..تدرك أنها تذوب عشقا..لتتنحنح قائلة: إحمم..هي..لين فين؟ إبتسم يدرك تهربها منه لخجلها ليقول بهدوء: مش إنتى قلتيلى إنها خرجت من الصبح بدرى عشان وراها مشوار مهم. ضربت بيدها على رأسها بخفة قائلة : صحيح..إزاي نسيت بس؟ إبتسم قائلا: اللى آخد عقلك يتهنى بيه ياليلة. إبتسمت تقول فى نفسها..يارب فأنت يافراس من أخذ عقلى وقلبى معا...ليقول فراس : بس صحيح..لين راحت فين؟ نظرت إليه ليلة قائلة بغموض: مشوار مهم أوى..هتصلح فيه غلطة كبيرة غلطتها زمان..ويارب تلحق تصلحها قبل فوات الأوان. ******************** كان مؤيد يقود سيارته بإتجاه المدينة..يشعر بالإختناق..فلديه يقين بأنه يرتكب خطأ جسيما بهروبه ذاك وإبتعاده عنها..نعم لقد أخطأت ولكنها إعتذرت..ربما لم يثق بها وبشعورها بالندم من قبل ولكن إختطافها له..هو خير دليل على ندمها وتمسكها به..لما لم يستمع إلى ما لديها لتقوله؟لما لم يجاريها فى لعبتها ؟هل خشي أن يضعف..تبا ..فليضعف..بل وليدع حصونه تنهار..فما لديهما يستأهل إنهيار تلك الحصون..لديهما قصة عشق يعلم كليهما أنها تمر فى العمر مرة واحدة..فرصة واحدة للسعادة..فإن عبرت ولم يقتنصاها..ذهبت بلا رجعة..وأصبحا تعيسان للأبد..كلا..لن يترك فرصته فى السعادة تضيع من بين يديه..سيعود وسيمنحها تلك الفرصة التى أرادتها..يدرك وبكل قوة أن الحياة معها وشبح الخوف يرفرف على علاقتهما..أفضل ألف مرة من حياة بلا نبض أو روح قد يعيشها بدونها..لينحرف بسيارته بسرعة فى الإتجاه المعاكس..يقود بأقصى سرعة بإتجاه هذا المبنى القديم والذى تمكث فيه حبيبته..ليصل فى دقائق معدودة..إندفع إلى الداخل..يسرع إلى تلك الحجرة التى تركها بها..ليتوقف متجمدا..تتوقف نبضاته بجزع وهو يراها هناك..أمام الحجرة ملقاة على الأرض مغمضة العينين..شاحبة الوجه تماما.....كالموتى. الفصل الثانى والثلاثون وهذا الذى بيننا واد صغير بين جبال شاهقة .. يوماً يجف ويوماً تنحدر بين جنباته سيول جارفة .. يوماً تذبل ورود خريفه ويوماً بين تصدعات جباله تجد الورود مبتسمة مفعمة بالحياة وناعمة .. وهذا العشق إنما لغزاً يكبر ويكون يافعاً قوياً كلما ضربته العاصفة ... بقلم حنان صلاح *************** لا يدرى مؤيد كيف نفض عنه صدمته وجزعه وهو يسرع إليها فى ثوان..يجثو على ركبتيه بجانبها..يرفع الجزء العلوى من جسدها عن الأرض..يسنده بإحدى ذراعيه بينما بيده الحرة يضع إصبعيه السبابة والوسطى على العرق البارز فى عنقها..ليزفر بقوة وهو يشعر بخفقاتها..حتى وإن كانت ضعيفة بعض الشئ فالأهم أنها حية..فتحت عيونها ببطئ لتطالعه..ليقول لها مؤيد بلهفة وعيون إمتلأت بالقلق والإضطراب: أنا لازم أنقلك المستشفى حالا يالين. إبتلعت ريقها بصعوبة وهي تقول بضعف: ملوش لزوم..لو سمحت بس.. هاتلى.. شنطتى..جواها الدوا..ومتجيبش ..مية. عقد حاجبيه لايدرى عما تتحدث ولكنه تركها برفق وذهب بسرعة إلى الردهة يبحث عن حقيبتها حتى وجدها..ليسرع بها إليها ويجثو على ركبتيه مجددا يمنحها الحقيبة بعد أن فتحها..لتسحب من الحقيبة علبة من الدواء تأخذ منها قرصا ..تضعه فى فمها على الفور..يتابعها مؤيد بقلق ينهش أحشائه ..يتساءل عن هذا الدواء الذى ما إن أخذته لين حتى عاد بعض اللون إلى وجهها..وأصبح تنفسها أكثر إنتظاما ..ليحملها بين يديه ويدخل بها إلى الحجرة..يمددها على السرير ..إبتعد عنها ولكنه لم يبارح المكان قربها..يتأملها بملامح قلقة..أدركتها..لتدرك من تلك الملامح أنه مازال يحمل لها فى قلبه شيئا..ربما بعض مشاعر من الماضى لتقرر أن تبوح له بمكنون قلبها..حتى وإن شحذت منه الحب والإهتمام كما قال..فهذا أهون من فراق لن تحتمله..وكاد أن يق*تلها..أفاقت من أفكارها على صوته وهو يقول لها بتوتر: بقيتى أحسن؟ أومأت برأسها بهدوء..ليستطرد قائلا: كان مالك يالين وإيه الدوا اللى أخدتيه ده؟ أطرقت برأسها قائلة بضعف: ده دوا الدكتور وصفهولى عشان أقدر أتنفس. قال لها وقلبه يتوجس خيفة من كلماتها: وليه محتاجة الدوا ده؟ رفعت إليه عيناها تقول بتوتر: بعد ما إنفصلنا ..إنهرت نفسيا وإضطريت أدخل المصحة. إتسعت عيناه بشدة..ليردد قائلا بصدمة: مصحة؟؟ أومأت برأسها بهدوء ثم قالت: مكنش جنبى حد ساعتها يقوينى على محنتى..خالد وكان مختفى..ليلة وفى دراستها ورواياتها..حتى سها صاحبتى كانت مشغولة أيامها بمرض والدتها..إحساسى بالوحدة والخيانة دمرنى وإبتدت تظهر علية أعراض حالة نفسية عاملة زي الفوبيا..الحالة دى كانت بتأثر على قلبى..أول ما أتوتر أو أزعل جامد تزيد دقاته أوى ويوجعنى صدرى وأحس إنى مش قادرة أتنفس..وللأسف الدكتور قاللى إن ممكن الحالة النفسية تأثر فعلا على القلب وساعتها .... تركت الجملة معلقة ليإن قلب مؤيد من تخيله لهذا المصير..يتمزق حزنا على محبوبته التى عانت وحدها ولم يكن بجوارها ليساندها..لتستطرد لين قائلة: الدوا ده أصبح بالنسبة لى شئ أساسى وضرورى عشان أقدر أعيش..مقدرش أمشى من غيره..لما بتجيلى الأزمة باخد الحباية وببقى كويسة. ظل مؤيد صامتا ..يستوعب كلماتها ..يتذكر تأكيد خالد عليها عندما إختطفها مؤيد على أنها تحتفظ بدوائها معها..إذا فقد كان يقصد هذا الدواء..دق قلبه بعنف..يخشى عليها من تلك الأزمة إن واجههتها وهي وحيدة أو غير مستعدة..كما كانت منذ لحظات..لينوى ان لا يفارقها قط ومنذ تلك اللحظة..إستطردت لين وهي تمد يدها تمسك يد مؤيد لينظر إلى كفها الصغير الذى تمسك بكفه..ثم عاد بنظراته إليها ..وهي تستطرد قائلة بندم: مؤيد..