دنيا وسليم القسم ال2 سارة الحلفاوي
أومأت له بتقول و هي حاسة إنها مش قادرة تفتح عينيها من التعب، حطت إيديها على رقبتها بتقول بألم:
– و زوري واجعني!!
إبتشم و قرب من رقبتها بيقبلها بحب بيقول:
– سلامتك يا حبيبي!!
إبتسمت على فعلته في لمس وشها ولاحظ إن حرارتها نزلت شوية، و بالفعل كلم حد يبعتله دكتورة في محيطهم، و الدكتورة جات و كشفت عليها و كتبتلها على بعض الأدوية لعلاج البرد، بعت حد يجيبهم و فضل هو قاعد جنبها واخدها في حضنه بيقول مبتسم:
– لسه طفلة يا دنيا .. مش عارف هجيب منك عيال إزاي!
بصتله بتوتر و قالت بضيق:
– عيال؟ بس أنا مش عايزة!
إستغرب ردها و طلعها من حضنه بيقول بدهشة:
– مش عايزة عيال مني؟ ليه؟!!
– مش قصدي كدا .. أنا بس قصدي يعني إني لسه صغيرة أوي على مسئولية زي دي!
قالتها بتحاول تحتوي ضيقه و تفهمه، فـ تنهد و قال بتفهم:
– طب م أنا عارف .. و مقدر بس حسستيني إنك مش عايزة مني عيال!
قالت بسرعة:
– لاء مكانش قصدي يا حبيبي ده أنا نفسي في نُسخ صغيرة كدا شبهَك، بس لسه في مدرسة و جامعة عايزة أخلصهم!
– إن شاء الله يا حبيبتي!
قالها و قام يفتح لواحد من رجالته اللي جاب العلاج، إدالها منه وقال بهدوء:
– يلا خدي عشان تخفي!!
خدت منه العلاجات و فتحت دراعها بتقول بدلع:
– طب تعالى في حضني بقى عشان أخف أسرع!
إبتسم و فعلًا سند راسه في حضنها بيحاوطها و هو مغمض عينيه، بيقول بهدوء:
– مش لسه كنت بقولك إني بحس إنك بنتي و طفلة و كدا .. بس أنا في حضنك ببقى عيل يا دنيا!
إبتسمت و مسدت على خصلاته بعشق، تُقبل رأسه و يرجع هو يغمر وشُه في حضنها!
*********
– مش عابزة أرجع يا سليم مش عايييزة!!!
قالت و هي شايفاه بيحضر هدومه و هدومها في الشنط، قرّب منها و قال بحنان بيحاوط وجنتيها:
– يا حبيبتي هنبقى نرجع تاني .. بس شغلي متعطل و البت اللي إسمها دينا مش هتعرف تتصرف من غيري!
بصتله بضيق أكبر وقالت:
– ماشي يا سليم!
شدها وقال بهدوء:
– يلا عشان تساعديني!
إبتدت ترتب معاه الهدو* و هي بتقول بنبرة ذات مغزى:
– أنا هبقى آجي معاك في مرة الشركة!
– ده إنتِ تنوريها!
قال بإبتسامة، فـ غمغمت:
– هي دينا دي بتشتغل معاك من إمتى؟
– سنتين كدا!
– شاطرة؟
– آه شاطرة .. مكنتش سيبتها السنتين، أنا مبسميش على حد في الشغل!
– مممم، بس يعني حاسة طريقتها في الكلام مسهوكة كدا!
– بصي هي فيها حاجات مبتعجبنيش .. بس بحاول أتغاضى عشان شاطرة و شغلها حلو!!
– طيب يا حبيبي!
