جواز 1

الاول

الجواز الرابط اللي بين اي اتنين ايه بيخليه ناجح ؟

ايه يخليه مثالي ؟

ويا تري العلاقات الي بتبان قدام الناس مثاليه وناجحة هي كدة فعلا في الحقيقه ؟

ولا قدام الناس حاجة واللي جوة البيوت ومقفول عليه حاجة تانيه ؟

ليه بنحاول نظهر أما أننا ناجحين جدا في علاقتنا بالطرف الآخر أو نظهر أننا مظلومين جدا معاه ؟

كل دي تساؤلات هنشوفها في حكايتنا حكايه الزواج المثالي اللي قدام الناس بيبان ناجح وبيلمع لكنة في الحقيقه ضعيف وهش ومن اول مشكلة بينهار بالكامل

حكايات موجودة في بيوت كتير مقفوله علي صحابها جواها اسرار مبتتحكيش ولو اتحكت الحياة بعدها احيانا بتكون صعبه

في عمارة في أحدي المناطق الراقيه بيسكن ابطال حكايتنا

في الدور الأول العم الكبير محسن الدمنهوري و زوجته ايمان

و في الشقة المقابلة ليهم زوجة الراحل محمود الدمنهوري ابتسام

في الدور التاني الابن الأكبر ل محسن عدي الدمنهوري وزوجتة هايدي وابنها من زوجها الاول كريم

والشقة المقابلة ليهم الابنة الصغري لمحسن مكة الدمنهوري وزوجها (ابن خالتها) انس العامري وبنتهم تالا

في الدور الثالث الابن الأكبر ل محمود وابتسام عمار وزوجتة زهرة

اما لمار الاخت الصغري ل عمار عايشة مع جوزها معتز في بيت عائلة في مكان قريب من مكان عيلتها

و كعادة كل يوم جمعة لازم يتجعمو علي الغدا

اجتمع الستات من بعد صلاة الجمعة في المطبخ عشان يحضرو الاكل ، و الرجاله منهم اللي دخل نام ومنهم اللي قاعدين يتسامرو سوا ،

عند الستات

ابتسام بوجه بشوش

_ يلا يا بناتيت يا حلوين همو شوية عشان نلحق نخلص انا مش عارفه المحشي دا كان شورة مين بالظبط

ايمان بضحك

_ شورة ابنك يختي هو اللي قال نفسي في المحشي قدام عمة و عمة طبعا أصدر فرمان أن الغدا يوم الجمعة يكون فية محشي ما انتي عارفة عمار عندة حاجة تانيه

ابتسام

_ ربنا ما يحرمنا من لمتنا دي ابدا ( انتبهت ل سرحان زوجة ابنها ) مالك يا زهرة سرحانة و مكشرة كدة ليه ؟

زهرة حاولت تبتسم

_ ابدا يا ماما مفيش حاجة .. احم هو هو لمار هتيجي انهاردة ولا ايه ؟

ابتسام فهمت سر لخبطتها

_ لاء يا حبيبتي قالت معتز مرضيش بس هتحاول تيجي اخر النهار شوية تسلم وتمشي علي طول

زهرة اكتفت بهز راسها وحاولت ترسم ابتسامة بسيطة علي وشها عشان محدش يحس بحاجة

بعد حوالي ساعتين اتجمعت العيلة كلها علي الغدا

محسن … الله الله ايه الاكل الحلو دا تسلم ايديكم

ايمان … تسلم يا حج بصراحة المحشي دا عمايل هايدي و زهرة و المكرونه بالبشاميل عمايل مكة وانا و ابتسام الفراخ والسلطة

محسن … تسلم ايديكم كلكم

عمار … تسلم ايديك يا زهورتي المحشي تحفة وكان نفسي اوي فيه

زهرة ببتسامة … تسلم يا حبيبي بالهنا والشفا

انس .. تسلم ايديكي يا حبيبتي

مكة … تسلم يا قلبي

هايدي … وانت يا عدي مفيش تسلم ايديكي يا مراتي يا حبيبتي ولا ايه هه

عدي ببتسامة …. لا طبعا تسلم ايديكي يا ست البنات

ايمان … شوفي يختي كل واحد عمال يحب في مراتة ازاي ال ما حد قال تسلم ايديكي يا ماما يا حبيبتي ولا عبرونا

ابتسام … خلاص بقا يا ايمان راحت علينا

عمار … دا كلام دا انتم الخير و البركة كله تسلم ايديكم يا حبايبي

عدي … تسلم ايديكم يا قمرات انتم الأساس طبعا

الغدا خلص في جو جميل كله حب وهزار وبعده اتلمو كلهم يشربو الشاي سوا و يأكلو الحلويات

انس بصوت واطي ل مكة … اومال فين تالا مش سامع صوتها

مكة بصوت واطي … نايمة من بدري خلي بالك لو صحيت انت اللي هتشيلها انا ضهري وجعني من الوقفه في المطبخ طول اليوم ومش هقدر اقعد اعافر مع بنتك عشان متجيش قدامهم وتحرجني

انس بضيق … حاضر حاضر يا مكة لما تصحي هخدها

و في ركن تاني كان في حوار تاني داير

هايدي … مالك يا عدي ساكت من اول اليوم وبتحاول ترسم ابتسامة علي وشك فيك ايه ؟

عدي … مفيش يا هايدي ضغط الشغل بس وداخلين صفقة جديدة ف دماغي مشغولة شوية كريم فين ؟ بقالي شوية مش شايفة

هايدي … نايم هو تالا من بدري قربو يصحو خلي بالك انت وعدتة تخرجو بكرة اوعي تخلف وعدك بقا انا مبسوطة بالتطور اللي حصل في علاقتكم

عدي … متقلقيش انا كمان طاير من الفرحة أنه اخيرا تقبلني وبدء يقولي يا بابا بدل كلمة عمو اللي كانت مبتنزليش من زور دي وهخدو بكرة افسحو كمان

هايدي … ربنا يخليك لينا يا حبيبي

عدي … ويخليكي لينا يا ست البنات

عمار … مالك يا زهرة اوعي تكوني ضغطتي علي نفسك في المطبخ ونسيتي انك حامل ؟

زهرة … لا يا حبيبي انا تمام انا بس

زهرة مكملتش كلامها بسبب جرس الباب اللي رن وطلع اللي جه اسوء مخاوفها فعلا لمار اخت عمار الصغيرة

لمار … السلام عليكم جميعا وحشتوني كلكم اوي

محسن … مش كنتي اتغديتي معانا انتي و جوزك يا بنتي

لمار … معلش يا عمي اخوات معتز جايين بكرة عند حماتي علي الغدا فكنت بساعدها في البيت والاكل عشان مسبهاش لوحدها خلصت وجيت علي طول

ايمان … ربنا يجعله في ميزان حسناتك يا بنتي

لمار … اللهم امين يا طنط

عمار … وحشتيني يا لولو بقالي كام يوم مشفتكيش

ابتسام … دا ع اساس مش كل يوم تتكلمو مرة واتنين

لمار … الله وانتي مضايقة ليه يا ست ماما اخويا حبيبي لتكون زوزا هي ال مضايقة لا لا متقوليش

زهرة بهدوء … لا طبعا ربنا يخليكم لبعض

لمار … امين يا رب عتريس اللي جوة دا عامل ايه حبيب عمتو

زهرة … الحمد لله

لمار … انتي متأكدة يا بت يا زهرة أنه واحد بس مش تؤام

زهرة … لا واحد بس أن شاء الله

لمار … اومال مالك منفوخة اوي كدة ليه ( ضحكت جامد )

عمار بضحك … والله لسه بقولها دا مش حمل طبيعي دا اللي يخليكي تضـ,ـربي كدة

ابتسام … ماخلاص ياختي انتي وهو خليكي في بطنك اللي مش باينة دي كانك حامل في زيتونة

لمار كشرت … انا يا ماما حامل ف زيتونة عشان سمبتيك ومتخنتش زي مرات ابنك يبقي بنتي زتونة

ايمان بتفهم … يختي ربنا يقومكم انتم الاتنين بالسلامة يارب .. ( ثم التفت ل مكة ) ما تجيبي الرز بلبن اللي عملتية يا مكة ولا هتدوقي انس وبس

مكة … حاضر يا حبيبتي حالا

عمار بصوت واطي لأمة … مكنش لازم تحرجي لمار كدة قدامنا هي مش بتحب الهزار دا وانتي عارفه