أنا عارفة إنى غلط فى حقك غلطة كبيرة وعارفة إنك مش هتسامحنى بسهولة..بس أنا بترجاك تدينى فرصة تانية..فرصة أقدر أثبتلك فيها إنى إتغيرت..وإنك تقدر تثق فية من جديد..أنا بموت فى بعدك يامؤيد..وإنت بس اللى فى إيدك تحيينى ب..... قاطعها بأن إقترب منها آخذا شفتيها فى قبلة طويلة تفاجأت بها وبقوة تلك المشاعر التى إنتقلت لها عبرها..فقد حملت لها قبلته شوقا إمتزج بألم وخوف من الفقد وعشق..بعتاب إمتزج بسماح وثقة..نعم ..ثقة فى القادم ، وفى أنها له..مهما حدث..هي له وستظل له طوال العمر..ليختتم قبلته واضعا جبهته على جبهتها قائلا وهو مغمض العينان..مضطرب الأنفاس.. مثلها تماما قائلا: من اللحظة دى..الماضى إنتهى..مفيش عتاب..مفيش فراق..مفيش زعل . ليبتعد عنها يرفع يديه يضم بهما وجهها وهو ينظر إليها بعشق قائلا: بحبك يالين..من أول مرة شفتك فيها ولحد النهاردة..مقلش حبى ليكى أبدا..وفى اللحظة اللى إتخيلت فيها إنك روحتى منى.. قررت..من اللحظة دى مش هسيبك تانى..وهتجوزك أول ماننزل القاهرة..لإن حياتى من غيرك متستاهلش تتعاش يالين. إبتسمت لين قائلة فى عشق: بحبك يامؤيد...بحبااااك. إبتسم وهو يعود لشفتيها ينوى تقبيلها مجددا لتضع إصبعها على شفتيه قائلة بمزاح: لأ حضرتك..كدة غلط..إنت فاجأتنى فى المرة الأولى بس المرة دى أنا مستعدة وبمنعك. عقد حاجبيه وهو يقول: بتمنعينى؟؟ إبتسمت قائلة فى دلال: طبعا بمنعك ..مش من حقك تبوسنى غير وأنا مراتك ياحضرة البيه المحترم. نهض يمد يده إليها قائلا بعيون لامعة: طب يلا بينا علطول ننزل مصر وهناك هنشوف أقرب مأذون ونتجوز. إبتسمت قائلة وهي تمد يدها تسحبه من يده لتجلسه مجددا وسط حيرته: المأذون فى الطريق يافندم..جايباه لحد عندك ومعاه الشهود كمان. عقد حاجبيه قائلا: قصدك إيه؟ إتسعت إبتسامتها قائلة: بصراحة كنت عاملاهالك مفاجأة يامؤيد ..الحقيقة نبيل دلوقتى فى الطريق ومعاه سها والمأذون والشاهد التانى على العقد..ما هو أنا مقلتلكش إن نبيل هو اللى عرفنى على المكان هنا بعد ما حكيتله انت عنه وهو اللى جابلى مفتاحه وهو صاحب إقتراح المأذون والجواز علطول..قال يدبسك بقى ويخلص..أصل سها مش راضية تعمل الفرح غير بعد جوازنا . قال مؤيد بدهشة: بقى كدة؟كل ده يطلع منك إنتى ونبيل. إبتسمت بخجل ليبتسم بدوره ثم تغيم عيناه وهو يقترب منها مجددا ولكنها أوقفته قائلة بلهجة تحذيرية: مؤياااد. إبتعد عنها على الفور وهو يزفر قائلا: صبرنى ياااارب. ******************** كان خالد يتمشى فى طرقات المزرعة يتأملها بعمق..كم تعجبه تلك المزرعة حقا..تحتاج فقط إلى بعض التعديلات وربما بعض التطوير وإضافة بعض الآلات التى قد تزيد من إنتاجيتها..ربما سأل الجد أن يساعده فى تطويرها..أو يشاركه إن أراد. الجد عزيز..إنه شخصية متناقضة تماما فى رأيه ولكنه لا ينكر أنه يزداد إعجابا بها يوما بعد يوم..فى البداية كان من حديث جورية عنه..ثم من مقتطفات تعود له منذ أن جاء إلى المزرعة البارحة..ربما لم يمنحه الجد عزيز ردا على طلبه الزواج من حفيدته ولكنه يراها فى عينيه ..فقط هو يؤجلها لسبب ما..فبعد أن إستمع إلى كلماته بالأمس ورأى ورقة طلاقه من شاهيناز وشهادة وفاتها والتى لم يذكر خالد ملابساتها فقد إكتفى بما يعرفه الجميع ماعدا مؤيد بالطبع..أنها قد تعثرت وسقطت فى النيل..وقتها نظر إليه الجد نظرة طويلة قبل أن يقول لحفيدته أن تعد له حجرة الضيوف بالمنزل..وعندما أراد خالد أن ينام بالكوخ..إكتفى الجد بأن قال: محدش من عيلتى بينام برة بيتى. إذا لقد إعتبره فردا من عائلته..موافقة ضمنية بالتأكيد على زواجه من جورية..وها هو منذ الصباح الباكر..يدور فى المزرعة..تتدفق إليه الذكريات..كلما مر من مكان..ولكن كفى ..عليه العودة فقد تعب وشعر بالجوع.. عاد أدراجه..ودخل من البوابة ليتوقف فجأة وهو يرى حبيبته تقف بجوار شجرة.. تمسك وردة فى يد..بينما تشب بجسدها لتلمس باليد الأخرى أوراق تلك الشجرة برقة..تتطاير خصلاتها الناعمة خلفها فتمنحها منظرا خلابا حبس أنفاسه..إقترب منها بهدوء..حتى أصبح خلفها تماما..لينطق إسمها بحنان..إرتبكت جورية وكادت أن تسقط ولكنه أسندها بذراعه..لتنظر إليه وقد تبعثرت أنفاسها من لمسته لظهرها ونظراته المركزة على ملامحها..لتعتدل بسرعة وهي تبتلع ريقها قائلة بصعوبة: خالد..كنت..كنت فين؟ إبتسم قائلا: وحشتك؟ وضعت خصلاتها خلف أذنها اليمنى وهي تطرق برأسها تهرب من نظراته قائلة بخجل: جدى اللى كان عايزك عشان تفطر معاه..ولما خالة جليلة خبطت عليك وملقتكش..أنا قلقت. مد يده يرفع ذقنها لتواجهه عيناها قائلا: فكرتينى سافرت مش كدة؟ قالت وهي تنظر إلى عمق عينيه لا تستطيع أن تحيد بنظراتها عنهما: فى البداية..بس خالتى جليلة قالتلى إن موبايلك ومفاتيحك على الكوميدينو..فإطمنت..وقلت أكيد بتتمشى. إبتسم قائلا: وإفرضى كنت سافرت؟ غشيت عيونها لمحة حزن أدركها ليقول على الفور: عموما أنا مستحيل هتنقل من هنا غير وإنتى مراتى ياجورى. إحمر وجهها خجلا..ليدرك أنه الآن يحتاج لكل قوته كي يتمالك نفسه حتى لا يقبلها بقوة فى تلك اللحظة..ليترك ذقنها قائلا بمزاح مفتعل : طيب فين جدك والفطار ده ؟..أنا ميت من الجوع على فكرة. وجدت صوتها لتقول بهدوء: الساعة ١١..جدى فطر من زمان مع خالتى جليلة.. نظر إلى عمق عينيها قائلا: طيب وإنتى..فطرتى؟ هزت رأسها نفيا قائلة بإبتسامة خجولة: لأ..مستنياك. قال بإبتسامة: طب يلا بينا. أومأت برأسها بهدوء وكادت أن تذهب معه حين توقف ينظر إلى الشجرة التى خلفها قائلا: أنا اللى زرعتها صح؟ أومأت برأسها بهدوء..ليبتسم قائلا: وكنتى معايا لحظة بلحظة. أومأت برأسها مجددا..ليتأمل وجهها بحنان قائلا: ذكرياتى معاكى بتمحى كل ذكرى وحشة فى ماضى قربت أنساه خلاص..ويحل محله كل حاجة حلوة عشتها معاكى ولسة هعيشها ياجورى. نظرت إلى عيونه فى عشق قائلة: ربنا يحلى كل أيامك ياخالد. تأملها للحظة قبل أن يزفر قائلا وهو يمد يده إليها: يلا ياجورى..يلا نروح نفطر..لإنى ثوانى ومش هكون مسئول عن تصرفاتى.. أدركت مايقصده لتمسك يده بسرعة ..إبتسم بهدوء ثم مشي وهي إلى جواره..لتتشابك أصابعهم وتتداخل كما تشابكت أرواحهم.. تماما. ******************** قالت لين لليلة فى حنق: أخوكى مبيردش..ومؤيد على آخره ..عايزنى أرجع معاه البيت وأنا مصممة مرجعش غير لما خالد يرجع وأستأذنه..أعمل إيه بس؟ إبتسمت ليلة قائلة: إهدى بس يالين..كلها النهاردة أو بكرة بالكتير وتلاقى أخوكى راجع وفى إيده عروسته وساعتها الفرح هيبقى فرحين وتلاتة كمان ياستى..صحيح مش هنقدر نعمل حفلة كبيرة نعزم فيها كل الناس بسبب موت شاهيناز..بس إحنا ميهمناش الناس..كل اللى يهمنا نكون مع اللى بنحبهم والمقربين لينا وبس. تنهدت لين قائلة: يارب ياليلة يارب..نفسى الفرح يدخل بيتنا بقى..تعبنا من الحزن ..بقالنا سنين مقهورين. تراجعت ليلة فى مقعدها قائلة بإبتسامة : الفرح خلاص من النهاردة دخل بيتنا ومش هيخرج منه تانى يالين. ******************** كانوا يجلسون على المائدة يتناولون طعامهم بصمت..حين قال الجد بهدوء: النهاردة زي ما إنتوا عارفين كتب كتاب علا وفايز..وأنا وعدت عابد يكون كتب الكتاب فى بيت المزرعة..مش هوصيكى ياجليلة انتى وجورى ..عايز كل حاجة تكون جاهزة..مفهوم؟ أومأوا برءوسهم..ليلتفت الجد إلى خالد الذى قال بهدوء : طب وبخصوص موضوعى أنا وجورى ياجدى..حضرتك لسة مردتش علية. نظر إليه الجد قائلا بغموض: هنلعب النهاردة دور شطرنج ولو كسبتنى هقولك ردى بعد كتب الكتاب.. أما بقى لو خسرت.... قاطعه خالد قائلا فى ثقة: مفيهاش لو..هكسبك ياجدى..هكسبك. إبتسم الجد بهدوء ثم ترك ملعقته وهو يقول : الحمد لله. نهض ولكن قبل أن يبتعد ..قال لخالد : إنت معاك بطاقتك صح؟ أومأ خالد برأسه قائلا: طبعا..لكن ليه بتسأل عنها؟ قال الجد بهدوء: حابب تكون شاهد على عقد الجواز. أومأ خالد برأسه متفهما ليقول الجد موجها حديثه لجورية: أنا جبتلك فستان عشان تحضرى بيه كتب الكتاب ياجورى..هتلاقيه على سريرك..ياريت يعجبك. إبتسمت جورية قائلة بسعادة: أكيد هيعجبنى ياجدى..ربنا يخليك لية. إبتسم الجد بحنان بينما تأمل خالد جورية بعشق وإبتسامتها تضئ وجهها وتجعلها أكثر جمالا..إلتقت عيناها بعينيه فى تلك اللحظة لترى نظرته إليها فأطرقت برأسها فى خجل..بينما قال الجد لجليلة بنبرة ظهر بها اهتمامه الواضح بها: إنتى كمان ياجليلة..فستانك على سريرك..يارب يعجبك. نظرت إليه جليلة فى دهشة قائلة: فستان لية أنا؟ إبتسم بهدوء وهو يومئ برأسه قبل أن يلتفت مغادرا..لتنظر جليلة فى إثره ومازالت ملامح الدهشة تعلو وجهها..لتقول لها جورية: أيوة بقى..فستان وحركات..جدى خلاص رفع الراية البيضا ياخالتى. وكزتها جليلة قائلة بحزم إمتزج بإبتسامة فرح لم تستطع إخفائها: إختشى ياجورى. ثم نظرت جليلة إلى خالد المبتسم ليحمر وجهها خجلا وهي تنهض لتصعد إلى حجرتها ترى هدية الجد لها..بينما قال خالد لجورية بإبتسامة هادئة: كدة كسفتيها؟ قالت جورية بإستنكار: وأنا قلت إيه بس؟ إتسعت إبتسامة خالد وهو يقول: مقلتيش حاجة ياستى..مش هتيجى بقى تورينى الفستان اللى هتلبسيه النهاردة عليكى؟ إتسعت عيناها بشدة قائلة: أوريهولك إزاي يعنى؟ قهقه خالد لتتوه جورية فى ضحكته الرائعة والتى تراها لأول مرة ..ليتوقف خالد عن الضحك قائلا فى مرح: مش عارف ليه مصممة تفهمينى غلط ياجورى..أنا بس عايز أشوف شكل الفستان ..وأشوف لو مكشوف من هنا أو من هنا...ساعتها طبعا مش هسمحلك تلبسيه ياقلبى. نهضت جورية قائلة بحنق: جدى مش هيجيبهولى مكشوف ياخالد..وأنا فاهماك كويس على فكرة. لتمشى من أمامه بخطوات حانقة..ليتناهى إلى مسامعها ضحكته الرائعة مرة أخرى..ليعلو ثغرها إبتسامة واسعة .....رغما عنها. ******************** كانت جورية تطمأن أن كل شئ جاهز من أجل عقد القران..تتأكد من أن الحديقة مزينة ومعدة لإقامة حفل بسيط من أجل العقد..لتبتسم براحة ..فلقد أحسن الجد بالفعل إختيار من أعدوا الزينة لذلك الحفل..فالحديقة أصبحت رائعة حقا..سمعت صهيل فرستها مهرة..بالتأكيد إفتقدتها..فلم تراها منذ الأمس..لتبتعد متجهة إلى الإسطبل..غافلة عن عينان كانت تتابعانها وعندما رآها صاحبهما تتجه إلى الإسطبل..تبعها بهدوء. ******************** قال نبيل بحنق: أنا نفسى أعرف إحنا لسة مأجلين جوازنا ليه ياسها؟مشكلة مؤيد ولين إنتهت خلاص..وكتبوا كتابهم وكلها يومين وخالد يرجع ويعملوا حفلة بسيطة يشهروا بيها جوازهم..إيه بقى اللى مخلينا لسة مأجلين؟ قالت سها بإبتسامة: على فكرة بقى..أنا كنت بتصل بيك أصلا عشان كدة..إنت بقى اللى دخلت فية شمال علطول ومستنتش تسمعنى. عقد نبيل حاجبيه قائلا: قصدك إيه؟ إتسعت إبتسامة سها وهي تقول: يعنى هات عمى وتعالى بكرة عشان تحددوا ميعاد الفرح يانبيل. ليدق قلب نبيل بقوة وترتسم على ملامحه أعتى مشاعر السعادة. ******************** مررت جورية يدها على عنق مهرتها قائلة بحنان: إنتى كمان وحشتينى يامهرة..معلش إنشغلت عنك بخالد..