البارت ال13
كانوا يسيرون سويا حتى وصلوا الى الفيلا
توقف ياسين فنظروا اليه
ياسمين :ايه وقفت كده ليه
ياسين بأرتباك :هستناكم هنا يلا روحوا انتوا
نور بضحكة شريرة :ابدا لازم تسرق معانا
ياسين كاذبا :ادخلوا انتوا وانا هدخل من الباب اللى ورا
دخلت ياسمين ونور اما هو فأنفجر من الضحك من الذى سوف يحدث
____
نظرت حولها لتجد الفيلا مرتبة وموضوع طاولة وحولها كراسى
ياسمين :هما مالهم اهتموا اوى كده بالفيلا..لتكون اتسكنت
نور :لو اتسكنت كنا هنعرف ..انتى نسيتى ان عم حسين بيبعت ناس كل اسبوع ينضفوها
وبعدين يلا بقى روحى انتى الناحية التانية وانا هروح على الشجرة دى
ذهبت نور الى الشجرة وظلت تحرك فروعها حتى تستطيع ان
تجمع التوت
وياسمين فى الجهه الاخرى و فعلت كما فعلت نور
___
داخل الفيلا
ايسل :ماما انا عايزة افطر بره فى الجنينة
نيفين :لا عشان الحشرات والشمس ويلا اقعدى افطرى
انصاعت ايسل لكلام والدتها وجلست لتفطر
خرج ادهم من غرفته فقابل عمر وهو خارج
ادهم :انت رايح فين
عمر :هروح اشوفلى اى حاجة اكلها
ادهم:طب روح افطر معاهم
عمر :لا ياعم انا هنزل اشترى اى حاجة
نيفين :يلا يا ولاد عشان تفطروا
عمر وهو يفتح الباب:مش جعان يا خالتو ..وخرج سريعا
نيفين:طب يلا انت يا ادهم
ادهم وهو مشغول بقراءة الملف فى يده :لا يا ماما مش جعان دلوقتى بس ياريت تخلى حد يعملى قهوة ويجبهالى فى الجنينة
____
خرج عمر فسمع صوت احد يغنى
فتتبع الصوت حتى رأى احد خلف الشجرة
اتجه ناحية الشجرة
فأبتسم عندما رءاها وعلم انها هى ياسمين
لم تنتبه ياسمين له
فقال عمر :بتعملى ايه هنا
فزعت ياسمين فصرخت ثم نظرت له بأرتباك :والله مش انا
دى نور
ضحك عمر :طب اهدى وبعدين مين نور دى كمان انتوا عصابة ولا ايه
ياسمين بصوت اقرب بالبكاء:والله لا مش عصابة انا بنت ناس
انا ساكنة فى الفيلا اللى جانبكم
عمر :خلاص خلاص اهدى بس انتى بتعملى ايه هنا
ياسمين بتلقائية :جيت اسرق توت
عمر بدهشة :نعم
انتبهت لما تفوهت به وقالت بتلعثم:لا مش قصدى انا
ابتسم عمر قائلا:خلاص اتفضلى خدى الشجرة معاكى وانتى خارجة
خجلت ياسمين لكن تحولت فاجأة وقالت بغضب :استنى هنا انت مين اصلا عشان تسألنى انت اللى بتعمل ايه هنا
عمر :انا ساكن هنا
ياسمين بصدمة وتبلع ريقها :نعم ..طب انا
ولم تكمل وانحنت لتأخذ الطبق الذى جمعت فيه التوت
وركضت
عمر :انا كان عندى حق لما قولت عليها مجنونة
_______
اما نور فكانت تهز فرع الشجرة بقوة حتى يسقط التوت بسرعة
فخرج ادهم وجلس على الطاولة وامامه اللابتوب والملف بيده
فسمع صوت اتى من خلف الشجرة فذهب ليرى
نعم هى تلك الفتاة فضم ساعديه امام صدره ووقف خلفها
ادهم بسخرية :يعنى بتسرقى توت الصبح واخر النهار راعية غنم هو انتى بتشتغلى ايه بالظبط
التفتت نور اليه بفزع وقالت بغضب :ايه بتسرقى دى ما تحترم نفسك انت ايه اصلا اللى جايبك هنا
اهو انت اللى بتطلعلى فى كل مكان اروحه
ادهم بأبتسامة :ببساطة انتى اللى جاية عندى
انا صاحب الفيلا
نور بعد استيعاب :نعم دى فيلا عم حسين
ادهم :وانا اشتريتها عندك مانع
ارتبكت نور والتفتت لتخرج
اوقفها ادهم :تعالى هنا هو دخول الحمام زى خروجه
فهمينى انتى داخلة الفيلا تعملى ايه
اتت على بالها فكرة لكى تخرج من هذا المأزق
نظرت خلف ادهم بخوف
ادهم :مالك فى ايه
نور بخوف وهى تتلعثم :وورااك ..ثم صرخت
نظر ادهم سريعا خلفه لم يجد شئ
التفت اليها وهو يقول :مفيش حــ
لم يجدها امامه فرءاها تركض خارج الفيلا
ضحك ادهم :ماشى لما اشوف اخرتها معاكى ايه
_______
ركضت بسرعة وكانت تنظر خلفها
كادت ان تقع لولا يد امسكتها
الشخص :حاسبى مش تشوفى اودامك
نور وهى تلهث وصدرها يعلو ويهبط :شكرا ..ثم نظرت اليه
هو انت
الشخص :انتى تانى ..ثم ابتسم قائلا:مش انا اللى غلطان
ابتسمت نور :لا انا اللى غلطانة كنت بجرى ومأخدتش بالى بجد شكرا
ثم تركته واكملت ركض
____
دخلت نور الفيلا فوجدت ياسمين جالسه و أمامها طبق التوت تأكل منه
ياسمين :مال وشك محمر كده ليه
نور :شوفتى الفيلا اتسكنت واتقفشت كمان
ضحكت ياسمين :وانا كمان اتقفشت..كنت همـ,ـوت من الكسوف
اتت اليهم سعاد
سعاد :عرفتوا تاخدوا التوت
نور :تخيلى يا عمتو الفيلا اتسكنت
سعاد : انتوا مكنتوش تعرفوا
ياسمين :هنعرف منين يعنى
سعاد :ازاى متعرفوش وياسين جه معاكوا
نور بأنتباه :هو ياسين كان يعرف
سعاد :اه عارف انا بحسبه قالكم
نور وياسمين فى صوت واحد :يا ابن ال …
ضحكت سعاد :شكلكوا اتقفشتوا
اومأوا رأسهم بنعم
فقالت سعاد :يلا تعيشوا وتاخدوا غيرها
نور :عمتو فين ياسين
سعاد :مش عارفة من ساعة لما خرج معاكوا مجاش
نور :والله لهوريه
–
_________
فى طريقه الى الفيلا
ياسين بأبتسامة :ياترى اتقفشتوا ولا لسه
اتى شخص من خلفه
الشخص :لو سمحت يا كابتن
التفت ياسين اليه فأبتسم :ايه ده عمر
سلم عليه عمر فقال له :متعرفش اى مطعم قريب من هنا
ياسين :اه اعرف ..فوصف له المكان
عمر :قول تانى كده
ياسين :انت شكلك هتوه تعال اوديك
عمر :لالا عشان معطلكش
ياسين :ياعم مفيش عطله ولا حاجة تعال بس
طوال الطريق كانوا يتحدثون فتعرف ياسين على عمر اكثر ثم
اوصله ياسين الفيلا بعد ما اشترى الطعام
عمر :بجد مش عارف اقولك ايه شكرا
ياسين :مفيش حاجة للشكر اصلا
عمر :طب تعال ادخل بقى
ياسين :لا شكرا مره تانية
رحل ياسين ودلف عمر الفيلا
فوجد ادهم امامه
ادهم متسائلا:مين ده ياعمر اللى كنت واقف معاه
عمر :ده ياسين حفيد الحاج على المنشاوى
ادهم :ااه .. طب يلا عشان ورانا شغل
__________
كانت ياسمين ونور تبحثن عن ياسين
رأته نور اتى :اهو يا ياسمين
ركضت نحوه ياسمين ونور وقاموا بضربه
اصطبغ وجه ياسين من كثرة الضحك
ياسين :خلاص والله
نور وهى تحدثه بعصبية :انت اتهبلت يا ياسين تسبنا نروح الفيلا وانت عارف ان فيها ناس
ياسين واخيرا افلت نفسه من منهم :انتوا زعلتوا ولا ايه انا بهزر معاكم بس انتوا اتقفشتوا ولا ايه