ابتسام بضيق … وانتم لما كنتم هتبدؤ وصلة التريقة علي الغلبانة دي كان عادي ؟

عمار بتبرير … بس زهرة مبتزعلش وعارفه أن بنضحك معاها

ابتسام … اسكت يا عمار عشان مترفعليش الضغط اسكت

تلفون هايدي رن باسم ماماتها استأذنت منهم ودخلت ترد في البلكونة وعيون عدي كانت عليها

هايدي … أيوة يا ماما عاملين ايه ؟

هدي … الحمد لله انتي عامله ايه وكريم و عدي

هايدي … الحمد لله مال صوتك ؟

هدي … بصراحة يا هايدي ابوكي محرج عليا اقولك بس انا شايفة انك لازم تعرفي

هايدي بقلق … في ايه يا ماما قلقتيني بابا كويس ؟

هدي … كويس يا حبيبتي بس اصل وليد طليقك اتصل بيه امبارح وقالو إنه هيرجع قريب و و يعني كان

هايدي … وايه يا ماما الله يخليكي قولي

هدي … بيقول راجع ياخد كريم معاه ومش هيسيبو تاني ابدا

هايدي بصوت مخنوق … كريم مين اللي ياخدة هو متنازلي عن حضانتة اول ما أطلقنا هو لعب عيال ولا ايه ؟

هدي … ابوكي مسكتلوش والله وقالو لو قربت منهم جوزها مش هيسيبك ربك يستر بقا ابوكي شايف أنه ولا هيجي ولا حاجة وانة بيقول اي كلام لأجل يعكنن عليكي وخلاص

هايدي .. وافرضي جاي فعلا اعمل انا ايه

هدي … اهدي يا حبيبتي الحضانة معاكي قانونا وجوزك بيحب ابنك وعوضة عن حرمانة من العيال اكيد مش هيقف يتفرج يعني اهدي بس كدة وقولي يارب

هايدي … يارب يارب استر انا مقدرش ابعد عن ابني يارب

هايدي قفلت مع ماماتها وحاولت تبان عادية بس عدي حس انها متغيرة قرب منها وكلمها براحة

عدي .. مالك ؟ بابا وماما كويسين ؟

هايدي … اه الحمد لله كويسين .. لما نطلع هقولك علي كل حاجة بس بلاش كلام دلوقتي ممكن

عدي … ماشي يا هايدي بس فكي كدة بلاش التكشيرة دي

ابتسمت هايدي ابتسامة بسيطة و حاولت تندمج في الكلام مع البنات …

في المطبخ كانت زهرة بتعمل قهوة ل محسن لما دخلت عليها لمار و عمار وهما بيهزرو وبيصبو بيبسي لنفسهم

لمار بضحك … بس بقا يا عمار مش قادرة ابطل ضحك همـ,ـوت منك حرام عليك

عمار بضحك … انا جيت جمبك انا بقولك اللي حصل بس

لمار بصت ل زهرة … بس سيبك انتي ايه اللون الجامد اللي ضـ,ـربتيه في شعرك دا ( ضحكت بتريقة )

زهرة .. ماله ع فكرة عجب عمار

لمار بصت ل اخوها … دا عجبك ازاي دا دي كأن صفار بيض طافح في شعرها

عمار بضحك … يخربيت عقلك بس بقا عشان بعد كدة كل ما هبصلها مش هشوفه غير كدة بجد

زهرة بضيق … دا ع اساس أنه مكنش عجبك ؟

عمار … ماهي اللي خلتني اشوفو كدة

لمار … طالما مش بتعرفي تختاري الوان صابغة بتعملي لوحدك ليه ابقي قوليلي وانا ابقي اقولك تحطي ايه يليق عليكي يا زوزا يلا كله عشانك يا كبير

عمار … قلب الكبير والله يلا بقا نشرب بيبسي ف بلكونة ع رواقة سوا

لمار … يلا لاني قربت اروح كمان

عمار … متقلقيش يا قلبي هوصلك

وخرجو من غير ما يبصو علي اللي دموعها علي خدها بسبب هزارهم التقيل اللي بيهد ثقتها بنفسها وبيخليها كارهه اللمة دي كل يوم عن اللي قبلة

برة بدءت اللمة تنفض من بعد ما عمار خد لمار يوصلها عدي كان اول اللي مشي عشان يعرف هايدي مالها استأذن منهم وخد كريم وهايدي وطلعو شقتهم و بعدهم زهرة استأذنت و طلعت شقتها وبعدها ابتسام ومكة وانس

في شقة انس ومكة

انس بضيق … ممكن اعرف قابلة وشك عليا ليه ؟ ما كنتي كويسه تحت وعماله تضحكي

مكة … يعني انت مش عارف عملت ايه تحت ؟

انس بنفي … انا معملتش حاجة طلبتي مني اخد تالا لما تصحي و عملت كدة في ايه بقا ؟

مكة … يا سلام مخدتش بالك انك طفحت طبقين رز بلبن ومطلعتش منك حتي تسلم ايديكي يا حبيبتي وكل واحد كان عمال يشكر في عمايل مراتة وانت قاعد ساكت كان القطة كلت لسانك

انس بانفعال … ماتحترمي نفسك شوية بقا يا مكة ولا عشان بسكت واعدي هتسوقي فيها

مكة برفعه حاجب … لا والله بتسكت علي ايه أن شاء الله انت غلطان وبتقاوح كمان ايه البجاحة دي

انس بغضب … والله ما في حد بجح غيرك انتي يا شيخة انا هسبلك الشقة كلها وهغور في اي داهيه اوعي كدة من وشي

مكة بصوت مرتفع … ماااشي يا انس براحتك اوي بس والله اللي حصل دا ما هعدية لما ترجع بس اووف عيشه تقرف الواحد مستحمل الأرف دا وهو كمان اللي مش عجبه

أما في شقه عدي وهايدي

هايدي حكت ل عدي كل حاجة وهي دموعها نازله ونبرة صوتها كلها خوف وبعد ما خلصت اتكلم عدي بكل هدوء

عدي .. طب ممكن اعرف سبب الدموع دي كلها ايه ؟ وليه نبرة الخوف اللي بتتكلمي بيها دي ؟

هايدي … انا خايفة فعلا يعملي مشاكل يا عدي

عدي … نعم حضرتك خايفه من ايه ومشاكل ايه دي اللي يقدر يعملهالك انتي مش متجوزة سوسن يا هايدي متزعلنيش منك وخدي بالك من كلامك

هايدي ببتسامة … متقفش طيب انا مقصدش بس انا مش حبه اعملك مشاكل خصوصا الفترة دي انا عارفه انك داخل علي مشروع مهم الايام دي ومحتاج كل تركيزك و وقتك

عدي وهو بيمسك ايديها ويوقفها قصادة ..

مفيش حاجة اسمها مشغول أو ورايا شيء مهم لأن ببساطة مفيش حاجة اهم منكم عندي يا حبيبتي

هايدي … ربنا يخليك لينا يارب

عدي … ويخليكو ليا وتفضلو منورين حياتي ديما

هايدي .. ياسلام لو تفضل هادي كدة علي طول

عدي … نعم ! قصدك ايه بقا ؟

هايدي … ولا حاجة بهزر معاك متقفش بقا

ابتسم لها وحـ,ـضنها

هايدي وهي بتبادله الحـ,ـضن … بحبك يا عدي

عدي بشرود … وانا بحبك يا ست البنات

غمضت عينيها بحزن علي اللقب اللي مصر يندهلها بيه واللي عرفت بالصدفة أنه نفس اللقب اللي كان بيقولو لطلقيتة زمان حاولت تطرد كل الشكوك اللي بقالها مدة بتطاردها من دماغها ورددت جواها جملة واحدة بس. (( هو بيحبني انا وبس ))

في شقه عمار كانت زهرة قاعدة قدام مرايتها بتسرح شعرها وهي سرحانه في حياتها مع عمار محستش بلي دخل ووقف وراها وبصلها باستغراب شديد علي سرحانها دا

عمار بصوت عالي … ايييي زهرة روحتي فين لحد كدة

زهرة بخضه … بسم الله الرحمن الرحيم حرام عليك يا عمار خضتني بجد

عمار … سلامتك من الخضه ياقلبي كنتي سرحانه في ايه كل دا انا بقالي شوية واقف وراكي وانتي مش حسه بيا خالص

زهرة بتهرب … ولا حاجة بفكر في البيبي بس

عمار بشك … زهرة مالك انا بقالي مدة حاسس انك متغيرة في ايه ؟

زهرة ببتسامة … مفيش حاجة يا حبيبي انا كويسه هو قلق علي البيبي بس مش اكتر

عمار … لا متقلقيش هيطلع اسد زي أبوة ويبقي ظابط كمان زي كدة ويبقي معاكي في البيت اتنين ظباط اد الدنيا

