قطة في عرين الأسد القسم ال5 بقلم منى سلامة

***********************************
ظل “مراد” ينظر الى ساعته وهو ينتظر “مريم” أمام قسم الشرطة .. على الرغم من طلاقهما مازال يشعر بداخله أنها ملزمة منه .. وكأن شئ خفى يربطه بها .. شئ أقوى من الكلمة التى قالها لتقطع أى وصال بينهما .. حاول الاتصال بها لكن كالعادة هاتفها مغلق .. زفر بضيق قائلاً :
– افتحيه بأه
زاد قلقه عندما ازداد تأخرها .. ركب سيارته وتوجه الى بيتها .. ظل يطرق الباب كثيراً دون رد .. حاول الاتصال بها دون جدوى .. ظل يفكر .. معقول أنه جاء من هنا لتذهب هى من هنا .. لكنه شعر بشئ ينبئه بأن مكروهاً قد حدث .. سمع من الأسفل امرأة تقول :
– مين ؟ .. انت عايز مين ؟
نزل “مراد” ليجد الجارة التى تحدثت معها “مريم” من قبل فقال لها بلهفه :
– متعرفيش هى “مريم” فين ؟ .. بخبط عليها ومحدش بيرد
قالت المرأة وهى تنظر اليه وتدقق نظرها :
– آه فى راجل خبط عليها من ساعتين كده وقال انه من طرف طليقها
قال “مراد” بإهتمام :
– طليقها ؟ .. راجل ؟ .. قال ايه بالظبط ؟
قالت المرأة وهى تحاول التذكر :
– قال انه من طرف واحد اسمه “مراد” وانه طليقها .. أنا اصلا مكنتش أعرف انها اتجوزت تانى
فجأة اتسعت عينا المرأة وهى تنظر الى “مراد” وتقرب وجهها منه قائله بفزع :
– بسم الله الرحمن الرحيم .. مش انت “ماجد” اللى مات
قال “مراد” بحنق :
– لا أنا “مراد” .. أخوه
قالت المرأة وهى مازالت مصدومة :
– أخوه .. سبحان الله .. انت أخو جوزها ولا جوزها ولا طليقها ولا ايه بالظبط
قال “مراد” بنفاذ صبر :
– شكله ايه الراجل ده
قالت الجارة وهى مازالت تتطلع الى وجهه :
– كان شكلك بالظبط سبحان الله
قال “مراد” بضيق :
– مش بتكلم عن أخويا .. يا حجة ركزى .. بتكلم عن الراجل اللى قال انه من طرفى
قالت المرأة وهى تحاول التذكر :
– والله ما أعرف يا بنى مش فاكرة .. أهو جدع كده طول بعرض .. وشكله كده متجوز
نظر اليها “مراد” بغيظ :
– أعمل أنا ايه بمتجوز ولا مش متجوز .. مفيش أى حاجة مميزه فيه ؟
قالت المرأة وهى تفكر :
– حاجة مميزة ؟ .. ازاى يعني .. لا هو كان زى الفل
ثم صاحت بحده :
– وبعدين انت مين عشان تسأل كل الأسئله دى .. أنا ايه يضمنلى ان “مريم” تعرفك وانك طليقها بجد مش يمكن بتضحك عليا
قال “مراد” :
– يا حجه أنا كنت مع “مريم” المرة اللى فاتت لما سلمت عليكي
قالت المرأة بحزن :
– معلش يا ابنى أصلك كنت واقف بعيد وأنا نظرى على أدى
قال “مراد” وهو يعطيها ورقه كتب بها رقمه :
– ده رقمى يا حجة لو “مريم” جت كلميني على طول .. ماشى
قالت المرأة وهى تأخذ منه الورقة وتقول بثقه :
– حاضر يا ابنى ومتقلقش أنا على طول أعدة ورا الباب ومحدش بيطلع ولا بينزل غير لما بعرف
قال “مراد” وهو يرمقها بنظراته :
– ما هو واضح
ثم غادر مسرعاً