بس أوعدك مفيش حاجة تانية هتشغلنى عنك. مالت لها مهرة لتضع جورية جبهتها على جبهة فرستها وقد أغمضت عينيها..لتنتفض على صوت خالد وهو يقول: يابختك يامهرة.. نظرت إليه جورية تبتلع ريقها بصعوبة وهي تلاحظ إقترابه منها..ليبتسم وهو يلاحظ توترها..ليقول بهدوء: متخافيش ياجورى ..أنا وعدتك قبل كدة فى نفس المكان ده وأدام مهرة إنى مش هلمس شفايفك غير وإحنا متجوزين..وأنا لسة عند وعدى لإنى يوم ما هلمسك مش هسيبك ياجورى. أطرقت برأسها فى خجل: إنت إفتكرت ؟ إبتسم وهو يدرك إلى أين ذهبت بأفكارها ليقول فى خبث: بصراحة إفتكرت وإفتكرت طعم شفايفك بين شفايفى وإحساسى لما بوستك . إزدادت حمرة الخجل على وجهها لتتسع إبتسامته وهو يستطرد قائلا: عشان كدة أنا ماسك نفسى بالعافية عنك..لحد ما جدك يرضى عنى ويوافق على جوازنا. نظرت إليه بإبتسامة خجولة..تأملها بحنان..بعشق ملك جوارحه..ليضرب على رأسه بخفة يقول مستطردا: بمناسبة الكلام عن جدك..كان المفروض هلعب معاه دور شطرنج ونسيت خالص..أنا هروحله حالا..إدعيلى ياجورى. إبتسمت وهي تتابعه يغادر بسرعة قائلة: يارب تكسب ياخالد.....يارب. الخاتمة منحتنى حبا ..ثم زدتنى منحتنى حضنا .. به غمرتنى وداخل قلبك وبين جفونك أسكنتنى حتى حنانك لم تبخل به علي ..أخجلتنى فى الوادى إلتقينا......أحببتنى ثم نسيتنى إفترقنا وجمعنا القدر ثم إلى الوادى عدنا فتذكرتنى وهناك أسرتنى بعشقك ورقة كلماتك.....وحقا أسعدتنى. ***************** ولجت جورية إلى الحجرة التى توجد بها عروس الليلة..علا.. صديقتها القديمة والتى تزينها مختصة التجميل التى إستدعاها جدها خصيصا لتلك المناسبة..إلتفت الجميع لدى رؤية جورية بذلك الفستان الوردي والذى يضيق حتى خصرها ثم ينزل بتنورة واسعة مزينة بالورود حتى ركبتيها.. ليبرز جمالها الرقيق ..مع شعرها الذى رفعته على هيئة شنيون وتركت غرتها على جبينها..تكمل الصورة الجميلة زينة وجهها الرقيقة..فأعطاها مظهرها حقا إطلالة مميزة..لتقول خبيرة التجميل بإبتسامة: إيه الجمال ده كله ياآنسة جورية؟ إبتسمت جورية بخجل ..بينما قالت علا بإبتسامة واسعة: طول عمر جورى جميلة وزي القمر. إبتسمت جورية فى حب وهي تقول لعلا: الأجمل هو إنتى ياعروسة. إبتسمت علا قائلة: أنا مش عارفة أشكركم إزاي على كل حاجة عملهتوهالى ياجورى.. وآخرهم الفستان ده. لتشير إلى فستانها الفضي الرائع والذى أبرز جمالها بوضوح..لتستطرد قائلة: ومدام حور خبيرة التجميل اللى جابهالى جدك عزيز مخصوص هنا فى البيت وقلبت كيانى بالشكل ده. قالت حور بإبتسامة: إنتى أصلا قمر ياعلا وانا معملتش حاجة معاكى ..يادوبك شوية حاجات خفيفة بس تبرز الجمال ده. قالت جورية بإبتسامة: أهي مدام حور قالتلك بنفسها إنك قمر ومش محتاجة حاجة..ده كفاية عنيكى الخضرا دى واللى جننت فايز من أول نظرة..وبعدين شكر إيه ياعبيطة اللى بتشكريهولنا ..ده انتى زي أختى. إبتسمت علا بخجل قائلة: ربنا يسعدكم زي ما فرحتونى. كادت جورية أن تقول شيئا ولكن قاطعها دخول خالتها جليلة التى قالت بإبتسامة: أخبار العروسة إي..... لتقطع جملتها وهي تتأمل جورية فى سعادة..مستطردة بعيون دامعة : بسم الله ما شاء ..إيه الجمال ده ياجورى؟..لأ.. ده أنا لازم أبخركم من العين انتى وعلا..ربنا يحميكم يابناتى. قالت علا بإمتنان : ويخليكى لينا ياخالة جليلة. إبتسمت جورية قائلة وهي تقترب من الخالة جليلة: مش إحنا لوحدنا اللى هنتبخر ياخالتى..إنتى مش شايفة نفسك ولا إيه؟..الفستان هياكل منك حتة.. لتغمز لها هامسة فى خبث: جدى مطلعش سهل أبدا ..وجايب الفساتين على المقاس بالظبط.. أمسكتها جليلة من أذنها قائلة: إتلمى ياجورى أحسنلك..ولا نسيتى عقاب زمان؟ تأوهت جورية قائلة: خلاص خلاص حرمت..سيبينى ياخالتى. تركتها الخالة جليلة وهي تبتسم قائلة: أيوة كدة إتعدلى وتعالى حصلينى ..جدك عايزنا فى مكتبه. إبتسمت جورية قائلة وهي تؤدى التحية العسكرية: تمام يافندم. لتغادر الخالة تتبعها جورية التى غمزت لكل من خبيرة التجميل والعروس علا..ليبتسما على مزاحها قبل أن تعود خبيرة التجميل لعملها..تضع اللمسات النهائية على زينة العروس. ******************** تأمل مؤيد ملامح ريم بحنان قبل أن يقول بلطف: طب ولسة زعلانة ليه ياريمو؟مش قلتى ان بابى كلمك وقالك إنه جاي بعد يومين. قالت ريم بحزن: أيوة بس بكرة عيد ميلاد تيمو وأنا كنت عايزة أروح . عقد مؤيد حاجبيه قائلا: تيمو ده يبقى مين إن شاء الله؟ نظرت إليه ريم ببراءة قائلة: صاحبى فى المدرسة. رفع مؤيد حاجبيه بإستنكار قائلا: صاحبك؟صاحبك ده إيه ده كمان..لأ ..معندناش الكلام ده ياريم..إنسى ياماما. عقدت حاجبيها فبدت أكثر شبها بوالدتها وهي تقول: ليه بس ياآنكل؟ قال مؤيد بإرتباك: عشان...عشان... قاطعه صوت لين وهي تقول من خلفه: عشان البنت الحلوة ياريمو..مبيبقاش ليها صحاب صبيان. إبتسم مؤيد للين ..بينما نظرت ريم لها قائلة بحزن: يعنى خلاص تيمو مش صاحبى وأنا مش هحضر عيد ميلاده؟ إبتسمت لين قائلة: لأ..تيمو مش صاحبك لكن زميلك..وإيه رأيك لو خدتك أنا وآنكل مؤيد وروحنا الحفلة بكرة. ظهرت ملامح السعادة على وجهها لتنهض وتحتضنها قائلة: إنتى آحلى آنطى فى الدنيا. ضمتها لين قائلة: وإنتى أحلى بنوتة فى الدنيا ياريمو. نظر مؤيد إليها شاكرا إياها فى صمت لتغمض عيناها ثم تفتحهما بإبتسامة.... أن لا عليك. ******************** كان خالد يجلس مع الجد فى المكتب متوترا..يتساءل عن سبب طلب الجد منهم الحضور إلى المكتب قبل عقد القران..