متاهة المشاعر القسم ال2 نهي طلبه

اتسعت عينا علياء بخوف:

ـ ليه؟.. بلاش يا نيرة..

تركت عينا نيرة الطريق قليلاً لتلتفت لعليا وقد ارتسمت على ملامحها كل معالم الكراهية:

ـ أيوه.. أيوه يا عليا.. لازم أنهي الموضوع ده النهارده.. والليلة بنت السواق هتكون مشرفة في السجن..

شهقت عليا:

ـ إيه!!.. السجن!!.. نيرة.. الموضوع ما يوصلش للدرجة دي؟.. أنتِ ناوية على إيه؟..

ضغطت نيرة على أسنانها بغيظ:

ـ يعني إيه ما يوصلش للدرجة دي؟؟.. هي اللي بدأت.. وبتحاول تسرق مني حسن.. خلاص يبقى العقوبة على أد الجريمة.. ولو عليّ كنت محيتها من الدنيا..

ـ هتعملي إيه يا نيرة؟..

هزت نيرة كتفيها بلامبالاة:

ـ أبداً.. أنا الفترة اللي فاتت كنت بروح البوتيك يومياً.. بس في وقت هي بتكون مش موجودة فيه.. بقيت زبونة… في آي بي… النهارده بقى أما نروح هقول أن الولاعة وعلبة السجاير الدهب بتوعي ضاعوا.. أنتِ عليكِ أنك تحطيهم في شنطتها من غير ما تاخد بالها.. وهوووبا… هتشرف الهانم في السجن.. بس عشان تتعلم أنها ما تبصش لفوق…

برقت عينا عليا برعب وهي تستوعب ما قالته نيرة وما تنوي عليه بينما ارتسمت على شفتي نيرة ابتسامة متشفية وهي تتخيل منى بالفعل خلف القضبان..

************

طرق حسن غرفة جدته باحترام.. وانتظر حتى سمحت له بالدخول..

دخل غرفتها ليجدها تجلس على أريكتها المريحة الموجودة بمواجهة فراشها.. وقد وُضعت أمامها مائدة صغيرة وعليها المصحف الخاص بها.. وكتاب المأثورات وأذكار الصباح والمساء.. بينما أمسكت بين أصابعها مسبحة طويلة وأخذت تسبح في صمت..

تنحنح حسن.. حتى يلفت انتباهها لوجوده وحياها بهدوء:

ـ صباح الخير يا جدتي..

ابتسمت له:

ـ صباح الخير يا روح جدتك روح..

وضحكا معاً لتحيتها المعتادة له.. فــــ روح هو اسمها…

أشارت له:

ـ تعالى أقعد جنب روح واشتكي لها همك..

جلس بجوارها واحتار كيف يخبرها ما يريد فسألها:

ـ حضرتك فطرتِ؟..

أجابته بصبر:

ـ أنت عارف أني بصحى من قبل الفجر.. ادعي وأصلي.. وأشرب الليمون بالعسل.. وكمان.. آخد الثوم المفصص والمقطع بتاعي.. أنت عارف هو حلو قوي للمناعة.. وبعدين أفطر فتة اللبن بالعيش.. نظامي وعمري ما هغيره أن شاء الله..

ضحك حسن:

ـ ربنا يديكي الصحة..

ربتت على ركبته:

ـ احكي لي عن همك يا ابن حاتم.. قلبك اللي تاعبك.. وأبوك رماك للنا,ر.. وهو عارف أنك مُغرم بنسمة هوى رقيقة..