ياسمين :وكمان بتسأل اه اتقفشنا وكان منظرنا زبالة بسببك
نور :وهو الهزار كده احنا تحطنا فى الموقف ده
ياسين :خلاص بقى الله مكنتش اعرف ان هيحصل كده
نور :متبقاش تكلمنى تانى ..ثم تركته ورحلت
ياسين :هى زعلت ولا ايه انا كنت بهزر
ياسمين :وهو فى حد يهزر كده اكيد زعلت
ياسين :طب وانتى معندكيش دم ليه ..مزعلتيش ليه زيها
نظرت له بحنق وتركته وذهبت خلفها
-__________
وقفت فى شرفتها ناظرة لأعلى ..فتنهدت بحنق عندما تذكرته
فهى لم تشعر بالضيق من ياسين قدر ما تضايقت من هذا الشخص الذى تلقاه فى كل مكان تذهب اليه
وعندما تراه يجب ان يحدث بينهما شجار
تذكرت انه يعتقدها راعية غنم
فقالت بصوت خافت :ايه الفيلم اللى انا فيه ده
سمعت صوت طرق على بابها فذهبت لتفتحه ..وجدت ياسمين
نظرت نور اليها بضيق ثم قالت :عجبك اللى عمله اخوكى ده
ياسمين بأبتسامة وهى تجلس على الكرسى :هو ياسين ده عليه حرج ربنا يشفيه من اللى فيه ..ده هيمـ,ـوتنا
نور :اصله مش هزار ده ..تخيلى اللى قفشنى مكنش عايز يخرجنى وبيقولى بتسرقى
ثم نظرت اليها بحدة قائلة :وانتى مجيتيش تقوليلى ليه ..جريتى وخلاص
ضحكت ياسمين :هو انا لحقت ..انا اول ما اتقفشت اخدت الطبق وجريت
ابتسمت نور عندما تذكرت ما فعلته :انا جريت بردو
قاطعهم صوت طرق على الباب ففتحت ياسمين
ليدخل ياسين ويجلس بجانب نور قائلا:ممكن اقعد
نظرت اليه نور ثم نظرت امامها:ما انت قعدت خلاص
ياسين :نور انتى زعلتى ليه وانتى عارفة انى بهزر..وبعدين الهبلة دى مزعلتش بالعكس دى عماله تاكل وبتضحك ولا كأن حاجة حصلت
نظرت له بحدة:هو فى هزار بالطريقة دى
فقال :وحياة ابوكى بلاش البصة دى عشان بخاف
ابتسمت نور ابتسامة رقيقة
فقال ياسين مازحا وهى يغمز بعينه :ما احنا ضحكتنا حلوة اهى
نور :نتلم بقى ولا اخزئلك عينك
ياسين مقلدا صوتها :اخزئلك عينك ..فين الرقة
نور :على فكرة انا لسه زعلانة
ياسين :والله انا مكنش قصدى..فكى بقى
تدخلت ياسمين قائلة :خلاص بقى يا جدعان ..
***********
كان فى غرفته يتحدث عبر الهاتف ..فدخل عمر بدون ان يطرق الباب
فنظر اليه ادهم بلا مبالاه
بعد انتهاء المكالمة
ادهم :مش تخبط يا بنى ادم انت
عمر :ياعم بقى سيبك انت من الحاجات دى ..كنت بتكلم مين
ادهم وهو يرجع شعره للخلف :ده بابا عايزنى انزل القاهرة عشان فى اجتماع
عمر :وهتنزل امتى
ادهم :مش هنزل اصلا الاجتماع هيتعمل هنا
عمر :ازاى
ادهم :بابا هيبعتهم هنا
عمر :يابنى ارحم الناس شوية حرام عليك ما تروح انت اسهل
ادهم :معنديش وقت اروح واجى
********
فى فيلا عم حسين
حسين :عليا اقعدى بقى يا حبيبتى انا صدعت
علياء الطفلة الصغير حفيدة عم حسين لم تبلغ من العمرسبع سنوات
علياء :يا جدو عاوزة ايس كريم
حسين :لا مفيش ايس كريم الدنيا ليلت
علياء :ماليش دعوة بقى
كان كريم جالس مع خالته
فسمع صوت زوج خالته (عم حسين ) فخرج ليعرف ماذا يحدث
كريم :مالك يا عمى
حسين :شيل البت دى من اودامى هتجبلى الضغط
كريم :بعد الشر هى عملت ايه
اجابت علياء وهى تمسكه من بنطاله :عاوزة ايس كريم يا كريم
حسين :بنت قولتلك اسمه عم كريم
كريم بأبتسامة :ميجراش حاجة ..طب انا هروح اجيبلها
حسين :لا يابنى دى مدلعة دخلها لأمها
كريم :خلاص يا عمى انا هروح اجيبلها
علياء وهى تتشبث ببنطاله :هاجى معاك
وامسكت يده و شدت يده نحو الباب :يلا يا كريم
كريم :حاضر يا ستى يلا
_____
خرج من غرفته ليجد الين واقفة امامه فقال بإستغراب :فىحاجة يا الين ..مالك واقفة كده ليه
الين :كنت لسه هخبط لقيتك فتحت
لم يتحدث منتظر ان تكمل …فقالت
الين :ممكن يا ادهم انزل اتمشى شوية
ادهم :لا هتوهى زى الصبح
الين :متخافش مش هتوه وخدت موبايلى اهو ومش هبعد
ادهم موافقا :طيب بس متتأخريش
_خرجت الين وهى سعيدة
لكن لم تدوم سعادتها لمدة كبيره
فحزنت على حالها فهى بالاسم مخطوبة لم يبدى لها ادهم انه يحبها ..فوالدتها من فرضت عليها ادهم
وتعلم ايضا ان ادهم اجبر عليها ..فماذا تفعل فى والدتها
لو كان والدها حى لم يستطيع احد ان يجبرها على شئ لا تريده
فكان هو امانها فى الحياة ..فماذا يحدث اذا امانك اصبح رماد
امتلأت عيناها بالدموع عند تذكرها لوالدها
**********
ذهب كريم مع الطفلة علياء وقام بشراء المثلجات لهم هما الاثنين
علياء وهى تأكل مثلجتها فرأت كريم يقوم بفتح مثلجته:كريم انت بتاعتك بطعم ايه
كريم :بالمانجا والفراولة
علياء وقد اغرتها شكلها :طيب انا مش عاوزة بتاعتى طعمها وحش هات بتاعتك
كريم :لا ياحبيبتى انتى كالتى من بتاعتك لكن انا لسه مدوقتهاش
علياء :انا خدت لحسة بس يلا بقى يا كيمو
كريم :ماشى ماشى بقيت كيمو ..وقام باعطائها مثلجته
كريم :ارتحتى ياستى
اومأت علياء :شكرا يا كيمو
__
ظهرت سيارة اتيه بسرعة ..ولم تنتبه لها الفتاة
فأبعدها كريم عن الطريق :حاااسبى..ماشية مش شايفة اودامك
نظرت له ودموع بسيطة فى مقلتيها
فقالت وهى غير مصدقة :كريم
فنظر اليها بدهشة:الين
البارت ال 14
ظهرت سيارة اتيه بسرعة ..ولم تنتبه لها الفتاة
فأبعدها كريم عن الطريق :حاااسبى..ماشية مش شايفة اودامك
نظرت له ودموع بسيطة فى مقلتيها
فقالت وهى غير مصدقة :كريم
فنظر اليها بدهشة:الين
الين وهى تمسح تلك الدمعة قبل هبوطها :انت بتعمل ايه هنا
نظر اليها كريم بقلق عندما رأى الدموع فى عيناها
كريم :مالك يا الين بتعيطى ليه
الين :مبعيطش انا بس دخل فى عينى تراب ..ثم اسطردت قائلة :انت هنا بتعمل ايه
كريم بأبتسامة :انا قاعد عند خالتى .لكن انتى ايه اللى جابك المنصورة
الين بصوت حزين على حالها :انا قاعدة مع ادهم هنا
كريم بصدمة :هو انتوا اتجوزتوا
الين بسرعة :لالالا احنا لسه مخطوبين
كريم :اومال قاعدة معاه ازاى
الين بعفوية :ما احنا معانا ايسل وطنط نيفين حتى كمان عمر ابن خالته
كريم بسخرية :ومجبتوش معاكوا البواب بالمره ليه
ثم قال بحدة:
انتى ازاى قاعدة معاه فى بيت واحد
الين بأستغراب من حدة كلامه:منا قولتلك طنط معانا
فى تلك اللحظة اتت علياء وهى غاضبة..