زهرة … لا ظابط لا كفايه عليا واحد

عمار … نعم يختي مالهم الظباط مش عجبينك ليه بقا هه ؟

زهرة .. انا اقدر اتكلم انا بس بقول كفايه ظابط واحد في حياتي يا حبيبي

عمار … تؤ هنبقي اتنين أن شاء الله انا حاسس أنه هيبقي ظابط زي

زهرة … يجي بالسلامة ويعمل اللي هو عاوزة

عمار … متقلقيش حبيبتي احم هو هو لازم ننزل نشتري حاجات الشهر دا مينفعش تتاجل للشهر الجاي

زهرة … ليه تتاجل الفلوس كدة هتتصرف منك واحنا لما صدقنا مسكنا مبلغ ع بعضه من فلوس المعرض

عمار … اصل بصراحة معتز جوز لمار معهوش فلوس يجيب لبس للبيبي وانا مش هعرف انزل اجيب ل ابني واختي في ظروفها دي

زهرة … اومال تنزل تجيب بالفلوس كلها ليها هي وانا ابني يتولد من غير هدوم ولا مستلزماتة ؟

عمار .. لا طبعا انا مقلتش كدة بس الشهر الجاي هتصرف أن شاء الله

زهرة بضيق … كدة ميرضيش ربنا يا عمار بص الحل الوسط عشان مزعلكش ولا انت تكسر بخاطري وتزعلني اقسم الفلوس ال موجودة دلوقتي بيني وبينها والشهر الجاي يحلها ربنا

عمار بعصبيه … نعم ؟ وانتي ايه يزعلك في حاجة زي كدة اصلا ال جاي دا ابني انا حر اجبلو الشهر دا ولا الشهر الجاي ولااااا مجبش خالص انا حر زهرة مليون مرة اقولك لما اقرر حاجة تخص لمار بلاش تقفي قصادي فيها عشان انتي اللي بتزعلي ف الاخر تمام عن ازنك هسبلك الأوضة كلها عشان تعيطي بقا وتعيشي دور المكسور بخاطرها كويس سلام

يتبع ….

الفصل الثاني

بعد ما عمار زعق في زهرة وسابها وخرج فضلت هي جامدة مكانها متحركتش حتي دموعها اللي اتجمعت في عينيها منزلتش فضلت مكانها وقت كتير سرحانة وبتفكر لامتي هتفضل عايشة كدة لامتي هتفضل ساكتة علي تريقتهم عليها و علي مشاركة لمار ليها في كل حاجة تخص جوزها حب اهتمام فلوس وقت وكانة متجوز اتنين وبيحاول ديما يعدل بينهم

فاقت من سرحانها علي ايد عمار اللي بتشدها توقفها قصادة بصتلة وعينيها مليانة دموع ونظراتها فيها كل الكلام اللي كتماه في قلبها وهو مش قادر يقراه

عمار بحب ..

انا اسف عارف اني انفعلت عليكي شوية بس والله مضغوط في القضية الجديدة اللي مسكتها وبعدين يا زهرة انتي ديما بتخليني اخرج عن شعوري واتعصب

بصتلة بسخريه ضحك بخفة وكمل ..

اه انتي بتبصيلي كدة ليه هخاف يعني يا حبيبتي احنا الحمد لله ماديا مستورين وكل شهر بيجيلي ايراد من فلوس المعرض ال مشارك فيها عمي مع مرتبي بتمشي بس لمار جوزها من بعد حوار كورونا دا وهو حالة اتبدل المطعم من بعد ما اتقفل فترة كبيرة ورجع شغلة مش شغال زي الاول خالص ملوش اى مصدر دخل تاني اخواتة الاتنين بنات اكيد مش هيستلف منهم وامه معاشها يادوب مقضيها افرح انا ازاي ب ابني وانزل اشتريلة اغلي حاجة واختي ظروفها بالشكل دا لا معاهم يجيبو هدوم ولا حتي مصاريف ولادة ؟ مقدرش يا زهرة انا روحي ف امي واختي من يوم ما ابويا كان بيمـ,ـوت قدامي ومسك ايدي وضغط عليها جامد وقالي امك واختك في عينيك واتشاهد والسر الالهي طلع وانا حاسس اني مسئول عنهم حتي بعد ما لمار اتجوزت صدقيني اللي بعملة دا بكرة يترد في ولادنا لما يكبرو ولا انتي خسعتي من اول عيل ومش هتجيبلي عيال تاني ولا اية فهميني ؟

زهرة بصوت مخنوق ..

انت بتتعصب عليا ياعمار انا بقيت اخاف منك بعد ما كنت مصدر اماني في الدنيا دي بقيت اخاف منك وبعدين انا عمري ما اعترضت علي اهتمامك ب اختك بس كل اللي طلبتة ميجيش عليا ولا علي حقي فيك هو دا كتير ؟ يعني هي صعبت عليك وانا اللي عمالة اشوف هجيب اية وهعمل اية وفرحانة ومتحمسة مفرقش معاك تكسر بخاطري بالشكل دا ؟ انا كل اللي قلتة اني انا وهي نبقي زي بعض حاجاتنا تتقسم علي شهرين عشان هي تفرح وانا افرح لا اتكلمت ف ازاي هتديها ولا ليه تديها دي اختك ودي فلوسك وانت حر بس تراعيني انا كمان ياعمار كتير عليا ؟

عمار بحب …

مفيش حاجة كتير عليكي اوعي تقولي كدة تاني ويا ستي حاضر هقسم الفلوس بالنص بينكم ولا تزعلي نفسك وهنزل معاكي انتي في يوم وهي في يوم تاني خالص عشان اليوم بتاعك يكون ليكي لوحدك راضية كدة ؟

زهرة ببتسامة بسيطة ..

ومش هتتعصب عليا كدة تاني ؟

عمار بضحك ..

دا انتي طماعة اوي يا بت هو انا يعني بكمل خمس دقايق ع بعض الا وباجي واخدك في حـ,ـضني واقولك حقك عليا

زهرة بدلع …

ايوة بتقولي منكرش بس بردو متبقاش تزعلني تاني وخلاص

عمار بغمزة …

حبيبة قلبي تأمر وانا انفذ بحبك يا زهرة حياتي

مكة فضلت مستنية انس كتير جدا و في الاخر النوم غلبها فنامت اما انس رجع البيت قرب الفجر دخل غير هدومة ونام وهو بيدعي ربنا ان النكد اللي هو عايش فية يكون له اخر

❈-❈-❈

صباح يوم جديد في بيت تاني بيت معتز جوز لمار كانت لمار نايمة بعمق شديد بعد يوم صعب امبارح قضتة في تنضيف شقة حماتها لوحدها وكمان تحضير الاكل للعزومة اللي حماتها لازم تعملها كل شهر لبناتها الاتنين واجوازهم واللي ديما بيجو ع الاكل ع طول حتي بعد الاكل هي اللي بتقدم الضيافة وتنظف المطبخ وتروق بعد ما يمشو ولو اشتكت يتقالها دا بيتك واحنا ضيوف عندك غير المشاكل والخناقات اللي بتحصلها مع معتز جوزها فبقت تعمل وهي ساكتة

معتز ..

لمار …. لمار اصحي يلا الساعة داخلة علي 10صبح

لمار بصوت نايم ..

سبني شوية يا معتز الله يخليك جسمي كلة بيوجعني مش قادرة

معتز بضيق ..

اسيبك اية بس امي رنت عليكي تلت مرات لحد دلوقتي عشان تلحقو تكملو اللي وراكو

لمار بتعب وهو بتقعد ..

لسة بدري يامعتز انا مجهزة كل حاجة والله اللي فاضل حاجات بسيطة تستني شوية بس انام كويس

معتز …

ما انتي لو مكنتيش صممتي تروحي عند اهلك امبارح الكام ساعة دول كان زمانك مخلصة كل اللي وراكي وتكوني نايمة كمان براحتك

لمار ..

ااه قول كدة بقا الصحيان بدري دا عقاب ليا يعني عشان روحت اسلم عليهم ورجعت ؟

معتز …

بقولك اية انا لما بصدق اتجمع مع اخواتي وبحب اليوم يكون لطيف كدة من غير نكد قومي كدة من غير زن وكملي اللي وراكي عشان اليوم يعدي علي خير تمام ولا ليكي راي تاني ؟

لمار بضيق …

تمام تمام يا معتز نازلة اهو عن ازنك

نزلت لمار من غير ولا كلمة كملت شغل العزومة ورسمت ابتسامة علي وشها عشان اليوم يعدي من غير نكد ومتشمتش حد فيها

اما عند مكة صحيت الصبح ملقتش انس موجود وفي ورقة موجودة جمبها علي الكمودينو مكتوب فيها

انس ..