هل جمعهما ليبلغهما قراره فى أمر زواجهما بالسلب ام بالإيجاب؟ أم أن ذلك الإجتماع لا علاقة له بذلك القرار..فتح الباب لتدخل الخالة جليلة إلى الحجرة تتبعها جورية..لينهض خالد وقد توقفت دقات قلبه تماما لمرآها بهذا الجمال الملائكي..ثم عادت دقاته للعمل بقوة..قد سحرته بطلتها الرقيقة الرائعة فى هذا الفستان الوردي الذى يبرز جمالها وشعرها الذى إرتفع بكلاسيكية رائعة مبرزا جيدها الجميل..لينظر إلى عينيها ذات الكحل الطبيعي والتى رمقته بها الآن بنظرات خجول لإدراكها تأمله لها..تمتزج نظرات الخجل بنظرات إعجاب واضحة تعبر عن إستحسانها لمظهره فى تلك البذلة الرائعة..ليتنحنح الجد قائلا: تعالى ياجليلة وانتى ياجورية ..قربوا. أفاق الجميع من شرودهم وهم يقتربون من الجد الذى جلس خلف مكتبه..لينظر الجد إلى خالد قائلا: بص ياخالد أنا معنديش فى الدنيا أغلى من جورية..بخاف عليها من الهوا طول عمرى..كنت خايف تمر بتجربة زي تجربة مامتها ولما جيت المزرعة بصفتك فهد..خفت أكتر بس لما عاشرتك إرتاحتلك..ووافقت على جوازكم قبل كدة زي ما إنت عارف..لكن لما رجعت بصفتك خالد ..قلقت..انت واحد غنى ومتجوز..خفت عليها من تانى..خفت تكون بتلعب بيها..وجورى متستاهلش غير الحب وبس..يمكن كنت متردد كتير فى إنى أجوزهالك..بس الحب ياإبنى بيبان..بيبان فى العين والتصرفات..وإسألنى أنا. لينظر إلى جليلة فى تلك اللحظة والتى إبتسمت فى خجل..ليبتسم بدوره وهو يعود بنظراته إلى خالد قائلا: وعشان كدة قررت النهاردة أوافق على جوازكم من كل قلبى.. نظر خالد بسعادة إلى الجد ثم نظر إلى جورية التى شعت السعادة فى ملامحها بدورها..ليعودا بناظريهما إلى الجد الذى قال مبتسما: وعشان كدة حبيت النهاردة أعملهالكم مفاجأة وأكتب كتابكم مع علا و فايز. كاد خالد أن يطير من السعادة فى تلك اللحظة..بينما إحتضنت جليلة جورية فى سعادة..ثم أسرعت جورية إلى الجد تقبله فى وجنته قائلة: ربنا يخليك لية ياجدى وميحرمنيش منك. ربت على يدها قائلا: ويخليكى لية يابنتى. ليقول خالد بسعادة: أنا مش عارف أشكرك إزاي ياجدى؟ قال الجد بإبتسامة هادئة: شكرى هو إنك تاخد بالك منها ومتزعلهاش أبدا ياخالد. نظر خالد إلى جورية فى عشق قائلا: جورية فى عيونى ياجدى. بادلته جورية نظرات العشق..بينما قال الجد بإبتسامة: طب يلا ياولاد ..كل واحد فيكم يجيب بطاقته وإرجعولى من تانى.. إتجهت جورية للخارج هي وخالد..ليتوقفا عند الباب ..مد خالد يده إليها فمدت إليه جورية يدها بدورها..لتتشابك الأيدى وتبتسم الشفاه وهما يغادران الحجرة فى سعادة..تتبعهما نظرات الجد عزيز والخالة جليلة..لتقول جليلة بإبتسامة: أحلى قرار خدته فى حياتك ياعزيز. نهض عزيز وإقترب من جليلة..يمد يده ويمسك يدها لتنظر إليه فى حيرة وهو يقول: لأ ..فيه الأحلى. عقدت حاجبيها فى تساؤل ليستطرد الجد قائلا: الأحلى كان قرارى بإنى أفتح قلبى للحب من تانى وأنسى فرق السن اللى بينا وأنسى كل حاجة ممكن تبعدك عنى ياجليلة. إبتسمت له جليلة بحنان ليستطرد قائلا: تقبلى تتجوزينى ياجليلة؟ إتسعت عينا جليلة فى دهشة ليستطرد عزيز قائلا: أنا مش هقدر أقدملك كتير..عمرى وبيجرى وقلبى وضعيف بس القلب ده بيحبك وهيسعدك لغاية آخر لحظ... قاطعته بوضع يدها على فمه قائلة بلهفة: وأنا راضية..راضية ياعزيز..جوازى منك حلم عمرى اللى مش قادرة لغاية اللحظة دى أصدق إنه هيتحقق. إبتسم عزيز وهو يقبل يدها الرابضة على فمه..لتنزل يدها فى خجل بينما إبتسم عزيز ينظر إليها......بحب. ******************** إنتهى عقد القران منذ لحظات..فى جو بهيج..فقد إمتلأت الحديقة بسعادة إقتران كل من علا وفايز..جورية وخالد..جليلة وعزيز..ليمسك خالد يد جورية يسحبها خلفه إلى الإسطبل وسط حيرتها..توقف أمام مهرة ثم نظر إلى عيون جورية المتسائلتين قائلا بعشق: أنا جبتك هنا عشان حبيت أشارك مهرة فرحتى بجوازنا ياجورى. إبتسمت جورية لينظر إلى مهرة قائلا: أخيرا يامهرة ..أخيرا إتجوزتها..فاكرة لما كنت بجيلك وأشتكيلك مشاعرى ناحيتها وخوفى من إن جدها ميوافقش..أهو وافق خلاص ..وافق وبقت مراتى ..جورى بقت مرااااتى. ضحكت جورية قائلة: مجنون. نظر إليها قائلا بعشق: مجنون بعشقك ياجورى..وهفضل مجنون طول العمر. إبتسمت برقة قائلة: بحبك ياخالد..بحبك. نظر خالد إلى شفتيها التى تفوهت بكلمات الحب بنظرات تهيم شوقا ليميل ويقبل تلك الشفاه بنعومة أذابتها..تدع مشاعرها له كلية ليعبث بها كيفما يشاء..ليبتعد عن شفتيها واضعا جبهته على جبهتها مغمض العينان.. يتنفس بصعوبة وهو يقول بصوت متهدج من المشاعر التى تغمره الآن: هو أنا لو طلبت من جدك نعمل الفرح بكرة مع فرح علا وفايز..تفتكرى هيوافق؟ إبتعدت عنه وهي تنظر إليه بدهشة قبل أن تتبسم بخجل تاركة إياه وهي تركض إلى الخارج ليتبعها بنظراته العاشقة..صارخا : بحبك ياجوووورى. ******************** ....بعد مرور شهران كانت القاعة خيالية حقا ..تليق بعرس أبناء نصار الثلاثة..حيث توقف العرسان الثلاث كالأمراء ينتظرون أميراتهم واللاتى أتين الآن فى عربة مكشوفة تشبه تماما عربة سندريلا فى هذا الفيلم الكرتوني الشهير لينظر فراس إلى خالد وهو يهز رأسه يمنة ويسار قائلا بعينيه..أترى أفعال أختك مجنونة الروايات ياخالد؟ ليبتسم خالد ثم يعود بعينيه إلى العربة التى توقفت وهبط منها أجمل ثلاث أميرات رأتهن أعين الرجال..ليتجه كل أمير إلى أميرته يقف أمامها ويمسك يدها يرفعها لفمه يقبلها برقة لتبتسم كل أميرة بحب..قبل أن يدخلوا جميعا إلى القاعة وسط تصفيق الحضور ..