نظرت الى كريم :انت ازاى تسيبنى لوحدى وتمشى
نظرت الين الى الطفلة ثم نظرت اليه
الين :مين البنت دى
كريم :دى تبقى علياء بنوتة بنت خالتى
الين :ماشاء الله عسولة خالص
ثم انحنت اليها وقبلتها من وجنتها :انتى مالك زعلانة ليه
علياء وهى تشكى لها :عشان كريم سبنى لوحدى وجرى
ضحكت الين :معلش ..انا هبقى اقوله ميسبكيش تانى
فملت علياء من الوقفة
علياء :يلا يا كريم نروح
التفتت الين اليه فعليهم الرحيل
الين :شكرا يا كريم
كريم :متمشيش تانى وانتى بتعيطى
الين نافية :بس انا مكنتش بعيط
كريم بأبتسامة :اسمعى الكلام ومتكدبيش ..ثم اسطرد قائلا :يلا عايزة حاجة
الين بتردد :كريم ممكن تدينى رقم موبايلك
تردد قليلا ثم اعطاها الرقم وذهبوا
________
كان كريم ماشى وهو يفكر
(لماذا القدر يجمعنا ..اردت الرحيل من اجلها لكن القدر كان ضدى فقابلتها ..)
كريم (يعنى انا عايز ابعد الاقيها فى نفس المكان وكمان اديها رقمى غبى يا كريم )
علياء بصوت عالى :كريم كريم
كريم منزعج من صوتها :ايه يا علياء هو انا فى الشارع التانى
عايزة ايه
علياء وهى تشير على الفيلا :وصلنا خلاص
_________
فى الصباح
خرجت الين من غرفتها ومرتدية ملابس رياضية
فقابلت ادهم فى الحديقة
الين بأبتسامة :صباح الخير
ادهم كان منشغل باللابتوب :صباح النور
الين :انا خارجة اجرى شوية
نظر ادهم اليها والى ملابسها :انتى خارجة كده
الين :اه فيها ايه
ادهم بحدة :فى ان احنا مش فى النادى عشان تجرى بالترننج ده
الين :مفيش حد هيشوفنى لسه بدرى
ادهم :الناس هنا بتصحى من الفجر يلا روحى غيرى
انا مش عايز مشاكل
انصاعت له وقامت بتغيير ملابسها
وعادت اليه كانت مرتدية بنطلون جينز وتيشرت طويل
الين بضيق:حلو كده
ادهم :اتفضلى بس متتأخريش
______
اخرجت نور مهرتها من الاسطبل
محمد :انتى رايحة فين يا نور
نور :همشى الين شوية بقالها كتير مخرجتش
محمد :طيب بس تعالى بسرعة عشان الفطار
نور :حاضر مش هتأخر
…….
نور وهى تحدث مهرتها
نور :شكلك عايزة تجرى صح
اصدرت الين صهيل فضحكت نور :انتى فهمتينى
طب تعالى انا هخليكى تجرى
تركتها نور :يلا اجرى بقى
ركضت الفرسه فأبتسمت نور :ياااه هو انا للدرجة دى حبساكى
فركضت نور خلفها..وبعد ما شعرت بالتعب
نادت نور وهى تلهث من الركض :يا الين كفاية بقى
ثم قالت بصوت عالى :الين اقفى
توقفت فرستها
كانت الين على مقربة منها فسمعت احد ينادى عليها
فعندما نظرت الى المنادى استغربت فهى لم تعرف تلك الفتاة لكنها ذهبت اليها
الين :هو انتى تعرفينى
نظرت اليها نور بعدم فهم :نعم
الين :انتى كنتى بتنادى عليا دلوقتى
نور بأستغراب :انا مقولتش حاجة ولا ناديت على حد
ثم قالت :انا كنت بنادى على الفرسه بتاعتى الين
الين :مهو انا الين
ابتسمت نور قائلة :لا بصى الفرسه اللى وراكى دى بتاعتى اسمها الين
نظرت الين خلفها فقالت بأبتسامة :الله دى حلوة
اظاهر كل اللى اسمهم الين حلوين
ضحكت نور :طبعا ..تحبى تسلمى عليها
الين بخوف :لا اخاف دى ممكن تعضنى
نور :لا متخافيش مش هتعملك حاجة تعالى
وضعت نور يد الين على ظهر المهرة وجعلتها تمرر يدها عليها
نور :ايه رأيك ..ثم وجهت كلامها لفرستها :يلا يا الين سلمى عليها
اصدرت صهيل افزع الين فرجعت للخلف
نور :متخافيش دى بتسلم عليكى
الين :معلش انا عمرى ما اتعاملت معاهم
نور :طب تحبى تجربى تركبى
الين بفرحة :بجد ينفع
نور :اه طبعا تعالى
قالت الين:لا لحسن اقع
نور:متخافيش انا معاكى
ساعدتها نور على الركوب
نور :تحبى تروحى فين
الين وهى سعيدة :روحينى
نور :يعنى فين
الين :فى شارع ….
نور :على فكرة ده نفس الشارع اللى ساكنة فيه
ظلت نور تحدثها طوال الطريق عن المنصورة
الى ان وصلوا فقالت الين:اهيه هى دى الفيلا
ساعدتها نور على النزول
الين :بجد شكرا ليكى بجد يا ..اه صح انا معرفتش اسمك
نور بأبتسامة:اسمى نور لو عوزتى اى حاجة انا ساكنة فى فيلا على المنشاوى اللى فى اخر الشارع
الين:اكيد هجيلك لو معندكيش مانع
نور :ابدا فى اى وقت تحبى تيجى تعالى
اتت ايسل فهى كانت واقفة امام الفيلا
ايسل:كل ده يا الين
الين :الاول احب اعرفك على نور لسه متعرفة عليها دلوقتى ..ودى وهى تشير على المهرة ..دى الين صاحبتى
ودى يا نور ايسل اخت خطيبى
نور :اهلا بيكى فى المنصورة ياريت تكون عجبتك
كان ادهم يتابع حديثهم فخرج عندما وجدها
ادهم وهو ينظر على نور :هو فى ايه
كانت نور مبتسمة لكن عندما التفتت اليه تلاشت ابتسامتها
الين :اهو هو ده يا نور خطيبى ادهم
نور بأبتسامة صفراء :اهلا ثم استأذنت لترحل
________
ادهم :مين دى يا الين
الين :دى نور
ادهم :منا عارف انها نور ..اقصد عرفتيها منين
الين :اتعرفت عليها لما خرجت
ثم وجهت كلامها لايسل وقصت عليها ما حدث
ايسل :ركبتى ومخوفتيش
الين :خوفت شوية لكن هى كانت ماسكه الين
كان ادهم مستمعا لها فتدخل قائلا:مين الين دى
الين :دى الفرسه بتاعتها
ايسل :طب انا عايزة اركبها
كانت نيفين جالسه تأقلم اظافرها
فتدخلت :تركبى ايه افرضى وقعتى
ايسل :عشان خاطرى يا ماما
نيفين :مش هعيد كلمتى مرتين وبعدين هى ساكنة فين البنت دى
الين :فى فيلا على المنشاوى
عمر:جوز خالتى ايه المفاجأة دى
اتى ادهم وسلم على والده:مش كنت تقول يا بابا كنت جبتك
احمد:حبيت اعملها مفاجأة
اسرعت ايسل اليه وعانقته:احلى مفاجأة
احمد:اومال فين نيفين
اتت نيفين مبتسمه:حمدالله على السلامة يا حبيبى
احمد:الله يسلمك ..ادهم الناس جم معايا تحت
نيفين:ايه يا احمد ده انت لسه مأخدتش نفسك على الشغل
احمد:لا مهو هو اللى هيقابلهم مش انا
نيفين:طب يلا تعال استريح
عمر:ايوه ياعم الله يسهلوه
نظرت اليه نيفين :ولد عيب كده
ضحكت ايسل بأستفزاز:بتحط نفسك فى مواقف بايخة
القى عمر عليها وسادة الانتريه:متهمدى بقى
______
فى فيلا المنشاوى
مر عم جابر بجانب الفيلا ..فسمعته نور فخرجت سريعا
لتنادى عليه
نور:ثوانى ياعم جابر وجاية هروح بس انادى ياسمين
دلفت مرة اخرى وجدت والدتها امامها
زينب :كنتى بتكلمى مين
نور :كنت بكلم عم جابر ..هروح معاه يا ماما
زينب :لآ كفاية بقى مفيش مرواح تانى
نور بترجى :عشان خاطرى اخر مرة ومش هروح تانى وكمان ياسمين هتيجى معايا
زينب :طيب خلاص اخر مرة
قبلتها نور ..ثم ركضت سريعا واتت ومعها ياسمين
كانوا مارين بجانب الفيلا التى يقطن بها ادهم
فلاحظوا مجموعة من الرجال ومعهم ادهم وعمر
كان ادهم يستقبلهم من على بوابة الفيلا
عم جابر :هشيهم يا نور عشان الناس
نور :رررر يلا هش ثم اقتربت من الناس وجدتهم ينظرون عليهم بضيق وادهم مسلط نظره عليها فقالت بأبتسامة
نور:والله طلاما متضايقين اوى كده ياريت كنتوا اتجمعتوا هناك فى القاهرة احنا مش ناقصين الهوا اللى هيهب علينا من عندكم
وكزتها ياسمين :نور اسكتى عيب
نور :انتى مش شيفاهم باصين ازاى
ظنت انها اغضبت ادهم لكن عندما نظرت اليه
لمحت ابتسامة على وجه ادهم جعلته اكثر وسامة وهو ينظر اليها فأرتبكت ونظرت بعيد ثم رحلت
_________
كانت ايسل والين جالسين يتحدثون سويا
الين :طب احنا هنفضل قاعدين كده
ايسل بملل:مش عارفة انا عايزة اخرج..