صباح الخير انا نزلت بدري عشان عندي عمليات كتير انهاردة تالا كانت صحيت خدتها معايا ل جدتها عشان تعرفي تنامي براحتك انا معرفش هرجع امتي متستننيش

مكة لنفسها ..

بقا بتهرب يا انس عشان منتكلمش وفاكر بقا انك لما تسبني انام براحتي وتاخد تالا لماما كدة تمام يعني ماشي لما ترجع والله لاستناك انهاردة انا مش هعدي صوتك اللي علي عليا دا كدة بالساهل اصبر عليا

❈-❈-❈

اليوم عدي بهدوء علي الجميع

عمار اخد زهرة ونزلو اشترو معظم مستلزمات البيبي واتغدو برة وقضو وقت جميل سوا ولما رجعو بالليل عدو علي ابتسام وفرجوها علي الحاجات اللي اشتروها وهي كانت طايرة من الفرحة … عمار انسحب منهم وهما بيتفرجو ويتكلمو ودخل البلكونة يطمن علي اختة كعادتة زي كل يوم

عمار ..

الو اية يا لولو عاملة اية ؟

لمار بصوت باين علية التعب …

الحمد لله يا حبيبي انت عامل اية ؟

عمار بقلق …

مالك صوتك ؟ انتي تعبانة ولا ايه ؟

لمار بحب ..

لا يا حبيبي انا تمام بس انت عارف العزومة كانت انهاردة مع تعب الحمل فمرهقة شوية

عمار بستفسار ..

انتي تعبتي نفسك ف عمايل الاكل ولا ايه ؟

لمار بكذب …

لا لا خالص هما بصراحة مش بيرضو يخلوني اعمل حاجة بس انا اللي بتحرج يعني وبقوم اساعدهم هو الحمل بس اللي كل كام يوم يتعبني كدة

عمار …

الف سلامة عليكي يا لولو طب اية اجيلك نروح للدكتورة بتاعتك نطمن ؟

لمار …

لا يا حبيبي انا مجرد ما اريح شوية هبقي تمام المهم انت عامل اية ؟ روحت الشغل انهاردة

عمار ..

تمام الحمد لله انهاردة يا ستي كنت عارف انك مشغولة فخدت زهرة ونزلنا اشترينا حاجات للبيبي واتغدينا برة ورجعنا وان شاء الله الاسبوع الجاي يوم الاجازة اخدك انتي وننزل مع بعض لوحدنا

لمار بضيق …

نعم لية بقا مستنتونيش هه مش اتفقنا النزولة دي نبقي كلنا سوا ونختار سوا هي مراتك دي بتعرف تختار عدل ولا ليها زوق في حاجة اصلا

عمار بهدوء ..

براحة بس من غير عصبيه دا اولا و بعدين انا اللي قلت كدة احسن عشان نكون انا وانتي لوحدنا ونقضي اليوم كلة سوا

لمار ..

يا سلام ولا هي اللي مش عايزة حاجات ابنها تبقي زي حاجات بنتي فخليتها هي في يوم وانا في يوم قول قول مش هزعل عادي يعني انا عارفة انها مبتحبنيش

عمار …

لا طبعا والله ولا فكرت في كدة انا اللي قلت كدة عشنا نكون انا وانتي سوا مش اكتر بطلي بقا الاوهام اللي في دماغك دي

لمار ..

خلاص يا عمار عموما براحتك دي مراتك وانت حر معاها انا مليش ادخل تخرجو امتي او تيجبو اية انتم حرين

عمار ..

بت انتي فكي البوز دا اللي ملوش اى لازمة اية الحمل قالب معاكي بنكد ولا اية ؟

لمار …

لا يا حبيبي ربنا ما يجيب نكد المهم احكيلي اشتريتو ايه بقا ؟ اوعي تكون بجد الحاجات علي زوقها انا والله مش قصدي خالص حاجة وحشة بس زهرة مش بتعرف خالص تشتري حاجات حلوة او علي الموضة

عمار ..

اشترينا معظم حاجات حضرة الظابط الصغير اللي لسة محتار في اسمة دا وكلها حاجات حلوة لما تشوفيها هتعجبك اوي

لمار …

لا متحترش انا عمتو انا اللي اسمية المهم صورلي كدة الحاجة وفرجني انا لسة مش عارفة هينفع اجيلكم امتي

عمار بارتباك ..

هه اه حاضر تمام انا اصلي بس بشرب سيجارة في البلكونة هخلصها وابقي اصورلك وابعتلك عيوني حاضر

لمار …

تسلم عيونك يا حبيبي

عمار قفل معاها واتنهد بتعب مش عارف لحد امتي هيقدر يحتوي غيرتها من زهرة هو عارف انها كانت مرتبطة اوي بيه خصوصا بعد وفاه والدهم مقدر تعلقها بيه وعارف أن معتز مش زوج حنين عشان يعوضها حتي شوية فعشان كدة بيحاول يحتويها ويريحها علي قد ما يقدر بس السؤال اللي بقا يلح عليه مؤخرا هيقدر يعمل كدة لحد امتي ؟

❈-❈-❈

عدي رجع بدري من برة علي غير العادة كان باين عليه الإرهاق جدا

عدي …

السلام عليكم

هايدي بلهفه …

وعليكم السلام مالك يا حبيبي ؟ انت تعبان ولا ايه

عدي وهو بيسند علي الكرسي …

يعني حاسس بدوخة شوية وجسمي وجعني اوي

هايدي وهي بتسندة للسرير ..

الف سلامة عليك طب ايه اطلب الدكتور انت جسمك دافئ خالص

عدي بتعب وخمول شديد ..

لا لا مش مستهله انا بس عايز انام وهبقي كويس

هايدي نيمتة علي السرير و قلعته جزمتة وفكتله اول كام زرار من قميصه وحطت ايديها علي رأسه اكتشفت أن حرارته عليت اكتر … اتوترت جدا ومكنتش عارفه تتصرف ازاي ولا كانت حبه أنها تقلق حد من اللي معاها في البيت اتصلت علي ماماتها اللي فهمتها أنها تديلة خافض للحرارة ومسكن وتعمله كمادات وتشوف هيتحسن ولا لا وقتها تقرر تقول لأهله وتتصل بدكتور ولا دور بسيط ومتكلمش حد

هايدي عملت كدا وكانت سهرانة جمبه بتعملو كمادات حست بيه بيتكلم وهو مش حاسس قربت منه عشان تسمع هو بيقول ايه

عدي بصوت ضعيف …

متسبنيش

هايدي ابتسمت ومسكت ايديه ..

متقلقش حبيبي انا جمبك

عدي كمل وهو في دنيا تانيه ..

ريهام انا بحبك متسبنيش خليكي معايا …. ريهام متمشيش خليكي … انتي حبيبتي و ست البنات كلهم ا انا عايزك … ريهام .. ريهام

ابتسامتها اختفت بالتدريج من علي وشها والصدمة كانت مسيطرة عليها ريهام دا اسم طليقتة … طليقتة اللي اول ما اكتشفت أن عدي مستحيل يخلف طلبت الطلاق فورا واتمسكت بيه وبعد طلاقهم ب ثمن شهور اتجوزت ابن عمها وخلفت كمان منه … ازاي لسه في قلبه لحد دلوقتي ؟ طب وهي هي ايه بالظبط بالنسبالو

وفجأة لمعت الدموع في عينيها وافتكرت كل مرة كانت في حضـ,ـنة وبتقوله فيها بحبك وهو بيرد ((( بمـ,ـوت فيكي يا ست البنات )))

❈-❈-❈

مكة فضلت مستنيه انس طول الليل كانت جواها طاقه غضب كبيرة حالفه ل تطلعها كلها عليه لمجرد أنه اتجرء وعلي صوتة عليها

وصل انس بعد يوم كله تعب عمليات كتير و كشوفات اكتر كان مهدود وكل اللي نفسه فيه بس يرتاح علي السرير وينام … مجرد ما فتح الباب اتفاجا ب مكة واقفة في نص الصاله اتنهد بتعب

مكة بسخريه …

حمد لله على السلامه يا دكتور

انس …

الله يسلمك ايه مصحيكي لحد دلوقتي ؟

مكة ..