لتتناهى إلى مسامعهم معزوفة رائعة خيالية تليق بالأجواء حقا..ليتنهد الجميع حين أخذ كل أمير أميرته يراقصها..يظهر الحب واضحا جليا على ملامحهم جميعا..وكأن كل واحد منهم قد سكن فى عين وقلب الآخر... ليبتسم الجد عزيز بحب وهو يرى حفيدته تتهادى بثوبها الأبيض الرائع بين يدي عريسها..يدرك أن حفيدته فى أيد أمينة وعيون خالد تنطق لها بعشق ووعد أبدي بالسعادة ليضم عزيز بدوره يد زوجته ينظر إليها بحنان واعدا إياها بنظراته..نفس الوعد....تماما. بينما مال نبيل على أذن سها يقول لها بنفاذ صبر: هو الفرح مش هيخلص بقى؟ نظرت إليه بدهشة قائلة: يخلص إيه بس ؟ده لسة بيبتدى؟ قال نبيل بحنق: يعنى كان لازم نقطع شهر عسلنا وننزل عشان نحضر الفرح ده؟ قالت سها بحيرة: نقطعه إزاي يعنى؟ما كدة كدة الشهر كان هيخلص بكرة وكنا هنرجع. إبتسم بخبث قائلا: ليه هو أنا مقلتلكيش..شهر العسل فى بلدنا بيعادل ٣ شهور فى بلدكم. عقدت حاجبيها قائلة: بلدنا إيه وبلدكم إيه؟ما كلها مصر..إنت بتشتغلنى يانبيل؟..طيب مش هنرجع شرم تانى ..وهنفضل هنا..وهتشوف شغلك من بكرة..أنا مبحبش الدلع يانبيل..مفهوووم؟ نظر إليها نبيل بإستنكار ثم هز رأسه يمنة ويسارا قائلا: مفيش فايدة..ماشى ياسها..بصى على العرايس ..بصى ياحبيبتى. نظرت سها إلى قاعة الرقص..لتلين ملامحها وهي تقول بإبتسامة: شكلهم حلو أوى. ليقول نبيل فى حنق: آه فعلا.....أوى. ******************** .....بعد مرور بعض الوقت. طرقت السيدة فريدة مدبرة المنزل.. باب حجرة المكتب الخاصة بجورية..لتطلب منها جورية الدخول وهي تترك الكتابة على اللاب الخاص بها..قالت فريدة بإحترام: خالد بيه بيقول لحضرتك..إنه جاي فى الطريق وإنه بيتصل بحضرتك مبترديش. أومأت لها جورية قائلة بإبتسامة: تمام يافريدة..تقدرى تتفضلى دلوقتى. غادرت فريدة..بينما نظرت جورية إلى هاتفها الذى جعلته صامتا حتى تستطيع التركيز على ماتكتبه ..لتضرب بخفة على رأسها..قبل أن تعود إلى اللاب خاصتها تكتب بسرعة.. "وهكذا تزوج كل عاشق بحبيبته..نصفه الآخر ..روحه التى إقترنت بروح تملأ الفراغات فى قلبه وعقله ليشعر بالإكتمال..والآن يعيش ماجد مع زوجته لورا وإبنته رنا فى سعادة بعد أن عرفت بأنه أباها الحقيقي..بينما تعيش لورين قصتها الرومانسية مع زوجها فادى بسعادة وهي تنتظر مولودها الأول والذى سيولد بعد سبعة أشهر من الآن..أما جميلة فهي تعيش بدورها أجمل ايام عمرها مع زوجها فهد..هذا الذى تحول من رجل أعمال بلا قلب إلى رجل بسيط سعيد..أحبها فى الوادى ونسيها فى تلك المدينة الكبيرة ليتذكرها مجددا فى واديهما..وها هي الآن تحمل لزوجها مفاجأة تثق بأنها ستسعده..فقط عندما يعود حبيبها من واديهما..ذلك الوادى الذى أحبه مثلها تماما..وسعي إلى تطويره بنفسه ليحوله إلى جنة لهما..فقد أخبرها أنهما عندما سيقعان تحت ضغوط الحياة.. سيلجآن إليه ..يلقيان بضغوطهما فى مياهه الرائقة وبين جنباته الخضراء الرائعة..ويبعدان عن عقليهما كل المشاكل التى تحملها لهما الحياة..كما حدث له بالماضى عندما فقد ذاكرته هناك ونسي كل همومه ومشاكله بين جنباته..ليصبح واديهما حقا..وادى للحب و للنسيان. لتغلق اللاب خاصتها وهي تبتسم برضا..قبل أن تنهض لتستقبل زوجها ..فلديها بالفعل مفاجأة له ..لا..بل مفاجأتان..إحداهما انها أنهت روايتها بالفعل لتتفرغ تماما للمفاجأة الثانية..والتى تثق حقا فى أنها ستطير عقله وقلبه.......من السعادة. ما بعد الخاتمة فى عشق جوريتى..وردتى الجميلة الفاتنة الحمراء قد أصبحت أسيرا راضخا......راض بقيودى جمعاء قد بدلت صقيعى بدفء.. وإمتزج عشقها فى شرايينى بالدماء ولدت على يدها من جديد فأصبحت لها ولقلبها من الأوفياء على الأرض كتبنا حروف عشقنا..ورسمنا حروفنا فى السماء منحتنى ما لم يمنحنى إياه بشر..فلقد أنارت عقلى وقلبى بالضياء وأنا فى مهد العشق أحبو ..قد كنت آدم.. فخلقها لى ربى حواء ............................... نظرت ليلة إلى فراس بحنق إثر إبتعاد كل من أخيها خالد مع زوجته جورية على جواديهما..لتقول بصوت غاضب: كان فيها إيه يعنى يافراس لو سبتنى ركبت خيل معاهم؟ ما إنت عارف بحبه أد إيه..وعارف كمان إن فرصتى الوحيدة لركوب الخيل بتبقى هنا فى الوادى. إقترب منها فراس وهو يمسك يديها لتنفض يديها من بين يديه بغضب فأعاد إمساكهما بحنان مشددا عليهما ورافضا إطلاق سراحهما قائلا بهدوء يحاول به أن يستوعب غضبها : أنا عارف أد إيه بتحبى الخيل ياليلة..بس مش أكتر من حبى ليكى..وخوفى عليكى و اللى بلاقيه أدام عيونى وفى قلبى كل أما أفكر إيه اللى ممكن يجرالك لو الحصان فلت زمامه منك أو لا قدر الله وقعك . أدركت ليلة خوفه الكامن فى أعماقه من فقدانها مجددا بعد أن كاد أن يفقدها أكثر من مرة فى خلال هذين العامين المنصرمين..لتضم يديه بدورها قائلة بحب وبنظرات تبدل الغضب بداخلهما لحنان وتفهم : مهما حاولت تحاوطنى بأسوار عشان تحمينى ومهما حاولت تمنع عنى أي شئ يإذينى..مش هتقدر تمنع حاجة كتبها ربنا لية يافراس..أنا عايزاك تكون متأكد من حاجة واحدة بس..إنى مش خايفة من أي حاجة وأنا جنبك وإن لو حتى ربنا كتبلى الموت ..... أخذها فى حضنه بقوة يرفض كلماتها بشدة لتستطرد قائلة بإبتسامة يشوبها الحزن وهي تضع رأسها على صدره..تستمع لدقاته العاشقة: شفت أنا فين ؟فى حضنك يافراس..مكانى اللى بتمنى تكون آخر أيامى فيه... ضمها فراس أكثر يقاطعها قائلا فى لوعة: كفاية بقى ياليلة ..