الين :طيب تعالى نخرج ..اهو نتمشى بدل قعدتنا دى
ايسل :هنروح فين هو احنا نعرف حاجة هنا
الين بتفكير ثم قالت بأبتسامة:تعالى اوديكى عند نور..
ايسل :مش هتبقى حلوة ..وبعدين انتى لسه عارفاها الصبح
الين :دى طيبة جدا ..مش هتقول حاجة ..هى اللى قالتلى لو عوزت حاجة اروحلها
ايسل:طيب الناس اللى تحت هنعدى ازاى
الين :من الباب اللى ورا بس يلا بسرعة قبل ما طنط تيجى
*******
خرجا سويا وذهبوا الى فيلا على المنشاوى
كان ياسين يخرج المهرة من الاسطبل
الين :اهى الفيلا يلا نسأل عليها..التفتت حولها لتجد ياسين
فى واحد اهو نسأله
اتجهت نحوه :لو سمحت نور موجودة
التفت ياسين اليهم فعرفهم على الفور
ياسين :لا لسه خارجة من شوية ..بس انتى لو عايزاها انتى ممكن تلحقيها امشى من الطريق الرئيسى
الين :فين الطريق الرئيسى ده
وصفه لهم ..لكنه وجد من علامات وجوههم انهم لم يعرفوا الوصول اليه
ياسين :بصى انا رايحلها تعالوا معايا
ايسل :نيجى معاك فين متقولنا وخلاص نمشى ازاى
ياسين :اللهم ما طولك يا روح اومال انا كنت لسه بقول ايه ..انا الحق عليا ..خلاص روحوا انتوا
البارت ال 15
ياسين :اللهم ما طولك يا روح اومال انا كنت لسه بقول ايه ..انا الحق عليا ..خلاص روحوا انتوا
وتركهم وكاد ان يخرج من البوابة
ايسل :ده قليل الذوق
الين :بس ليسمعك ..وبعدين هو مغلطش يا ايسل هو عرض علينا انه يودينا .. وبعدين احنا مش هنعرف نروح
فقالت منادية :استنى بس يا كابتن
وقف ياسين وقال بأبتسامة :اسمى ياسين
فقالت الين :وانا الين ..بس هى متقصدش ودينا لوسمحت
كان يسير وهو ماسك الفرسه وهما بجواره
الين :مش دى الين بردو بتاعة نور
ياسين :اه هى
الين : طب هو انا انفع اركبها
ايسل :تركبى ايه ..انتى لازم تستأذنى نور الاول مش ده
ياسين :متحترمى نفسك انا ليا اسم مش ده
فقال لالين :اتفضلى اركبى نور مش هتقول حاجة
ساعدها ياسين حتى تركب ..وظل يتحدث معها طوال الطريق
حتى وصلوا
كانت نور وياسمين جالسين فى مكانهم المفضل
تحت ظل الشجرة الكبيرة
فأتى ياسين وهما خلفه
ياسين :نور فى بنات عايزينك ..
نظرت نور اليهم وذهبت لترحب بهم
نور:حلوة المفاجأة دى ..بس انتوا عارفيين ياسمين منين
ايسل :ما احنا اتعرفنا عليها قبل كده
نظرت نور الى الين التى مازالت فوق المهرة :شوفتى ركوبها سهل ازاى
الين :لا مهو ياسين ساعدنى اركبها ..دمه خفيف خالص
ياسمين بتفاخر:طبعا مهو طالع لاخته
ايسل بدهشة :هو انتوا اخوات
ياسمين :وكمان توأم
نور :طب احنا هنتكلم واحنا واقفين تعالوا نقعد
جلسوا جميعا لكن ياسين كان واقف بعيد عنهم مع عم جابر
الين :يعنى انتوا ولاد عم
نور :ايوه ياستى
الين :بس حلوة اللمه انكم كلكم يعنى عايشين مع بعض
كانت ايسل تنظر الى نور
انتبهت نور لها :ايه يا ايسل انتى معجبة ولا ايه
ابتسمت ايسل :بشبه عليكى ..هو انتى مش كنتى خرسه وراعية غنم
ضحكت نور :مين اللى قال كده باباكى واخوكى قالولى نفس الكلام
ايسل :اصل احنا اول ما شوفناكى كنتى بتتكلمى بالاشارة
فحكت لها نور انها تعرف لغة الاشارة
نور :اما بقى لراعية غنم انا مش عارفة انتوا جبتوها منين
انا بس بحب اطلع مع عم جابر وهو معاه الخرفان
ظلت تتحدث الين مع ياسمين
قاطعت ايسل نور فى وسط حديثهم
ايسل :طيب طلاما ساكنين فى القاهرة ايه اللى جابكم هنا
نور :احنا بنيجى هنا بس فى الاجازة ..لكن بننزل القاهرة بسبب الدراسة ..بس انا بحب هنا اكتر
ايسل وهى تنظر حولها :عندك حق هنا احلى بكتير ..مفيش دوشة ولا مشاكل
ثم قالت وهى تنظر على الفرسة
ايسل :هو انا ينفع اركب الفرسه
نور :اه طبعا تعالى
الين :لا يا ايسل طنط نيفين هتزعق
ايسل :ومين هيقولها بس..وبعدين انتى ركبتيها
ذهبت خلف نور
نور :ياسين هات الين عشان ايسل تركبها
ياسين عن قصد :لا لحسن تصوت فى وشها
ابتسمت ايسل عندما تذكرت
ضحكت نور :لا مش هتصوت ولا حاجة
ساعدتها نور فركبت ايسل
ايسل :الله ..خليها تجرى يا نور
نور :لا عشان هتقعى
ايسل :طب روحى انتى اقعدى معاهم
نور :طب مين اللى هيمسكها
ياسين :روحى انتى يا نور انا هخلى بالى
تركتها نور وذهبت اليهم
ترددت ايسل ان تعتذر له عما بدر منها فى المرة السابقة
ايسل بدون ان تنظر اليه :انا اسفة عشان المره اللى فاتت
ابتسم ياسين :على المرة اللى فاتت بس ..خلاص مفيش حاجة تانى مره متلعبيش فى حاجة
-__________
اتى عم حسين فوجد كريم وابراهيم (حفيد حسين 15 عام ) مستعدين للرحيل
حسين :رايحين فين يا ولاد
ابراهيم :هنروح يا بابا نلعب كره
حسين :طيب كريم خلى بالك منه
كريم :متقلقش يا عمى ..يلا يا ابراهيم
لكن استوقفتهم مجئ علياء :انا جاية معاكو
ابراهيم :تيجى فين يلا ادخلى جوه
بكت علياء :جدو عاوزة اروح
قبل ان ينطق جدها كان حملها كريم :يلا احنا كده مش هنخلص
______
بعد رحيل الناس ..اتى احمد ليجد ادهم وعمر جالسين
احمد :الناس مشيوا يا ادهم
ادهم :اه يا بابا لسه ماشيين
احمد:طيب مشوفتش اختك والين ..