مستنياك طبعا ولا انت فاكر أن لما كل يوم تتأخر برة هترجع تلاقيني مخمودة وترتاح بقا ؟

انس …

مكة انا جاي تعبان جدا بجد ومش قادر اتكلم ممكن ناجل الخناقة دي للصبح ؟ اكون نمت بس

مكة بعصبيه …

هو ايه اللي ناجل الخناقة للصبح هو انا بعزم عليك بكوبايه شاي انا بقالي يومين مستنياك وانت ترجعلي متأخر عشان متتكلمش معايا

انس بهدوء ..

انا امبارح بس اللي نزلت وسيبتك عشان الموضوع ميكبرش بينا لكن انهاردة انا فعلا كان عندي شغل كتير جدا ومش شايف قدامي فأرجوكي سيبيني انام وبكرة نتكلم في اي حاجة انتي عايزاها

مكة بإصرار …

لا يا انس هنتكلم دلوقتي انا مش هصبر للصبح

انس وهو بيبصلها بترقب ..

انتي اصلا عايزة تتكلمي في ايه ؟ مش فاهم ؟

مكة …

بجد مش فاهم ؟ عايزة اعرف ازاي لاول مرة من يوم ما ارتباطنا سوا تعلي صوتك عليا بالشكل دا ؟

انس …

انتي اللي عليتي صوتك الاول علي فكرة وبسبب حاجة هايفه قعدتي تلبخي بالكلام افتكري اللي انتي عملتيه الاول وبعدين قوليلي بتعلي صوتك ليه

مكة بغضب …

وايه الجديد انا طول عمري دي نبرة صوتي معاك ومش بتطلع قدام حد دا بينا وبين بعض والسبب مش هايف يا انس انا قلتلك مليون مرة تاخد بالك من شكلي وشكل علاقتنا قدام اي حد خصوصا اهلي حصل ولا محصلش ؟

انس بعصبيه …

هو في ايه حرام عليكي انا تعبان بجد مش قادر علي المناهدة دي كل دا عشان مدلعتكيش كتير قدامهم يا ستي انا اسف حقك عليا وادي راسك اهي ( مسك راسها بالعافيه وبسها) ها حاجة تاني ولا مسموحلي اروح اتخمد بقا ؟

مكة بغضب …

دا مش طريقة كلام دي هو كل ما اجي اكلمك في حاجة مضايقاني تقولي تعبان وعايز انام دي مبقتش عيشه اشمعني مبتقاش تعبان وقت الهزار والدلع و وقت ما اكون عايزة اتكلم في حاجة مزعلاني منك كل امراض الدنيا تركبك والتعب يحل عليك فجأة هه ما ترد ساكت ليه ؟

انس بصوت عالي ..

يتبع ….

الفصل الثالث

مكة كانت بتتكلم بغضب وصوت عالي جدا انس كان متعود علي نوبات غضبها اللي من غير سبب بين وقت والتاني لكن انهاردة تحديدا هو كان تعبان كل اللي كان نفسه فيه ينام وبس

انس وهو بيمسكها جامد من دراعها …

اقسم بالله يا مكة كلمة كمان زيادة لاكون رامي عليكي يمين الطلاق وماشي وسيبلك البيت انتي يظهر حبي ليكي و سكوتي علي نرجسيتك خلوكي تتمادي زيادة عن اللزوم

ضغط علي دراعها جامد لدرجة أنها اتالمت بصوت مسموع والدموع لمعت في عينيها وهي بتبصله بذهول

انس بنبرة تهديد لاول مرة ..

انا هدخل انام دلوقتي ولو الصبح صحيت لقيتك بتتكلمي في نفس الحوار ولا حتي بس قالبه وشك هنفذ اللي قولته وياريت تباتي انهاردة في اوضه تالا خليني اكون علي راحتي ولو ليوم واحد بس

خلص كلامة و دخل الاوضه ورزع الباب وراة وهي ثابتة مكانها دموعها رافضه تنزل ضمه ايديها جامد عشان تتحكم في غضبها لدرجة أن وشها كله كان احمر من كتر كتم الانفعال جواها

مكة لنفسها …

انس بيهددني! اول مرة يجيب سيرة الطلاق اول مرة يمد ايديه عليا ماشي ماشي يا انس يا ابن احلام أن مخليتك تلف حوالين نفسك مبقاش انا مكة الدمنهوري الايام بينا

❈-❈-❈

نرجع ل هايدي اللي دموعها نازله من غير توقف وعقلها كمان مش قادر يفكر في اي حاجة ومش عارفه تتصرف ازاي هي بقالها سنة مع عدي عملت معاه فيها كل حاجة عشان يحبها زي ما هي حبتة من اول ما اتقدم لها وهي اتعلقت بيه

قربت من أهله اهتمت بيه وبالبيت و بنفسها حاولت تشاركه في مشاكله

مفروض أنها تعمل ايه تاني عشان جوزها يحس بيها وقلبه يحبها زي ما هي حبته ؟ وياريت قلبه فاضي أو متعقد من تجربه فاشلة فرافض يحب تاني دا للاسف لسه بيحب

بيحب اللي باعته وعايشه حياتها طب مفروض هي تعمل ايه ؟ أو تحكي لمين ؟

كانت في صراع بين أنها متحكيش لحد وتصارحة بالي سمعتة وبالي بتحس بيه وبين أنها تحاول تاني اخر محاوله يا قدرت تدخل قلبه و تطرد الماضي منه يا تنسحب هي من حياتة بكل هدوء فضلت طول الليل جمب عدي تفكر لحد ما غلبها النوم علي الكرسي جمب السرير

صباح يوم جديد عدي فتح عينيه بتعب وهو بيحاول يفتكر ايه اللي حصله امبارح لاحظ هايدي اللي نايمة علي الكرسي و واضح من ملامحها الإرهاق الشديد

عدي بصوت ضعيف …

هايدي .. حبيبتي

هايدي بلهفه ..

عدي انت صحيت حاسس بايه دلوقتي استني كدة اتاكد ان الحرارة نزلت اوف مش عارفه انا نمت ازاي امبارح محستش ( لاقت حرارة طبيعيه ) الحمد لله حرارة طبيعيه اقوم بقا اعملك

قاطعها عدي ببتسامة …

براحة انا مش لاحق حتي ارد أو أسألك ايه حصل انا اخر حاجة فاكرها اني وصلت البيت و كنت دايخ شوية ايه حصل بعد كدة وايه نيمك كدة ؟

هايدي …

انت كنت تعبان اوي بالليل ودرجة حرارتك كانت عاليه وانا مكنتش عارفه اتصرف ازاي اتصل ب عمي وطنط ولا لا كلمت ماما وقالتلي اديك مسكن و خافض للحرارة واعملك كمادات واشوف هتتسحن ولا لا قبل ما اقلق حد منهم عملت كدة وانت الحمد لله اتحسنت بس تقريبا نمت من غير. ما احس المهم انت لسه تعبان اوي تحب نطلب دكتور او اكلم عمي اعرفه ؟

عدي ..

لا ملوش لزوم انا احسن من امبارح يعني جسمي همدان شوية بس تمام مش مستهله حقك عليا يا حبيبي قلقتك وتعبتك معايا امبارح

هايدي بحب …

متقلش كدة انا معملتش حاجة المهم تكون بخير هقوم احضرلك فطار خفيف كدة عشان تاخد الدوا

عدي …

لا انا مليش نفس خالص للاكل معلش هاتيلي بس الاب توب بتاعي وتلفوني احاول اخلص كام حاجة كدة للشغل من البيت شكلي مش هقدر انزل انهاردة

هايدي بحزم …

مفيش لاب ولا تلفون الا لما تفطر كويس وتشرب عصير فريش كمان وتأخد شور تفوق كدة وقتها بقا ترجع تشتغل

عدي …

اعتبر دي أوامر ولا ايه ؟

هايدي …

لا بقولك ايه مترفعليش حواجبك كدة مش هخاف انا اه اعتبرها اوامر يا استاذ عدي ها قلت ايه ؟

عدي ببتسامة ..

اوامر حبيبتي تنفذ ماشي يا ستي بس بسرعه عشان في كذا ميل لازم يتراجع عليهم ويتبعتو قبل الظهر ضروري

هايدي ..