أبوس إيدك كفاية كلام عن الموت. خرجت من حضنه تضع وجهه بين يديها قائلة بعيون غشيتها الدموع: الموت شبح بيهددنى فى كل لحظة ومخليك دايما خايف علية وقلقان ومش مرتاح يافراس..إنت فاكر كل لما نيجى نعمل التحاليل..ببقى مش حاسة بيك؟مش حاسة بخوفك وقلقك اللى بتداريهم عنى وبتطمنى وأنا عارفة إنك ساعتها بتكون خايف أكتر منى؟ لأ يافراس ..أنا حاسة بيك..وحاسة بخوفك علية..حتى أغلى أمنية عندى وعندك رفضتها..رفضت حملى منك لإن الحمل ممكن يأثر علية ويموتنى..مش هي دى الحقيقة يافراس؟ غشيت عيونه الدموع وعجز عن الكلام لتستطرد بحنان قائلة: حتى لما حملت من وراك والدكتورة طمنتك بإنى كويسة ..فضلت لآخر لحظة خايف وقلقان..كنت بشوفك وانت سهران طول الليل صاحى مش عارف تنام..وكنت بحس بيك لما تحضنى ..كنت بحس ساعتها إنك مش عايز تخرجنى من حضنك أبدا وكأنه حضنى الأخير ليك..بس الحمد لله كمل حملى على خير وبقى عندنا أحلى بنوتة فى الدنيا ..لورين..بس إنت لسة مصمم تخلى الخوف يسيطر على حياتنا ويحرمنا نتمتع بيها وبمباهجها. قال فراس بإضطراب يمتزج بالألم: أنا ...أنا.... إبتسمت ليلة قائلة بحنان: إنت بتحبنى وأنا كمان بحبك..واللى بيحب حد بيحب يشوفه فرحان وسعيد يافراس..فعشان خاطرى لو بتحبنى خلينى أشوفك دايما بس فرحان..أما الخوف والقلق..فخليهم بعيد عن حياتنا وكون واثق إن اللى عدانى من كل محنة مريت بيها وكنت كل مرة بحس إنها الأخيرة لية فى الدنيا..قادر يعدينا من كل اللى جاي ..وإن اللى جمعنا مش ممكن هيفرقنا يافراس. نظر فراس إلى عينيها يتأمل ثقتها الرابضة فى أعماقهما ليبتسم وقد أشعلت فيه الحماس وزرعت فيه الثقة ..ليقول بيقين: ونعم بالله ياليلتى..ونعم بالله. ******************** عقد مؤيد حاجبيه وهو يمشى وراء لين التى سحبته من يده بقوة خلفها..حتى دخلا حجرتهما معا فى منزل المزرعة بالوادى..وما إن أغلقت الباب خلفهما حتى تركت لين يده وهي تجول فى الحجرة بإضطراب..يتابعها مؤيد بعينيه فى حيرة..يشعره توترتها بالقلق .. ليقول بتوتر: خير يالين..خرجتينى من ماتش الشطرنج واللى تقريبا كنت هكسب فيه جدى عزيز وصممتى متقوليش عن السبب لغاية مانبقى جوة أوضتنا ..وأدينا بقينا فى أوضتنا ممكن أعرف بقى فيه إيه؟ إلتفتت إليه لين تقول بصوت مضطرب: الحقيقة انا مش عارفة أقولك إيه..وإبتدى منين..الموضوع ميتصدقش يامؤيد. إقترب منها يمسك يديها بين يديه قائلا بهدوء: إبتدى من الأول وواحدة واحدة ..أنا معاكى وهصدقك. نظرت إلى عينيه..تستمد منهما الشجاعة ..ثم أخذت نفسا عميقا قبل أن تقول : الحكاية بدأت قبل ما نيجى هنا علطول..إنت عارف إنى إديت أجازة لفتحية عشان إبنها كان تعبان.. وكدة كدة إحنا كنا قربنا نسافر ونيجى الوادى..النهاردة الصبح لقيتها بتكلمنى وهي بتعيط..مع الأسف يامؤيد..إبنها ده مات . تأمل مؤيد عيونها قائلا بحزن وهو يضغط على يدها: ربنا يرحمه ويصبرها..وإنتى عايزة تسافريلها؟صح؟ نفضت يديها عن يديه قائلة بألم: إستنى وإسمعنى..الحكاية أكبر من كدة. عقد حاجبيه لتنظر إلى عمق عينيه قائلة بحزن: فتحية إعترفتلى بإنها كانت بتحطلى دوا فى أكلى عشان مخلفش منك يامؤيد. إتسعت عيناه بصدمة قائلا بذهول: فتحية..طب ليه بس ؟ نظرت إلى عينيه بثبات قائلة: مع الأسف حد تانى كان وراها وإداها فلوس كمان عشان تعمل كدة ..عارف الحد ده كان مين؟ لم يكن بحاجة لجوابها ليدرك أن شاهيناز من كانت وراء تلك اللعبة الحقيرة..لتومئ لين بعينيها وهي تنظر مؤيد قائلة: أيوة هي..ربنا يرحمها بقى..آذتنا بكل حاجة كانت فى إيديها.. عاد ليمسك يدها قائلا: خلاص يا لين ..هي ماتت ومات معاها أي أذى ممكن تتسببلنا فيه. قالت لين بإرتباك: تعرف يامؤيد..لولا..يعنى.. موت ابن فتحية وإحساسها إن ربنا حرمها من ابنها زي ما حاولت تحرمنى من انى أكون أم..مكنتش هعمل الإختبار النهاردة وأكتشف إنى فعلا هبقى أم. عقد مؤيد حاجبيه يشعر أنه أخطأ السمع ولكن ملامح لين المرتقبة لرد فعله جعلته يدرك أنه أبدا لم يخطئ..لتتسع عينيه فى ذهول قائلة: انتى حامل؟ أومأت برأسها قائلة بإضطراب: أنا بصراحة مشكتش لكن لما سمعت كلام فتحية بدأت أشك وخصوصا ان أعراض الحمل كانت واضحة بس يمكن عشان الموضوع ده كان مستحيل فمشكتش للحظة واحدة قبل كدة فى حملى. ضمها مؤيد على الفور قائلا بسعادة: أنا مش مصدق نفسى يالين وأخيرا هيكون لى طفل منك إنتى. ضمته لين بدورها قائلة: وأنا كمان مش مصدقة نفسى ياحبيبى..وخايفة ..خايفة اوى. أخرجها من حضنه وهو ينظر إلى عيونها قائلا بقلق: أنا إزاي مفكرتش فى حالتك الصحية واللى أكيد حملك هيأثر عليها وعلى قلبك. إبتسمت وهي تمد يدها تضعها على وجنته قائلة: أنا خلاص بقيت كويسة يامؤيد وزي ما الدكتور قاللى دى كانت حالة نفسية أكتر منها صحية وكان سببها بعدك عنى لكن أول ما رجعتلى وبقينا مع بعض من تانى والحالة دى مبقتش تجينى..والدليل على كدة إن آخر مرة جتلى الحالة فيها كانت ليلة ما كتبنا كتابنا. عقد حاجبيه قائلا: أمال خايفة من إيه ياحبيبتى؟ أنزلت يدها وهي تطرق برأسها قائلة بتوتر حزين: خايفة مقدرش أديله كل الحاجات اللى حلمت أديهاله وأعيشها معاه..خايفة معرفش أكون أم يامؤيد. رفع ذقنها بيده لتواجهه عيناها القلقتان ليقول بإبتسامة حانية: من الناحية دى اطمنى خالص ..اللى قدرت تدى طفلة عدوتها كل الحنان والحب والرعاية اللى انتى بتديهم لريم..مستحيل تقصر مع طفلها يالين..انتى أحسن أم لولادى ياحبيبتى. تأملت عيناه الحانيتان بإبتسامة إرتياح منحتها إياها كلماته..