ادهم :هما مش جوه
احمد :لا انا دورت عليهم
عمر :انا شوفتهم من شوية كانوا خارجين هما الاتنين
ادهم :ومقولتش ليه ياعمر
عمر :هقول ازاى يعنى واحنا كنا مع الناس
ادهم :طب انا هروح ادور عليهم
عمر :استنى هاجى معاك
بعد ان ذهبوا
اتت نيفين وهى واضعة ماسك على وجهها
ففزع احمد :ايه يا نيفين ده
نيفين :ده ماسك يا حبيبى عشان بشرتى..انت مش شايف تغيير الجو
احمد :طب انا خارج
نيفين :رايح فين
احمد :هشم هوا يلا سلام
______
كان الحاج على مار من امام الفيلا
فقابله احمد وسلم عليه
على :كده معرفش ان انت هنا
احمد:والله لسه واصل النهاردة
على :طيب حمدالله على السلامة ..انت غيرت رأيك ولا ايه نويت تقعد هنا
ابتسم احمد :لا هنزل تانى
على :طب حيث كده بقى اعمل حسابك ان العشا عندى النهاردة
ومش هقبل اى اعتراض
احمد :خلاص ماشى يا حاج
على :اشوفك بقى بعد صلاة العشا
–
________
كانت مازالت ايسل فوق الفرسه وياسين كان يتحدث معها
ونور كانت جالسه تتحدث معهم بعد ان ذهب عم جابر
فلمحت الين كريم
الين :ثوانى وجيالكم
ركضت فى اتجاهه
الين :كريم
كريم :الين ..بتعملى ايه هنا
الين :كنت قاعدة مع اصحابى ..انتوا جايين تعملوا ايه
جاوبت علياء :احنا هنلعب بالكورة تعالى العبى معانا
نظرت الين لكريم
فقال :لو حابة تيجى تعالى العبى
الين بفرحة :بس انا معايا اصحابى
كريم :خلاص هاتيهم مفيش مشكلة
ركضت الين اليهم :يلا تعالوا نلعب
ياسمين :نلعب ايه
الين :هنلعب كورة مع كريم
نور :ومين كريم ده
الين :ده يعتبر صديقى يلا بقى نلعب
ياسمين :انا هسأل اخويا الاول
الين :وانتى يا نور
نور:لو ياسين وافق هلعب
ذهبت ياسمين لاخيها وجدته يتحدث مع ايسل
ياسمين :ياسين عاوزين نلعب كورة مع كريم صديق الين
ايسل :ايه اللى جاب كريم هنا
ياسين :هو انتى تعرفيه
ايسل :اه ده صاحب ادهم اخويا
ياسمين :ها موافق
ياسين:لا ازاى هتروحى تلعبى مع شاب
ياسمين :مش انا لوحدى ما انت هتيجى كمان..وكمان كلنا هنلعب ..وبعدين يعنى دى كورة ..هو انا قولتلك هتكلم معاه
تدخلت ايسل :على فكرة كريم محترم جدا يا ياسين
وبعد ما اقتنع وافق
كان كريم ينظر الى نور
فنظرت الين الى ما ينظر اليه وجدتها نور
الين :تعال لما اعرفك على صاحبتى
الين :نور ده كريم ..
نور بأبتسامة :اهلا
كريم :احنا اتقابلنا قبل كده صح
قالت نور بخجل فهى تعرفه :اه
تدخلت الين :انتوا تعرفوا بعض
قالت نور مسرعة :لا..
اتى ياسين ومعه اخته وايسل
وقامت الين بتقديم كريم له
ابراهيم :يلا بقى نبدأ
كريم :طب الاول هنلعب ايه
قالت ياسمين :احنا نلعب الكورة الطايرة واللى يقع او الكورة تقع منه يبقى خسران
كريم :طب يلا
وبدأوا اللعب ولم تخلو اللعبة من الضحك على انفسهم وهم يلعبوا وعلى من يقع بينهم
___
عمر :ما تهدى بقى يا ادهم هما مش هيتوهوا
ادهم :محدش فيهم بيرد يا عمر
عمر وهو يلتفت حواليه :اهم هناك بيلعبوا
ادهم :يعنى احنا بندور عليهم وهما بيلعبوا
عمر بأبتسامة:طب يلا نروح نلعب احنا كمان
ادهم بحدة:نعم
عمر :اقصد نروح نجيبهم ..وقال بصوت خافت :ده انت نكد
ذهبوا اليهم فصاحت ايسل عندما رأتهم :ادهم تعالى العب
استغرب ادهم من وجود كريم لكنه ذهب ليسلم عليه
كريم :متستغربش انا قاعد عند خالتى هنا قولت اريح شوية واغير جو القاهرة
ادهم :فعلا هنا الجو مريح للاعصاب
ثم نظر يبحث عن عمر وجده يلعب معهم
ادهم :مش يلا ولا ايه
الين :لا عشان خاطرى يا ادهم سيبنا شوية كمان
ايسل :اه بالله عليك
كريم :خلاص سيبهم شوية تعال يلا العب
ادهم رافضا :لا روح انت كمل
وقف ادهم يشاهدهم وهم يلعبوا
وقع نظره على نور وهى تلعب مثل الاطفال والضحكة على وجهها لم تفارقه حقا هى بريئة
وقعت ياسمين ارضا متأوهه فذهب سريعا عمر اليها
وجدها تضحك
عمر :انتى بتضحكى ولا بتعيطى
ضحكوا جميعا فقال ياسين :شربت المقلب انت كده طلعت
عمر :طلعت ليه
ياسمين :ما انت خرجت انا اصلا كنت خسرت بس كنت بعلب وخلاص فوقعت نفسى عشان اوقع حد تانى
ضحك عمر:ده انتى طلعتى
ياسمين بحدة :طلعت ايه
عمر :ولا حاجة ياستى
..ثم قال :ماليش دعوة انا عاوز العب
كريم :سيبنا نركز بقى
عمر موجها كلامه لها :عجبك كده
ياسمين :وانا مالى حد قالك تيجيلى
______
ايسل :يلا بقى يا ادهم تعال العب
قال ادهم بأستفزاز :مبلعبش مع عيال
سمعته نور فالتقطت الكرة من كريم
كان ادهم خلف الين بمسافة ..فوجهت الكرة فى اتجاه ادهم
لكن ادهم التقط الكرة وضحك لها ليستفزها
الين :ايه يا نور حدفتيها بعيدة
كريم :يلا اطلعى
وبعد مرور الوقت ..شعر ادهم بالملل
ادهم :يلا بقى نروح
ايسل :شوية عشان خاطرى
ادهم بجدية :قولت يلا
_________
سامح :ايه يا ولاد اتأخرتوا كده ليه
ياسين :كنا بنلعب كورة يا بابا
جلست ياسمين بتعب وهى تتأوه :اه يا بابا حتى انا وقعت وقعات
محصلتش لحد قبل كده
ضحكت نور وهى تتذكر شكل ياسمين :ياريتك ياعمو كنت شوفتها كانت هبلة
ضربتها ياسمين وهى تتأوه :اهو انتى
اتت علا :يلا من هنا روحوا غيروا عشان فى ناس جاية النهاردة على العشا
ياسين بفضول:مين مين هاه
علا:استاذ احمد اللى ابنه اخد الفيلا اللى جنبنا
ياسمين :اوف يعنى هما جايين عشان شغل
سامح :لا مش شغل جدكم عزمهم على العشا
نور :يووه انا مش نازلة ماشى
كان اتى جدها وسمع كلمتها الاخيرة :مش عايزة تنزلى ليه
نور :يا جدو مش عاوزة وخلاص
على :لا هتنزلى عشان اعرفه عليكم
ويلا روحوا غيروا قبل ما الناس تيجى
______
نيفين :ايه اللى مبهدلكم كده
ايسل بسعادة :كنا بنلعب
احمد وهو سعيد من اجل سعادة ابنته :ولعبتوا مع مين
ايسل :لعبنا مع احفاد عم على اللى بتشتغل معاه اه وكريم صاحب ادهم
نيفين :وايه اللى جاب كريم هنا
قالت الين سريعا :اصل خالته هنا فهو جه يقعد عندها شوية
احمد :طب اعملوا حسابكم ان احنا هنتعشى عند الحاج على
عمر بأبتسامة كبيرة :اهو هو ده الكلام اللى يدخل الدماغ
نيفين :انا مش جاية
احمد :ليه بقى مش هتيجى
نيفين :عندى برنامج عايزة اتفرج عليه
احمد بنرفزة :يعنى اروح للناس اقولهم مراتى مشغولة اصلها بتتفرج على برنامج ..الله يخليكى متشلينيش
نيفين :لا بعد الشر عليك يا حبيبى متقولش كده
عمر :يسلام على الرومانسية
ادهم :طب انا هروح احضر نفسى
ذهب ادهم الى غرفته فلاحظ الملابس التى وضعها على الكرسى فهذه الملابس لياسين التى اعطاها له الجد
ادهم :انا ازاى نسيتهم
اخذ الملابس وخرج لكن استوقفه احمد
احمد :رايح فين يا ادهم
ادهم :هودى هدوم ياسين
احمد:طب وديهاله واحنا رايحين
تدخل عمر مازحا:اه وماله بدل ما ندخل عليهم بورد ولا شيكولاته نقولهم اتفضلوا هدوم ابنكم اللى قلبها ادهم منكم
ايه ياعمى هى الدنيا اتشقلبت
ضحك ادهم :بابا عمر معاه حق مش هيبقى منظر واحنا ماسكين هدوم ابنهم انا هروح اديهاله وهاجى على طول