هوا مش هتاخر عليك

خرجت من الاوضه وخدت نفس طويل وهمست بينها وبين نفسها … (( اخر فرصه يا عدي ))

❈-❈-❈

في بيت محسن و ايمان نزلتلهم ابتسام بعد الفطار عشان يشربو القهوة هما التلاته سوا عادة متعودين عليها من سنين ومحافظين عليها لحد دلوقتي

محسن …

ايه يا ايمان كوبايه القهوة دي كلها اشمعني انهاردة عامله لنفسك قهوة كتير كدة

ايمان …

عشان اخد احتياطاتي من الصداع اللي هيحصلي كمان ( بصت في الساعه الي علي الحيطة ) كمان ساعه ونص بالظبط

محسن …

مش فاهم صداع ايه اللي بيجي بمعاد مظبوط

ابتسام …

صداع مكة بنتك لما تصحي وتنزلها ب تالا كمان شوية وتبدء وصله النكد بتاعت كل يوم خصوصا اننا شاكين أنها متخانقه مع انس

محسن بحزن …

انا مش عارف البت دي مالها قدام الناس وفي اي تجمع أو حتي قدام أهل انس نفسة بتكون ملاك نازل من السما ادب واخلاق وذوق ايه بيحصل بعد كدة انا مش قادر افهم

ايمان …

والله انا غلبت كلام معاها ومبقتش فهماها انا كمان البت مكنتش كدة ابدا معرفش ايه بدل أحوالها كدة

ابتسام …

اللمة الحلوة بتداري وراها ياما يا ابو عدي ومش مكة بس اللي اتبدلت ومبقاش حد فاهمها لمار كمان مش عارفه اعمل معاها اية

محسن …

لسه بردو بترخم علي زهرة بهزارها التقيل ؟

ابتسام …

دا مش هزار تقيل دي ديما بتتعمد تقلل من البت في اي حاجة وعمار مطاوعها وكل ما اجي أكلمه يقولي زهرة عاقله ومتفهمة لكن مقدرش ازعل اختي الصغيرة دي وصية بابا الله يرحمه ليا والبت ياعيني كتمة في قلبها وساكتة وخايفة يجي يوم وتنفجر فيهم

ايمان …

مع انها غلبانة والله ومنكسرة وملهاش حد معلش ربنا يهدي لمار ومكة يارب وانتي حاولي تتكلمي مع زهرة تطيبي خاطرها بكلمتين عشان متحسش أنها لوحدها وسطهم

ابتسام …

والله بعمل كدة يا ايمان ديما وحتي لمار ياما كلمتها ومفيش فايدة

محسن …

العيال دي مش هتفوق الا بعد ما يتعلمو الادب من اول وجديد

ايمان …

قصدك ايه يا حج

محسن ..

همخخ كدة وابقي اقولكم انا يادوب انزل افتح المعرض يلا سلام عليكم

ايمان وابتسام …

وعليكم السلام

بعد ما محسن نزل تلفون ابتسام رن برقم لمار ردت علي طول

لمار …

الو صباح الخير يا ماما

ابتسام …

صباح النور يا حبيبتي عامله ايه ؟

لمار …

اهو الحمد لله شوية تعبانة وشويه كويسه بقولك ايه

ابتسام …

قولي يا حبيبتي

لمار …

معتز سافر الصبح اسكندريه عنده مصلحة مع واحد صحبه هناك وهيقعد يومين وحماتي مش هنا من يوم العزومة راحت مصيف اسبوع مع ولاء بنتها فانا أقنعت معتز بالعافيه اني اجيلك وابات معاكي اليومين دول عشان مكنش لوحدي في البيت كله وهو وافق الحمد لله

ابتسام …

احسن بردو مكنش ينفع تفضلي لوحدك في البيت كله هتيجي امتي ؟

لمار …

هو يادوب لسه نازل وانا كلمتك هروق بس كدة مطرح الفطار وأحضر شنطة صغيرة وانزل علي طول مش هتاخر أن شاء الله

ابتسام …

ماشي يا حبيبتي علي مهلك في حفظ الله مع السلامة

ايمان باستسفار …

هي هتيجي وتبات ولا ايه ؟

ابتسام …

اه جوزها مسافر يومين و حماتها مسافرة مصيف اسبوع ف هتيجي عشان متفضلش في البيت لوحدها

ايمان بضحك …

الحقي اشربي قهوتك انتي كمان جالك صداع زي اللي هيجيلي دلوقتي يختي احنا خلفنا وربينا عشان يوجعو دماغنا كدة ف الاخر ايه العيال الهم دي

ابتسام …

علي رايك ربنا يعدي اليومين دول علي خير ويهديكي يا لمار يا بنتي يارب

❈-❈-❈

مكة صحيت علي صوت تالا وهي بتعيط قامت شالتها وخرجت بيها برة الاوضه بهدوء لاقت أن انس نزل من غير ما تحس بيه عينيها جت علي صوره جوازهم واد ايه هما كانو طايرين من الفرحة في اليوم دا عينيها دمعت بحزن علي حالهم وأنها لحد دلوقتي مش قادرة تتخطي الأزمة اللي مرو بيها بعد جوازهم بتلت شهور ويمكن هي السبب في حالتها اللي مش لاقيه ليها تفسير لحد دلوقتي فاقت من ذكرياتها علي عياط تالا اخدتها في حـ,ـضنها و بدأت روتينها اليومي المعتاد وهي عقلها مشغول ومزحوم بأفكار كتير

عمار في شغله مركز في القضية الجديدة اللي ماسكها كانت قضية غسيل أموال لناس كبيرة في البلد وبيحاول يوصل ل دليل مادي عليهم هو والفريق المكلف معاه بالمهمة

تلفونة رن بصوت رساله علي الواتس فتحها كانت من لمار …

صباح الفل يا حضرة الظابط معتز مسافر يومين وانا جيالكم في الطريق هقضيهم معاكم انا مبسوطة اوي من زمان مقضناش وقت طويل مع بعض حضر نفسك بقا لسهرة للصبح واعمل حسابك مفيش اعذار انا مش باجيلكم كل يوم يعني يلا سلام

عمار اتنهد بغلب وهو بيتخيل اليومين دول هيعدو عليه ازاي واللي ضايقه اكتر التوقيت هو دلوقتي محتاج لكل تركيزة وطاقتة عشان القضية اللي معاه مش عشان يفض بين اختة مراتة دعي ربنا أن اليومين دول يعدو علي خير و رجع كمل شغله تاني

عدي وقت بسيط كانت لمار وصلت عند ابتسام وكلها حماس وفرحة

ابتسام …

طمنيني عليكي وعلي حبيبه تيته اللي جوة دي عامله ايه ؟

لمار …

الحمد لله يا ماما الدكتورة اخر مرة كنت عندها قالتلي كله تمام

ابتسام …

محددتش معاد لسه ؟

لمار …

لا بتقولي تقريبا لسه شهرين انا حاليا في اخر السابع لسه مخلصتوش

ابتسام …

مع زهرة تقريبا هي كمان في السابع ربنا يقومكم بالسلامة يارب انتم الاتنين

لمار …

امين يارب اومال هي فين صحيح مجتش يعني هي متعرفش اني جايه ولا ايه ؟

ابتسام بحزم …

لا متعرفش يا لمار وبقولك ايه شيليها من دماغك شوية هه مش لازم هزارك التقيل اللي محدش يستحمله دا انا بقولك من اولها اهو

لمار كشرت ..

في ايه يا ماما هي لحقت تشتكي وتقومك علي بنتك ولا ايه ؟

ابتسام …

الشهادة لله هي لا اشتكت ولا اتكلمت اصلا بس انا بشوف بنفسي طريقتك معاها وبشوف الحزن في عينيها وهي مبترضاش تعمل مشكلة

لمار بتريقة …

تعمل مشكلة ؟ مشكلة ايه دي أن شاء الله اللي تقدر تعملها ست زهرة ؟ احب اعرف يعني

ابتسام …

مفيش فايدة فيكي بقولك ايه انا مش قادرة علي مناهدة دي اللي اقولو تعمليه وخلاص

لمار سكتت بس كانت متغاظة من جواها من دفاع امها المستمر عن زهرة واللي كان بيزيد جواها الغل الغيظ من زهرة اكتر واكتر قامت دخلت اوضتها وهي بتفكر المرة دي ازاي تعكنن عليها من غير ما حد يكلمها كلمة واحدة وابتسمت بانتصار لما عرفت الطريقة أو الشخص اللي هتستخدمة عشان يعكنن هو علي زهرة وهي تفضل بعيد