قبل ان تضع رأسها مجددا على خافقه ليضمها بحنان بينما هي تستمع لخفقاته التى تصرخ بعشقها لتسمعها هي ....بوضوح ******************** إنطلقت جورية على صهوة مهرتها بينما كان خالد يسابقها على ظهر جواده الأسمر.. ليسبقها بالفعل و يصيبها بالحنق.. حتى وجدته يتجه بسرعة إلى مكانها المعتاد والذى كانت تذهب إليه كلما ضاق صدرها بالماضى..ليزول حنقها وسط حيرتها تتساءل كيف عرف بهذا المكان..توقف خالد عندما وصل لتلك الشجرة الكبيرة وترجل من على جواده وهو يربطه بجزع الشجرة..بينما هدأت هي من سرعة مهرتها حتى توقفت تماما بجواره ..إتجه نحوها يحملها من فوقه وينزلها إلى الأرض..لتتسارع دقات قلبها وهي تشعر بقربه وكأنه ظل لها..أدرك خجلها الذى مازال حيا رابضا فى عروقها رغم مرور مايزيد عن العام ونصف منذ زواجهما..ليبتعد قليلا تاركا لها مساحة صغيرة لتأخذ أنفاسها التى ضاعت فى قربه..أخذ لجام المهرة وربطها إلى جوار جواده فى جزع الشجرة..ثم إلتفت إليها عندما قالت بحيرة: إنت جايبنا هنا ليه ياخالد؟ أمسك بيدها يجلسها على العشب الأخضر الجميل..يقول بنبرات حانية: إنتى عارفة المكان ده يبقى إيه؟ نظرت إلى عيونه بحيرة قائلة: أنا عارفة بس إنت إزاي عرفت؟ إبتسم قائلا: فى البداية مكنتش عارف..كان بالصدفة مكانى اللى بحس فيه بالراحة وفى مرة كنت جاي هنا وشفتك هنا ..جنب الشجرة دى ومن وقتها وانا حسيت ان المكان ده مكانا سوا..وخليته شاهد زي مهرة على كل كلمة جوة فى قلبى كانت ليكى وكل دقة كمان. نظرت إليه بعشق ..لتتسع إبتسامته وهو يمد يديه يحفر بجوارهما وسط حيرتها..حتى أخرج صندوقا منحه إياها قائلا: فى الصندوق ده كل لحظة حب كانت فى قلبى ليكى ..كل كلمة حبيت أقولهالك..فى الصندوق ده قصة عشقى ليكى ياجورى. نظرت جورية إلى الصندوق قبل ان تمد يدها وتفتحه لترى العديد من الرسائل..نظرت إليه فى دهشة ..فأومأ لها برأسه ..فأمسكت تلك الرسائل تجرى عيناها على كلماتها ومابين الكلمة والكلمة كانت تذوب فى العشق من جديد..تغشى عيونها دموع السعادة وهي ترى كم أحبها فهد وكم عبر عن مشاعره بكلمات تذيب القلب..أمسكت إحدى رسائله تقرأها بقلب تتسارع دقاته قائلة بهمس: ......وما العشق إلا حروف إسمها العذب الرقيق..زهري الورود يطوف قلبى حولها..يخبرها أنها غايتى فى الوجود تتوقف دقاتى عن الخفقان إن غابت وبعودتها للحياة تعود يمنحنى عشقها أجنحة فأحلق فى سماء العشق بلا حدود ليكمل معها تلك الكلمات الساحرة وهو يقول بهمس عاشق: أشعر معها أنى مكتملا..ودونها يصبح كيانى غير موجود نظرت إليه بعيون دامعة قائلة: كل الكلام ده لية أنا؟ وضع يده على قلبها يقول بحنان: قلبك بيقولك إيه ياجورى؟ إبتسمت من وسط دموعها قائلة بسعادة: بيقولى إنى إتجوزت أرق وأحسن راجل فى الدنيا. إبتسم بسعادة وهو يشعر بدقات قلبها المتسارعة عشقا..تتوافق مع دقاته..ليرفع يده يمسح دموعها برقة قبل أن يترجم عشقه بأن مال آخذا شفتيها بين شفتيه قى قبلة رقيقة خلدت تلك اللحظة الأسطورية لقصة عشق عجز عن محوها النسيان. ******************* إجتمعوا حول النيران فى ليلة شتوية رائعة..جلس كل زوجين بجوار بعضهما البعض..ليستمعا إلى كلمات الجد وهو يتلو تلك الأشعار الرائعة من كتاب يمسكه بين يديه بعنوان(فى عشق جوريتى..وردتى الحمراء).. ليتوقف عن القراءة فجأة وهو يتأمل محيطه بنظرة راضية..فها هي حفيدته قد عادت تقبع راضية سعيدة بجوار زوجها خالد الذى يضمها إلى جواره بإحدى ذراعيه..بينما ينام طفلهما فهد قرير العين فى مهده بعد أن أطلت جورية عليه لتطمأن على وليدها منذ قليل وفى طريقها إطمأنت على لورين إبنة ليلة والتى تنام بدورها فى سلام.. وتأكدت من أن ريم نائمة كالملاك.. تلك الطفلة الرائعة والتى تناديه جدى عزيز فتذكره بجورية فى صغرها..وها هم أحفاده الآخرون والذين صاروا جزءا من عائلته..يشعر تجاههم بكل الحب والرضا وهم يبدون بدورهم فى قمة العشق والسعادة..مؤيد الذى يجلس ضاما لين إلى جواره وفراس الذى يمسك بكف ليلة يتخلل أصابعها بأصابعه لا يترك يدها أبدا..فى حركة باتت ملازمة له..وكأنه يتأكد بها دائما من أن ليلة معه..وإلى جواره..ولن تتركه أبدا..ليبتسم الجد براحة وهو يمسك بيد زوجته جليلة التى تجاوره بدورها ..يتخلل أصابعها بأصابعه لتنظر إليه بعشق مبتسمة بينما تأملها بحنان قبل أن تعود عيناه إلى هذا الكتاب الذى ضم بين جنباته أشعار الحب التى كتبها فهد لجورية وضمت أيضا بعض أشعار خالد..ليعتقد فى نفسه من روعة الكلمات أن خالد قد يعتزل العمل فى شركته ويتفرغ تماما للكتابة..ليبتسم لتلك الفكرة وهو يقول بصوت رخيم ملئ بالمشاعر.. ..... قد كنت تائه بين الدروب..لا وطن لى ولا كيان ...فإذا بها تصبح طوق نجاتى..ودليل العقل والوجدان ... صارت ملهمتى..جوريتى الحمراء ذات القلب الرائع الفتان ....لم أنساها يوم بل راودت أحلامى ..ذكرياتى..وكل مكان حتى عادت إلي ..عادت إلى حياتى فاتنتى.. زهرة البستان فلم يعد وادينا ..واد للذكرى أو الحزن ولم يعد رمزا للفقدان بل صار وادينا واد للعشق..للراحة ..وأصبح حقا وادى النسيان ....ففيه أنسى كينونتى بين ذراعيها وأشعر فقط أنى أسكن الجنان تمت. بقلم الكاتبة شاهندة.

مقالات ذات صلة

يتيمة في قبضة صعيدي القسم ال2 بقلم نرمين حمدي

بنت الراوي 2

ابن الاكابر والأسطى بليا ج ١٧

هذا الشاب أصبح فنان شهير راحل.. خمن من هو؟

ملح بطعم السكر القسم ال5 سلمي سمير

رواية جديدة 4

اترك تعليقاً إلغاء الرد