_________
فى المطبخ
سعاد :يوه انا نسيت اجيب اللوز
زينب:هتلاقى عندك فى الدرفة التانية
سعاد :لا مهو خلص ..وانا نسيت اجيب
زينب:مش مشكلة يا سعاد
سعاد:اومال هنزوق الكراميل بأيه
زينب:خلاص كملى انتى وانا هروح ابعت عم سالم
ذهبت زينب فرأت ياسمين
زينب :روحى يا ياسمين قولى لعم سالم يجيب لوز
ياسمين :مش قادرة والله يا عمتو اقوم
زينب :ياربى هو انتى دايما كده مبتتحركيش
اتت نور اليها :مالك مزعله نفسك ليه يا زينب
زينب :يارب يخليكى يا نور روحى قولى لعم سالم يجيب لوز عشان الكراميل اللى بتحبيه
نور :طيب
______
كانت تركض نور وهى تنادى على عم سالم فطلبت منه ان يشترى اللوز
رأت ادهم يدخل الفيلا
نور :استنى هنا رايح فين
ادهم :وانتى مالك اوعى من وشى
نور :لا انت دلوقتى مش فى فيلتك عشان تقولى كده انت هنا فى فيلتى
ادهم بسخرية :فيلا مين هو عشان بتشتغلى فيها بقت بتاعتك
اغتاظت نور فكادت ان ترد عليه
لكن قال لها :خدى ودى الحاجات دى لياسين
يلا سلام يا ..نور
______
بعد صلاة العشاء
ذهبت عائلة احمد الى فيلا المنشاوى
رحب بهم الجد على وابنائه
اتت ياسمين وسلمت عليهم وجلست بجانب الين وايسل
قال الجد بصوت منخفض لياسين :اومال فين نور
ياسين :بتلف الطرحة ونازلة
اتت سعاد وقامت بتقديم العصير
فقالت نيفين :هو مفيش شغالين هنا ولا ايه
سعاد :لا احنا بنحب نخدم نفسنا بنفسنا انتى كنتى محتاجة حاجة
نيفين :لا اصل انتى مقعدتيش من ساعة ما جينا
تعجب ادهم من كلامها لا يوجد احد يعمل هنا اذا من هى نور
اتت نور وكانت فى غاية الجمال مرتدية فستان موف وبه حزام فضى اللون وارتدت طرحة فضية
الجد :اهى نور جت ..اقدملكم حفيدتى نور
البارت ال 16
اتت نور وكانت فى غاية الجمال مرتدية فستان موف وبه حزام فضى اللون وارتدت طرحة فضية
الجد :اهى نور جت ..اقدملكم حفيدتى نور
نظروا اليها جميعا وكانت الصدمة تملكت من ادهم
ذهبت نور لتسلم عليهم واتت عند ادهم وضحكت له ضحكة
انتصار وسلمت عليه وقالت له بصوت خافت لا يسمعه الا هو
نور :عرفت بقى انا مين
وتركته وذهبت لتجلس بجوار والدتها
نظرت اليه وجدته مازال ينظر اليها ..فرمقته بغضب
فقال على :ايه يام ياسين مش هنتعشى ولا ايه
علا :لا ازاى يلا اتفضلوا
جلسوا جميعا على المائدة كانت نور جالسة وامامها ادهم فى الكرسى المقابل لها
كان يختلس لها بعض النظرات
بعد انتهاء العشاء
طلب حامد من ياسين ان يأخذهم للحديقة فى الخارج حتى لا يملوا من الجلوس ..خرج عمر معهم لكن بقى ادهم
فجلست نيفين مع زوجات ابناء على
وجلس ادهم مع الجد وابناءه
على :مخرجتش ليه يابنى معاهم
ادهم :لا انا مستريح هنا
ظلوا يتحدثوا فى موضوعات عديدة
فرن هاتف ادهم فخرج للحديقة ليرد
____
كانوا جالسين جميعا فى الحديقة ماعدا نور
زينب :نور حبيبتى ودى العصير ده لادهم
نور متذمرة :لا مش هودى حاجة
زينب بحدة:قولتلك وديه يلا
ذهبت نور اليه وجدته مازال يتحدث فوقفت امامه
ومدت يدها لتعطيه العصير لكنه لم يعيرها اى اهتمام
استشاطت غضبا فاستدارت لترحل
لكنه كان انهى المكالمة
فقال :انا قولتلك تمشى
نور بغيظ:يسلام وهو انا هستناك تقولى ولا ايه
ادهم ببرود :انتى مقولتيش ليه انك
قاطعته نور قائلة بسخرية :انى حفيدة على المنشاوى ..وهو انت بتدى لحد فرصة يقول حاجة ..ده انت كل ما تشوفنى تغلط فيا..لسانك متبرى منك
ادهم هو يزفر :بصى من غير طولة لسان ..انا زهقت مش كل ما اشوفك لازم اتخانق معاكى ..وخلاص متزعليش
مع ان انتى كمان غلطتى فيا..
نور مدافعة عن نفسها :لا انت اللى كنت بتبدأ
ادهم :خلاص خلاص انتى مبتتعبيش من الخناق
احنا كل ما نشوف بعض لازم نتخانق..
ابتسمت نور :طيب خلاص ..وانا كمان زهقت
ادهم :بس تصدقى كان لايق عليكى دور الراعية والشغالة
نظرت له نور بضيق :تانى ..اهو انت اللى عايز تتخانق
ضحك ادهم مما ظهرت نواجزه فجعلته اكثر وسامة
ادهم :انا بهزر انتى مبتهزريش ولا ايه
نور :لا بهزر ..يلا انا هروح اقعد معاهم
ادهم :ايه هاتى العصير انتى طمعتى فيه ولا ايه
ابتسمت له نور واعطته العصير ورحلت
_______
فى صباح اليوم التالى
كان ادهم جالس فى الحديقة يرتشف قهوته وامامه اللابتوب الخاص به ..فأتت الين
الين :صباح الخير يا ادهم
ادهم :صباح النور ..ايه اللى مصحيكى بدرى كده
الين :عادى يعنى
ادهم :انتى كنتى عايزة حاجة
الين بتردد:هو احنا هنفضل كده كتير
ادهم :مش فاهم ..ممكن توضحى
الين :يعنى طنط خليتنى اجى عشان نقرب من بعض اكتر بس بالعكس احنا مش بنقعد مع بعض خالص
ادهم بجدية :بصى يا الين انتى عارفة كويس انى انا جاى هنا لشغل فطبيعى هكون مشغول طول الوقت
وانا بقى مش فاضى للتفاهات اللى انتى بتقولى عليها دى
الين وقد ادمعت عيناها:تفاهات..بقى انا بقول تفاهات
وتركته وذهبت
لام ادهم نفسه على ما تفوه به وضرب بيده الطاوله بغضب
ادهم :ايه اللى انا هببته ده
اتى عمر اليه وجلس امامه
عمر :مالك يا ادهم ..والين معيطه ليه ..
لم يجيب ادهم
عمر :اه يبقى اكيد قولتلها حاجة تزعلها ..منا عارفك بترمى دبش
ادهم :عمر انا عايز اتمشى شوية انا خارج
______
حامد وهو مشغول بقراءة الملف :سامح فين ياسين
سامح وهو يبحث عن ابنه :تلاقيه فى الاسطبل ..كنت عايزه فى حاجة
حامد:كنت هبعته بالملف ده يوديه المزرعة
سامح :طب هاته انا هقوله
ذهب سامح الى ابنه وجده بالفعل فى الاسطبل
سامح :عرفت هتقوله ايه
ياسين :خلاص هى كيميا سلام
_____
دخلت الين الى غرفتها باكية
لكن قبل ان تدخل رأتها ايسل فدخلت خلفها
ايسل :مالك يا الين بتعيطى ليه
الين :مفيش يا ايسل ..مخنوقة شوية بس
ايسل :من ايه .هو فى حد ضايقك..ادهم قالك حاجة تزعلك
الين نافية :لا مفيش
ايسل :طب تعالى نخرج نتمشى شوية
الين :لا مش عاوزة
ايسل :لا يلا قومى معايا
انصاعت لها الين وخرجوا سويا
-__________
خرجت من بوابة الفيلا وهى تركض بفرستها
فى طريقها رأت ادهم امامها فشدت لجام الفرسه لتتوقف
ادهم :رايحة فين على الصبح
نور :وانت مالك ..ثم قالت عندما استدركت ما قالت
نور :اسفة بس انا متعودة كل ما اشوفك لازم اتخانق معاك
ابتسم ادهم :طيب انزلى
عقدت نور جبينها :انزل ليه
ادهم :هفضل باصص لفوق كده كتير
همت ان تنزل لكن قدمها شبكت فى الحلقة الموضوعة على الفرسه
فكادت ان تقع لكن امسكها ادهم
ادهم :حاسبى .. على مهلك محدش بيجرى وراكى
دفعته نور بعيدا عنها
نور :انا كنت هعرف انزل لوحدى مكنتش محتاجة مساعدتك
وبعدين تمسكنى كده بتاع ايه
ادهم :اه اومال مين اللى كان هيقع دلوقتى ..يعنى كنت اسيبك تقعى
انا غلطان كنت المفروض اسيبك تقعى
واستدار ليرحل
نور :انا اسفة .مكنتش اقصد..خلاص بقى انا مبحبش اعتذر كتير
التفت اليها ادهم بضيق
نور :هو انت لسه زعلان
ادهم بضيق:لا .
