الثلاثة يحبونها القسم ال2 بقلم الكاتبة شاهندة

أومأت برأسها بهدوء ثم إقتربت منه وسط دهشة رحمة قائلة:
مش عايز حاجة أجيبهالك وأنا جاية يايحيي؟

شعرت رحمة بالحنق من تلك المأفونة والتى بدأت رحمة تدرك نواياها الخبيثة..وما يضمره قلبها لزوجها..لتقول رحمة بغيظ:
لأ ياحبيبتى متشكرين..جوزى لو عايز حاجة هيطلبها منى أنا وهجيبهاله أنا..هاتى إنتى لجوزك وإنتى جاية هدوم ..ومتتأخريش..لإنه أكيد هيحب مراته تكون جنبه لما بإذن الله يفوق.

كاد يحيي أن يبتسم وهو يدرك غيرة زوجته الرائعة عليه ووقوفها تدافع عن حقها به بضراوة..ليكتم إبتسامته ولكنه شعر بداخله بالسعادة المطلقة وبعشقه الذى يشمل ذرات كيانه لتلك الجميلة زوجته..بينما نظرت بشرى إليها يأكلها الغيظ من تلميحاتها الغير مباشرة ولكنها مقصودة و بشدة..ليحمر وجهها غضبا..وكادت أن تتفوه بكلمات حانقة ولكنها كتمتها بدورها فى اللحظة الأخيرة وهي ترسم إبتسامة باردة على وجهها قائلة:
إن شاء الله ياحبيبتى ..

لتنظر إليها من رأسها لأخمص قدمها قائلة بشفقة مزيفة:
طيب أجيبلك فستان معايا يارحمة..إنتى مغيرتيش من إنبارح ..وبصراحة المنظر مش تمام ويأثر اكيد على سمعة عيلة الشناوي.

ليتدخل يحيي بالكلام قائلا بهدوء ولكن بنبرة خرجت تحذيرية وشديدة الصرامة:
مراتى مبيهماش المظاهر..والكلام الفارغ ده يابشرى ..

لينظر إلى عيون رحمة قائلا بحنان:
مراتى بتشرفنى أيا كان مظهرها..مظهرها اللى أنا شايفه دلوقتى كامل ومش محتاج أي حاجة..

رفعت رحمة حاجبيها تأثرا وقد غشيت عيونها الدموع ..تشعر بقلبها يغرق فى عشقه..فماذا هناك أكثر من الغرق فى العشق؟هي حقا لا تدرى.

ليبتسم لها بحنان وهو يدرك أفكارها التى تظهر على ملامحها الشفافة ..لتبادله إبتسامته بدورها..تتابعهما بشرى بقلب يشتعل حقدا..تشعر أنها تكاد ان تموت قهرا الآن..ليلتفت يحيي إلى بشرى وهو يضع يده على كتف رحمة يضمها إليه قائلا:
لكن طبعا لو حبت هبعت أجيبلها بدل الفستان عشرة بس معتقدش إن وضع أخويا دلوقتى يخلينا نفكر فى حاجات تافهة زي دى.

إلى هنا ويكفيها ما لاقته من كلمات يحيي التى تحمل لها تقريعا غير مباشرا وتجريحا مقصودا..لتقول بملامح عجزت عن إخفاء الحقد بهم:
آااه..طيب..أنا ماشية..سلام.

لتبتعد بشرى بخطوات سريعة غاضبة ..وتقول رحمة بدهشة:
هو فيه كدة..بشرى دى إيه ..ياساتر..مراد مستحملها إزاي بس؟