الثلاثة يحبونها القسم ال2 بقلم الكاتبة شاهندة
قال يحيي بهدوء:
دى الحاجة الوحيدة اللى شفعتله عندى جوازه من شروق..بشرى بجد متتطاقش..وشروق مختلفة عنها خالص.
قالت رحمة:
مفيش أصلا وجه مقارنة بينهم..دى حاجة ودى حاجة تانية خالص..أنا عن نفسى حبيت شروق وحسيتها بجد بتحب مراد..بس اللى مش قادرة أفهمه..ليه مخبى جوازه منها؟
نظر إليها بنظرة ذات مغزى لتفهم نظرته وهي تومئ برأسها قائلة فى تقرير:
بشرى أكيد …صح؟
كاد أن يوافق على كلماتها حين إنتفض على صوت مراد وهو يقول بضعف:
يحيي.
إلتفت كل من يحيي ورحمة إلى مراد ليميل يحيي على مراد الذى كان مغلق العيون قائلا:
مراد..إنت فقت بجد وبتكلمنى؟ولا أنا بتخيل؟
فتح مراد عيونه بوهن ونظر إليهم وهو يبتلع ريقه بضعف قائلا:
شروق يا يحيي..شروق كانت هنا..صح؟
أغشيت عيون رحمة بالدموع ويحيي يقول بسعادة:
حمد الله ع السلامة ياحبيبى..حمد الله ع السلامة يامراد.
إبتلع مراد ريقه قائلا:
الله يسلمك..
ليصمت لثانية ثم إستطرد قائلا:
شروق يايحيي..شروق كانت هنا ..أنا متأكد؟صح؟
إبتسم يحيي قائلا:
ايوة يامراد ..شروق كانت هنا..
زفر مراد بإرتياح قائلا:
كنت عارف..قلبى حس بيها..سمعت كلامها..كانت حزينة ..
إبتلع ريقه ثم إستطرد قائلا بضعف:
فضلت تنادى علية وقلبى لبى نداها..طلبت من ربنا أفوق حتى لو بعدت عنها..إزاي فكرت بس إنى ممكن أعيش من غيرها..
ليغمض عينيه مستطردا:
أكيد أنا السبب..انا اللى خليتها تفتكر إنها مش مهمة عندى..أنا السبب.
قالت رحمة بشفقة وقد فتح مراد عيناه لتظهر بهما الدموع:
إهدى يامراد..بالراحة..مش كدة؟
نظر مراد إليها ليتأملها لثانية قائلا فى حزن:
أنا آسف يارحمة..
ثم نظر إلى يحيي قائلا بندم نطقت به أحرفه وهو يقول:
أنا آسف يايحيي.
ليبدل نظراته بينهما وهو يستطرد قائلا :
أنا آسف بجد..آسف لو غلطت فى حقكم من غير قصد..
ليصمت لثانية ثم يستطرد بألم:
كان نفسى أتأسفلها هي كمان..كان نفسى أقولها إنى غلطت فى حقها كتير وسامحتنى أكتر..وإنى بحبها أوى..أوى يايحيي..بحبها أوى يارحمة…والحمد لله إنها منزلتش البيبى..كنت هموت لو حصلها أو حصل لإبنى حاجة يايحيي.
إتسعت عينا يحيي قائلا فى صدمة:
هي شروق حامل؟
أومأ مراد برأسه قائلا بحزن:
أيوة حامل ..وأنا بلسانى اللى كان يستاهل قطعه ده قلتلها تختار بينى وبينه..خيرتها مابينى وبين إنها تق..تل إبنى يايحيي..أنا طلعت وحش أوى.