نور :شكلك متضايق..انا اعتذرت خلاص
ادهم :مش منك..مقولتيش كنتى رايحة فين
نور وهى تنظر للفرسة :ابدا كنت بمشى الين شوية ..فراغ بقى
نظرت اليه وجدته ينظر على الفرسه
نور :بتعرف تركب حصنه
ادهم بتعجب من سؤلها :اكيد ..بس بتسألى ليه
نور :طلاما بتعرف تركب يبقى اكيد هتعرف تتعامل معاها
واعطته لجام فرستها
ادهم :طلاما بتاعتك يبقى متعودة عليكى ..يبقى مش هتخلى حد يركبها غيرك
نور :لا الين طيبة خالص ..ثم قالت مازحة:دى لفت على عيلتك كلها
هم ادهم ان يركبها لكنها استوقفته قائلة
نور:تدفع كام الاول اصل انا مبعملش حاجة لله وللوطن
ضحك ادهم:اللى انتى عوزاه ..بس انتى اللى عرضتى عليا
نور :اتفضل بس ابقى هاتهالى على الاسطبل اللى فى الفيلا
ادهم :حاضر ..
___________
خرجت الين وايسل
ساروا دون ان يتحدثوا اكتفوا فقط بالنظر على البقع الخضراء
والنخل المترنح .والسماء الصافية التى تزينها العصافير
تذكرت الين شئ فقالت :ايسل انتى تعرفى تروحى لوحدك
ايسل بأستغراب :اه .هو انتى رايحة فى حته
الين :اه ..روحى انتى
ايسل :هتروحى فين عشان لو حد سأل عليكى
ضحكت الين بسخرية :يسألوا عليا ..بصى هروح اشوف حاجة وجاية
________
امسكت الين هاتفها وترددت قليلا قبل ان تتصل
لكنها ضغطت على الاتصال
اتى اليها صوت كريم فردت :كريم
كريم :ازيك يا الين
الين :كريم ممكن اتكلم معاك شوية ..بس مش هينفع على التليفون
كريم :طيب ينفع كمان شوية
بكت الين ولم تجيب
كريم بقلق :الين انتى كويسه
الين :لا مش كويسه
كريم :ادهم عملك حاجة
لم تجيب وظلت تبكى
كريم :طب انتى فين دلوقتى وانا جايلك
وصفت له الين مكانها واغلقت
________
كانت ايسل تمشى وتحدث نفسها
ايسل :يعنى انا اروح اقولهم ايه دلوقتى..اوف بقى انا كان مالى
اتى اليها شخص وقال بصوت افزعها :بتعملى ايه
فزعت ايسل ونظرت خلفها وجدته ياسين
ايسل :ايه يا ياسين الهزار ده
ياسين :ماشية بتكلمى نفسك ..
ايسل :يعنى هو انا لاقية حد اتكلم معاه
ياسين :اومال انا ايه ..اتفضلى صدعينى
نظرت اليه ايسل بضيق :شكرا
ياسين :ايه قفشتى ليه انا بهزر ..مالك بقى
ايسل :مفيش ..بس زهقانة شوية
ياسين :لو عايزة تتكلمى انا سامعك ..ميغوركيش شوية الهزار دول ..لكن انا جد جدا
ابتسمت ايسل :مفيش حاجة اقولها صدقنى بس انا زهقانة ومش عارفة من ايه
ياسين :طب تعالى انا هوديكى مكان هينسيكى اى زهق
قالت ايسل بخوف :لالا شكرا
ياسين :متخافيش مش هخطفك تعالى بس
________
كانت ياسمين تغنى وهى جالسة على الارجوحة امام فيلتهم
وغامضة عيناها
اتت سعاد اليها :انتى ياهانم
فتحت عيناها :نعم يا عمتو
سعاد :روحى هاتيلى الحاجات اللى فى الورقة دى
ياسمين :واشمعنى انا اللى اجيب خلى اى حد يجيب
سعاد :حظك ان مفيش حد هنا
حتى عم سالم جدك بعته للمزرعة
ياسمين :هاتى ..مفيش حد بيجى غير عليا انا
كانت تسير وهى عابسة
اتى اليها شخص :مالك ماشية مكشرة كده ليه
ياسمين :هو انت ..عايز ايه
عمر :عايز ايه ..ابدا هو ازاى اروح للسوبر ماركت
وصفت له ياسمين
عمر :طب وانتى رايحة فين
ياسمين :رايحة هناك بردو
عمر :طب ما اجى معاكى
ياسمين بحدة:تيجى معايا فين وبعدين وقفتنا كده غلط
يلا سلام
عمر :استنى بس ..منا كده ممكن اتوه وهيبقى ذنبى فى رقبتك
ابتسمت ياسمين :طب امشى اودامى ومتكلمنيش طول الطريق
_________
اتى كريم لالين
ليجد عيناها حمراء من البكاء
كريم بفزع :الين فى ايه
الين ببكاء :كريم انا محتجالك انت الوحيد اللى هتساعدنى
البارت ال 17
اتى كريم لالين
ليجد عيناها حمراء من البكاء
كريم بفزع :الين فى ايه
الين ببكاء :كريم انا محتجالك انت الوحيد اللى هتساعدنى
كريم :طيب ممكن تهدى الاول ..طب احنا مش هينفع نقف كده تعالى معايا
ذهبوا معا الى احدى الكافيتريات ..ليجلسوا على طاولة مطلة على الطريق
كريم :اهدى بقى احنا من ساعة ما مشينا وانتى مبطلتيش عياط
ليأتى النادل :تحبوا تشربوا ايه
كريم :اتين ليمون..
وبعد ان ذهب الجرسون
كريم :ممكن بقى تقوليلى فى ايه .بس ارجوكى من غير عياط
الين :انا خلاص مش عارفة انا عايزة ايه انا حاسة انى زى اللعبة اللى بيحركوها فى كل مكان
كريم :الين انا مش فاهم حاجة
الين :ماما تقولى حبى ادهم وانا حاضر ..روحى معاهم قربى منه وانا المطلوب منى حاضر وبس
محدش بيحس بيا خلتنى اتخطب لادهم وانا مش فارقة معاه
كريم :الين ادهم بيحبك
الين بعصبية ودموعها تسيل :بس متقولش بيحبنى انا عارفة انه عمره ما حبنى وانا ..
لم تكمل كلامها فقاطعها مجئ الجرسون
كريم :انتى ايه ..كملى
نظرت له الين :ولا حاجة
كريم :طب اشربى واهدى كده
_________
اوصل عمر ياسمين لبوابة الفيلا وكان حاملا الاغراض التى قامت بشرائها
ياسمين بأبتسامة وهى تحاول ان تأخذ الشنط منه :بجد شكرا يا عمر
عمر :شكرا على ايه مفيش حاجة
ياسمين :طب هات الحاجة ولا انت طمعت فيها
ضحك عمر :طب ادخلى وانا هدخلهم
ياسمين رافضة :لا هاتهم
عمر بجدية :قولتلك انا هدخلهم يلا ادخلى انتى
دخلت ياسمين وخلفها عمر
فأتت سعاد :ايه يا ياسمين فين الحاجة ..فنظرت خلف ياسمين
وجدت عمر..فنظرت مرة اخرى لياسمين بمعنى (فى ايه )
ياسمين بصوت خافت :هقولك بعدين يا عمتو بس خدى منه الشنط
سعاد :اهلا يا استاذ عمر
عمر مازحا :بلاش استاذ دى ده حضرتك زى اختى الصغيرة
ضحكت سعاد :اذا كان كده معنديش مانع ..وذهبت لتأخذ منه الشنط
سعاد :شكرا يا عمر تعبناك معانا
عمر :ولا تعب ولا حاجة ..استأذن انا
سعاد :استنى اشرب حاجة الاول
عمر :مرة تانية ان شاء الله ..وقبل ان يمشى نظر لياسمين وذهب
انتبهت سعاد له وهو ينظر لياسمين
فذهبت لتضع الشنط فى المطبخ وعادت لياسمين
سعاد :ممكن بقى تفهمينى فى ايه ..ايه اللى خلى عمر يجى معاكى ويشيل كمان الشنط ..يلا انطقى
ياسمين :ادينى فرصة يا عمتو اقول ..الاول تعالى معايا فى اوضتى وانا احكيلك
ذهبت معها سعاد وقامت ياسمين بقص عليها ما حدث
سعاد :ااه قولتيلى ..تانى مره متعمليش كده فاهمة
ياسمين :والله انا كنت ماشية لوحدى
ضمتها سعاد :حبيبتى انا عارفة ياسمين من غير ما تحلف
بس انا خايفة عليكى
قبلتها ياسمين :ربنا يخليكى ليا يا عمتو
_______
فى مكان تملأه الاشجاروالزهور وصوت غناء العصافير
ياسين :ايه رأيك بقى فى المكان ده
ايسل بأبتسامة :واو حلو اوى ..