❈-❈-❈

مكة علي غير العادة منزلتش عند ماماتها ولما ايمان اتصلت تتطمن عليها قالتلها أنها كويسه بس وراها حاجات كتير في البيت هتعملها وان تالا نايمة وبعد ما قفلت مع ماماتها رجعت قعدت لوحدها تاني وذكريات كتير عماله تهاجمها ودموعها رافضه تنزل .. كانت بتضغط علي ايديها جامد وهي بتحاول تكتم انفعالها هي مش هتضعف مش هتبكي مش هتسمح لاي حد مهما كان يضعفها أو يقلل منها أو من كرامتها تاني هي دلوقتي مكة جديدة مكة القوية …

ابتسام اتصلت ب زهرة وقالتلها متعلمش غدا انهاردة عشان هي وعمار هيتغدو معاها تحت وعرفتها أن لمار موجودة

حست ابتسام بالقلق والضيق اللي في صوت زهرة لما عرفت بوجود لمار حاولت بطريقة غير مباشرة أنها تطمنها بس زهرة كانت بتفكر في الي ممكن تعيشه في اليومين دول اتمنت أن أهلها كانو يكونو عايشين دلوقتي كانت حاجات كتير اوي اتغيرت

زهرة اتحججت ومرضيتش تنزل الا لما عمار وصل وعرفها أنه تحت وقتها هي نزلت

زهرة …

السلام عليكم.. ازيك يا لمار عامله ايه ؟

لمار كشرت …

لسه فاكرة يا ست زهرة تنزلي وتسلمي عليا دا انا من الظهر هنا

زهرة ببتسامة …

معلش مكنتش اعرف انك جايه وكنت بدأت اغسل وكان في كام طبق ف الحوض قلت اخلص كل اللي ورايا عشان اعرف انزل واقعد معاكي

لمار …

طيب ماشي ( وبصت ل عمار بحماس ) مش انا يا موري نقيتلك حتة اسم للبيبي إنما ايه تحفة

زهرة استغربت بس متكلمتش

عمار …

انتي لسه شاغله بالك ما قلتلك انا سايبها لوقتها يوصل بس بالسلامة الاول

لمار بتصميم …

انا قلتلك انا عمتو وانا اللي هسميه مليش دعوة انا اخترت اسم عمران ايه رايك عمران عمار الدمنهوري اسم فخم كدة

زهرة …

مش تقيل شوية يعني باباه اسمه عمار وهو يبقي اسمة عمران ؟ دا غير أنه اسم قديم اوي

ابتسام …

ولا عمران ولا غيرة هو زي ما عمار قال لما يوصل أن شاء الله ونطمن عليه يبقي يتسمي

لمار …

بس انا قلت ل عمار اني عايزة اختار اسمة هو مش من حقي ولا ايه وبعدين ماله عمران لايق علي اسم عمار جدا قديم ايه انتي بتفهمي ف القديم والجديد اوي يعني

زهرة بصت ل عمار أنه يتكلم لكنة عمل نفسه مشغول بالتلفون ومتكلمش خالص ابتسام هي اللي اتكلمت

ابتسام …

حقك دا ايه دا ابنها هي هي اللي حملت وتعبت فيه انتي عندك بنتك سميها زي ما انتي عايزة مالك انتي تسمي ولا متسميش هما حرين

لمار رسمت الحزن واتكلمت بصوت مخنوق ..

اوكي يا ماما انا اسفة اني اتدخلت في شيء ميخصنيش انا بس كنت بتكلم من فرحتي وحبي في البيبي اللي جاي مش قصدي اعمل مشكلة عن اذنكم انا داخله اوضتي

لمار مستنتش تسمع رد من حد ودخلت جري علي اوضتها وهنا عمار بص لأمة ومراتة بغضب

عمار …

عجبكم كدة فيها ايه يعني لما تختار اسم ابن اخوها مش قصه يعني عشان تزعلوها بالشكل دا دي لما صدقت أن معتز وافق يجيبها هنا كانت فرحانة مش قادرين تستحملوها شوية بدل ما تكسرو فرحتها كدة

ابتسام بغضب مماثل …

احنا بردو اللي بنكسر فرحتها ولا انت اللي مطواعها في كل حاجة صح او غلط اي حد في الدنيا ابسط حقوقه أنه يختار اسم ولادة مالها هي تختارلك ليه ؟ يا كدة يا تزعل وتتقمص زي العيال الصغيرة وانت تطلع تجري وراها وتحايلها زي كل مرة

عمار بهدوء ..

ماشي يا ماما طالما دا رايك انا مش هناقش حضرتك فيه بس الي جاي دا ابني واظن اني حر اسميه زي ما احب زي ما حضرتك قولتي ( بص ل زهرة بتحدي ) وانا قررت اسمه عمران واللي عندة اعتراض يخليه لنفسه عن اذنكم

عمار دخل الاوضه ورا لمار وزهرة دموعها نزلو في صمت

ابتسام ..

لا بقولك ايه امسحيلي دموعك دي كدة مفيش حد هيتسمي عمران خليكي ناشفة شوية وانا اوعدك انه هيتسمي الاسم اللي انتي عايزاه غير كدة مش هيحصل اطمني يا حبيبتي

زهرة ابتسمت ابتسامة بسيطة وجواها ضيق كل يوم بيكبر عن اليوم اللي قابلة من ناحيه عمار

❈-❈-❈

انس رجع من شغله وهو مترقب رد فعل مكة بعد اللي عملوا امبارح وكان طول الطريق بيتخيل سيناريوهات كتير لاي حوار ممكن يدور بينهم وصل وفتح الباب لكنة اتفاجا وفضل باصص قدامة ثواني يستوعب اللي شايفه

يتبع …

الفصل الرابع

انس رجع من شغله وهو مترقب رد فعل مكة بعد اللي عملوا امبارح وكان طول الطريق بيتخيل سيناريوهات كتير لاي حوار ممكن يدور بينهم وصل وفتح الباب لكنة اتفاجا وفضل باصص قدامة ثواني يستوعب اللي شايفه

احلام …

ايه يا انس هتفضل واقف عندك كتير مش هترحب بينا ولا ايه ؟

انس وهو بيحـ,ـضنها …

ايه المفاجأة الحلوة دي حضرتك جيتي امتي ؟ ومقلتليش ليه انك جايه ؟

احلام …

جيت امتي فانا ياسيدي لسه جايه من ساعتين كدة ومقلتلكش ليه حبيت اعملهالك مفاجأة ومكة كانت هتتصل بيك بس انا وصابرين قولنلها لا

انس وهو بيدور علي اختة بعنيه …

ايه دا البت صابرين هنا وحشتني اوي فينها

صابرين وهي خارجة من المطبخ …

انا اهو يا دكتور مراتك بتعملنا وليمة جوة مش عشا وكل ما ادخل اساعدها تطردني برة شر طردة يرضيك كدة برستيجي بقا ف الأرض والله

انس …

وحشتيني يا صاصا اوي عامله ايه ؟

صابرين ….

بغض النظر عن صاصا اللي مبحبهاش بس انت كمان وحشتني اوي لما صدقت ماما وافقت نيجي نشوفكم

خرجت مكة من المطبخ وهي شايلة اطباق ومبتسمة ابتسامة صافيه

مكة …

حمد لله على السلامه يا حبيبي والله كنت هتصل اقولك بس خالتو مرضيتش خالص

انس كان متعود من مكة علي كدة قدام الناس علاقتهم مثاليه جدا لكن بينهم وبين بعض حواجز وخناقات مش بتنتهي

انس ببتسامة …

الله يسلمك حبيبتي احلي مفاجأة بصراحة

صابرين …

ها مسموحلي احط معاكي الاكل ع السفرة ولا هتهزق بردو في ليلتكم دي

مكة بضحك …

لا تعالي حطي معايا يلا عفونا عنك خلاص

علي السفرة اللي كانت مليانة اكل كأنها عزومة مش عشا ابدا

احلام بعتاب …

بردو تعبتي نفسك يا مكة يا بنتي دا انا بقيت اجي علي غفلة بسبب اللي بتعمليه دا هتخليني كدة مجيش خالص بقا

مكة …

بعمل ايه بس والله كل حاجة كانت موجودة في الثلاجة انا متعبتش ولا حاجة حضرتك يا خالتو اللي بتزعليني لما بتقولي كدة

صابرين …

تسلم ايديكي يا حبيبتي الاكل كله يجنن

انس ببتسامة بسيطة …

تسلم ايديكي يا حبيبتي

مكة ببتسامة …

تسلمو يارب يلا بقا كفايه رغي وكلو كويس الاكل دا كله لازم يخلص حااالا

صابرين …

والله وحشتيني اوي يا مكة بقا يا بنتي نبقي صحاب و بنات خاله وكمان مرات اخويا الوحيد ولازم أنا بس اللي تجيلك كل مرة انا وماما يا رخمة اغلطي مرة وابقي تعالي قضي معانا يومين تلاته كدة والله هتتبسطي اوي

مكة ….