ياسين :ده يعتبر المكان السرى بتاعى انا ونور وياسمين
واحنا صغيرين كنا بنحب نيجى نلعب هنا
لتبتسم هى وتدور بعيناها لتتفقد هذا المكان
وقعت عيناها على تلك البحيرة الصافية ..ركضت نحوها بسعادة
لتنظر فيها لتجد انعكاس صورتها ..فزبزبت صورتها بحركة يدها وهى تضعها فى المياه
بينما ياسين ظل واقف مكانه شرد فى ابتسامتها
ايسل وهى مازالت واقفة امام المياه :بجد مكان حلو اوى ..شكرا يا ياسين
نظرت له وجدته شارد فلوحت بيدها امام وجهه..ثم غمست يدها فى الماء لتنفضها امام وجهه
ايسل بصوت عالى :ياسين
انتفض ياسين :ايه فى ايه..ثم اخذ مسح وجهه
ضحكت ايسل :ده انت مش هنا خالص عماله اكلمك
ياسين :كنتى بتقولى ايه
ايسل :كنت بقولك شكرا على المكان الجميل ده
ياسين :اى خدمة..
ايسل :مين يصدق ان انت الواد الرخم اللى قابلته اول مره..بجد مكنتش طيقاك
ياسين بنصف عين :انا رخم بذمتك
ايسل:بصراحة اه فى الاول لما اتريقت عليا
ياسين بأبتسامة :ودلوقتى
خجلت ايسل ونظرت بعيدا
فقالت بتلعثم :احنا مش هنروح ولا ايه ..انا كده هتأخر
ياسين :طب يلا
_______
يركض بسرعة وهو على ظهر الفرسه
فرأى اخته وهى تضحك مع ياسين
فنزل من على الفرسه وذهب اليهم
ادهم بحدة:ممكن اعرف انتوا بتعملوا ايه
قالت ايسل :مكناش بنعمل حاجة ده ياسين
قاطعها ياسين قائلا:اهدى كده يا استاذ ادهم مفيش حاجة
اختك كانت بتتمشى وانا جيت معاها لتتوه بما انها متعرفش حاجة
ادهم :طيب تعالى يلا ..وانت يا ياسين خد الفرسه معاك
اخذ ياسين الفرسه ورحل
نظر ادهم الى اخته متوعدا :انتى حسابك معايا فى البيت
نظرت له ايسل بخوف :والله انا معملتش حاجة
________
كانت نور فى الحديقة تسقى الزهور وتدندن ببعض الكلمات
فرأت ياسين معه الفرسه فركضت نحوه
نور :ايه ده الفرسه كانت مع ادهم
ياسين بضيق :اه مهو ادهالى
نور :مالك يا ياسين فى حاجة حصلت
قص لها ما حدث
ياسين :مفيش حاجة مستاهله عشان يتعصب كده
نور وهى تضربه بخفه على رأسه
نور :انت غلطان يا ياسين..وهو بصراحة ليه الحق
ياسين :غلطان فى ايه بقى
نور :عشان تاخد ايسل معاك فى المكان ده وانتوا لوحدكم
ياسين :انا مفكرتش فى كده ..انا اخدتها عادى يعنى
نور :اديك شوفت ده ممكن اخوها يزعقلها ومش بعيد يضربها
ياسين :والله انا مفكرتش ان ده هيحصل..طب اروحلها يعنى
نور :تروح لمين وبعدين انت خايف كده ليه
ياسين :انا مش خايف بس مش عايزها تتأذى بسببى وده غلطى انا اصلا
نور :طب اهدى هاه اهدى
واستدارت لترحل
ياسين :تعالى هنا .ايه اللى خلى ادهم ياخد الين
نور :اصل قابلته الصبح وطلب منى ياخدها
ياسين بعصبية :وانتى ايه اللى يوقفك معاه .. تانى مره متوقفيش مع حد فاهمة
نور :حاضر ..بس اديك شوفت انت اتضايقت ازاى لما عرفت انه وقف معايا مبالك هو بقى لما شافك بتتمشى مع اخته
__________
دخل ادهم الفيلا
ايسل ببكاء :سيب ايدى بقى
اتى احمد على صوت بكاء ابنته
احمد :فى ايه
ادهم :اسأل بنتك يا بابا ..
احمد :اهدى يا حبيبتى وقوليلى فى ايه
ايسل :والله يا بابا معملتش حاجة كل الحكاية ان …….
احمد بهدوء :طب ينفع اللى انتى عملتيه ده
ايسل بخجل :لا ..بس انا مكنش فى دماغى حاجة خالص ولا جه فى بالى انه غلط
احمد :طيب خلاص روحى يلا اغسلى وشك
ذهبت ايسل فقال ادهم بعصبية :فين الموقف اللى اخدته
احمد :ادهم اختك عرفت انها غلطت يبقى خلاص
مفيش داعى للى انت عمله ده
ثم اسطرد قائلا :بس على فكرة سبب العصبية اللى انت فيها دى مش سببها اختك
ثم تركه ورحل
جلس على المقعد وهويزفر يجد الين تدخل
ادهم :انتى كنتى فين
الين دون ان تنظر له :خرجت اتمشى شوية ..بعد اذنك وكادت ان ترحل لكن استوقفها ادهم
ادهم :الين ..انامكنتش اقصد انى اكلمك كده
الين :خلاص يا ادهم مفيش حاجة
فأتت نيفين وهى متأبطة ذراع عمر
نيفين بتعب :اخص عليك يا عمر
عمر بضحك :وهو انا عملت ايه يا خالتو
نيفين :بقى انا اقولك مشينى مش تجبلى ورم
عمر :اعملك ايه مش انتى اللى طلبتى تتمشى
لتنظر اليه بألم وهى ممسكه قدميها بتعب
نيفين متسائلة :ادهم فين احمد
ادهم :خرج من شوية بس شكله راح المزرعة
نيفين :طيب انا هدخل اوضتى
عمر:مالك يا ادهم ..شكلك متضايق
ادهم :مخنوق اوى
عمر :من ايه
ادهم :مش عارف بس مخنوق
لينظر عمر حوله متسائلا:اومال فين ايسل
ادهم بغضب :اهى قاعدة فى اوضتها جوه
عمر :انت مالك بتتكلم كده ليه ..قولى فى ايه
لكنه لم يتحدث ..فتركه عمر وذهب لحجرة ايسل
وقصت له ما حدث
فتركها وعاد مرة اخرى لادهم
عمر :الحكاية ما تستهلش كل اللى عملته ده يا ادهم
انت اصلا كنت متضايق وروحت طلعته فى اختك
يلا ادخل صالحها
نهض ادهم :طب انا هنزل شوية تحت وبعد كده هروحلها
_______
نور :بابا انا رايحة عند ايسل
محمد :ليه هو فى حاجة
نور :عادى يعنى هقعد معاها شوية
محمد :ماشى ..بس متتأخريش
استعدت نور للرحيل فأتت ياسمين
ياسمين :رايحة فين يانور
نور :هروح عند ايسل تيجى معايا
ياسمين :اجى مجيش ليه يلا
نور :استنى هنا رايحة ازاى منظرك ده انتى لابسالى البجامة
ياسمين :طب استنينى عشر دقايق بس
________
وصلت نور وياسمين ووقفوا فى الحديقة
نور :يلا انتى خبطى
ياسمين :لا والله ماحد هيخبط غيرك
نور :انتى اللى جاية معايا يلا انتى
جاء ادهم من خلفهم :هتفضلوا تتعازموا على بعض كتير مين اللى هيخبط