اكيد هنبسط المشكلة أن انس اجازاتة مبقاش ليها اي مواعيد و نبطشيات كتير فمش عارفين نظبطها سوا بس

احلام …

ايه يا سي انس هي البلد موحشتكش ولا ايه ؟ علي راي البت صابرين لازم كل مرة احنا اللي نيجي

انس …

والله غصب عني يا ست الكل حقك عليا بس فعلا زي ما مكة قالت انا بقالي فترة كبيرة ظروف شغلي ملخبطة شويه زميل تحصل عندة حاله وفاة أشيل مكانة زميل يتعب أشيل مكانة لما خلاص هلكت والله

احلام …

يا حبيبي طب ما انت كمان لازم ترتاح أن لجسدك عليك حق يا دكتور كدة مينفعش خالص يا انس

انس ببتسامة …

اكيد انا ناوي اخد إجازة شهر كامل كدة اريح فيها بعد الطحن دا وان شاء الله هجيب مكة وتالا ونجيلك في الإجازة دي بس أخدها الاول

صابرين …

اه أن شاء الله علي السنة الجايه الكلام دا

انس …

لا يا لمضي هانم أن شاء الله قريب جدا

احلام …

ايه مكة سكتي فجأة يعني ؟

مكة بتوتر بسيط…

ابدا يا حبيبتي بفكر بس ماما كمان لما تشفوكم هيكون رد فعلها ايه هتفرح اوي

احلام …

وهي كمان وحشتني اوي بعد العشا أن شاء الله ننزل نسلم عليها

انس …

هي متعرفش لحد دلوقتي ولا ايه ؟

مكة ..

لا وقت ما هما جم كانت ماما نايمة و بابا في المعرض فقالت تفاجاها هي كمان بعد ما تطمن عليك

انس …

تمام بعد العشا ننزل سوا نسلم عليهم كلنا

❈-❈-❈

عند ابتسام عمار فضل ساعه يتحايل علي لمار عشان تخرج من الاوضه وتتغدي معاهم ولما خرجت قعدو يهزرو سوا وقليل اوي لو وجهو كلام ل ابتسام ومتجاهلين زهرة تماما

حاولت زهرة تتماسك علي قد ما تقدر وبعد الغدا زهرة كانت عايزة تقف تغسل المواعين بس ابتسام رفضت كانت حسه بيها وبأن خنقتها زادت اوي طلبت منها تطلع شقتها وترتاح وزهرة وافقت علي طول وطلعت كان عمار و لمار ف البلكونة ومحسوش بيها

بعد مدة دخلو من البلكونة

عمار …

الواحد مصدع اوي

لمار …

قصدك ايه بقا لو بتخلع عشان متسهرش معايا هزعل بجد

عمار …

انا اتكلمت يا بت مالك بتقولي شكل للبيع ليه هو فنجان قهوه وهبقي تمام .. زهرة زهررررة

خرجت ابتسام بصنيه عليها فنجان قهوة وكوباتين شاي

ابتسام بهدوء …

زهرة طلعت ترتاح شوية من الصبح بتغسل وبتعمل حاجات في الشقة تعبت واصريت عليها تطلع خد القهوة اهي مش بتندة علشان كدة بردو

عمار كان باين عليه القلق علي زهرة لكن مش قادر يطلع عارف إن لو طلع هيكون فيها نكد من اختة شهر قدام خد الفنجان من غير كلام وبدء يشربه ولمار فرحت أنها خلصت منها بدري بدري والسهرة هتبقي مع اخوها للصبح وبدءت هي كمان تشرب الشاي

وخلال دقائق كانت لمار نامت علي نفسها وهي قاعدة عمار نده عليها كزا مرة بس كانت نائمة بعمق

ابتسام …

متقلقش دا طبيعي من وقت ما حملت ديما تنام بدري اوي كانت لسه بتحكلي كدة قبل ما تيجي

عمار …

بجد يا ماما عادي يعني ولا اتصل بالدكتور ؟

ابتسام برفعه حاجب …

انت هتخاف علي بنتي اكتر مني ولا ايه ؟ قلتلك دا طبيعي في حملها اطلع يلا انت كمان اطمن علي مراتك اللي طلعت تعبانة دي اتفضل

عمار طلع جري علي زهرة فتح الباب بهدوء عشان لو نايمة واول ما دخل الاوضه لاقاها قاعدة علي السرير وبتعيط في صمت قرب عليها

عمار …

حبيبتي عامله ايه دلوقتي ماما بتقول انك طلعتي عشان تعبانة طمنيني عنك ؟

زهرة بصتله بلوم ومردتش عليه

عمار …

زهرة حقك عليا انتي عارفه اني مقصدش ازعلك بس مينفعش تيجي تقعد يومين معانا وازعلها مني

زهرة بصوت مخنوق …

بس ينفع تزعلني انا مش كدة ينفع كل مرة تيجي عليا انا قدامها وتصالحني بينك وبيني صح ؟

عمار …

انا مقصدش ازعلك يا حبيبتي أن شاء الله بكرة تخلف وتنشغل بالبنوتة بتاعتها والمشاكل دي كلها تخلص خلاص بقا خلي قلبك ابيض يا زهرتي أنني عارفه اني بحبك صح

زهرة …

عمار انا تعبت من وضع دا بجد

عمار …

وعد يا زهرتي لو بعد ما تقوم بالسلامة من الولادة الوضع متحسنش انا هتصرف

زهرة …

هتتصرف ازاي يعني ؟

عمار …

زهرة خلاص بقا قلتلك مسأله وقت والوضع هيتغير

زهرة بإصرار …

لا احب اعرف لو هي متغيرتش انت هتتصرف ازاي ؟

عمار …

مش مفكر في حاجة محددة يا زهرة بس وعد اني هتصرف

زهرة …

طب يا عمار لو هي بعد ما تولد متغيرتش ودا شيء انا واثقه فيه يبقي وقتها لو سمحت اي وقت هي تكون موجودة انا هقعد هنا في شقتي مش هتجمع معاها في اي مكان تمام ولا ايه ؟

عمار بضيق …

نعم ! عايزاها تتحرم تدخل بيت اخوها الوحيد ولا ايه ؟

زهرة …

لا طبعا بس اولا يا عمار هي مش بتدخل هنا ديما بتكون يا في شقه ماما ابتسام يا في شقه مرات عمي محسن في التجمعات ثانيا اي وقت تدخل بيت اخوها طبعا دا بيتها قبل ما يكون بيتي وقتها انا بكل هدوء هنزل عند اي حد مرات عمي أو ماما أو حتي هايدي

عمار …

زهرة متكبريش المواضيع لو سمحتي

زهرة …

والله انا كدة مش بكبرها انا بشوف حل من غير اي تصادم بين اي أطراف

عمار منهي الحديث …

خلاص يا زهرة لو متغيرتش بعد الولادة هعملك اللي انتي عايزاة مرضيه كدة يا ستي

زهرة …

اه مرضيه وربنا يصبرني شهرين اللي فضلين دول

عمار …

طب ايه هتقدري تسهري معايا شوية ولا تعبانة فعلا انتي وحشاني اوي

زهرة …

لا يا حبيبي مش تعبانة هسهر معاك وهعملك عصير مانجة اللي بتحبه كمان

عمار …

ايوة كدة هو دا الكلام يا قلبي هدخل اخد شور علي ما تجهزي العصير

ابتسمت زهرة وقامت دخلت المطبخ هي تعبت تعبت من كتر المشاكل والتريقه والنوم معيطة كان لازم تتكلم لازم تبعد عن كل التوتر دا

ابتسمت بحزن علي علاقتها بعمار اللي بتكون مثاليه طول ما هما لوحدهم لكن قدام الناس وتحديدا في وجود لمار علاقتهم بيبان معدنها ضعيفه وهشه

❈-❈-❈

مكة وانس نزلو مع احلام وصابرين يسلمو علي ايمان ومحسن ومكة انتهزت فرصه أنهم مشغولين بالسلامات والاخبار وبعتت رساله لانس علي التلفون

مكة …

انسي اني اسافر البلد عندكم تمام ؟ شوف بقا هتبقي تعتذر تقول ايه ل ماماتك بعد ما أكدت عليها أننا رايحين

انس رد عليها …

متبقيش تيجي هبقي اسافر انا لوحدي

مكة …

ياسلام عشان ماماتك تعرف اني انا ال مش عايزة اروح عندكم صح