حطام رجل لفاطيما

بسم الله الرحمن الرحيم
لا اله الا الله وحده لا شريك له يحيى ويميت له الملك وله الحمد وهو على كل شيء قدير

قاعد زين في الاوضه بتاعته وماسك موبايله بيرن عليها وهي طبعا كالعاده مش بترد عليه لكن المره دي ردت عليه بزهق وقالت له :

_كانك ما وراكش غيري جلت لك هملني وبعد عني علشان خاطر انا مش هسامح ولا هرجع ،

وما تفتكرش اني هسامح في يوم من الايام انت اخترت طريج ومشيته خليك راجل وكمل فيه لحد ما توصل لاخره .

ضرب شباك السرير بايده بعنف ورد عليها:

_ليه إكده يا مهجة الفؤاد بتعملي فيا إكدة ليه ؟

طول عمرك حنينة وعمرك ماكنتي جاسية ،
وعلي جلبي كنتي بطبطبي ،
ارجعي لي وأوعدك إني عمري ماهزعلك تاني ولا هكسر بخاطرك .

ضحكت بسخرية وقالت له :

_ والله كانك اتجنيت عاد وكانك دستي لي علي طرف جلابيتي وجعتني علي وشي وجاي تعتذر عادي !

كانك مدستش علي جلبي وروحي وفرمتهم فرم بدون مايرفلك جفن يابو ولدي ،

كانك ما كسرتنيش وما جرحتنيش جرح عمري ما هتداوي منه لحد ما همو….ت بعد عني وعن طريجي لان اللي انكـ,ـسر ما بيتصلحش .

كانت بتقول الكلام ده ودموعها نازله على وشها من حرقه قلبها وعذابه بتحبه لكن مش قادره تسامحه بتعشقه لكن مش قادره ترجع له وحكمت على نفسها وعليه بالبعاد اللي ما منهوش رجوع لان قلبها وروحها تمو…تهم بايديه ويفيد بإيه الندم لو انكسر القلوب ،

دخلت عليها اختها وهي بتعيط وبتقفل تليفونها وبترميه بعصبيه فبتقول لها :

_طيب لما انت بتحبيه إكده ارجعي له بعد ما رجع لك ندمان وبيعتذر كماني ،
من بقى له سنه بيتحايل عليكي عشان ترجعي له وانتي كل يوم توجعي نفسك وتوجعيه اكثر من اليوم اللي جبليه ارحمي نفسك يا خيتي وارحميه .

رمت قمر نفسها على السرير وهي بتشهق جامد وكان العياط والدموع مش هيسيبوها لحد ما تمو…ت وبقوا مختصين بيها هي لوحدها وترد على اختها وبتقول لها :

_ما ينفعش اسامح وانا مش جادره اسامح وارجع علشان انا عايزه ارجع وخلاص ،

كل لما اجول لجلبي انساه وابعد عني واجسى وإعند وانسى وما تفتكرهوش ابدا جلبي يعند معاي ويجسي عليا وما بين جبر القلوب ودفنها عذاب ما بينيمنيش الليالي ،

وقامت من على السرير وهي بتبص لاختها وبتمسح دموعها بقسوة :

_لكن وحياه كل دمعه خلاني انزلها من عينيا قهر ومر اللي لهخليه يدفع جصادها التمن غالي،

وحياة كل ليله كان بيغدر بيا ويدوس على قلبي لهخليه يتمنى الزمن يرجع بيه تاني وما يكررش اللي عمله .

وفضلوا الاثنين يتكلموا مع بعض أختها عماله تهدي فيها لكن قلبها وناره ما بيهداش ابدا ،

وعدت الايام وقررت انها تنفذ اللي عماله تفكر فيه من بقاله كتير علشان خاطر تحرق قلبه زي ما حرق قلبك ،

وفي يوم زين كان قاعد هو وابنه مع بعض كان واخده في اليوم ده يقضيه معاه فجات له رساله على الموبايل اول ما قراها اتجنن وبقى مش على بعضه ،

وادي الولد لامه وروح جري وغضب الدنيا متجمع قدام عينيه على بيت قمر اللي عايشه فيه وهي واخوها واختها لان قمر يتيمه الاب والام ،

وقعد يرزع الباب جامد لحد ما فتح له اخوها وبيقول له :

_في حد يخبط على حد بالطريجه دي وبالمنظر ده كانك اتجنيت يا واد عمي .

زقه زين من طريقه وهو بيقول له بغضب وبصوت عالي:

_ إنت لسه شفت جنان ده انا هوريكم الجنان على اصوله ،

انت خليت فيها واد عم وواد خال !

ده انا هطربج البيت ده على اللي فيه ،

اول ما قمر سمعته وهو بيتكلم ظبطت نفسها على الاخر واطمنت على شياكتها ونزلت براس مرفوعه وهي بتقول له :

_ايه الصوت العالي ده يا اخوي كاني سامعه جطر وصد في بيتنا عاد ،

لف زين وشه ليها ولسه كان هيتعصب ويغضب انبهر بكتله الجمال اللي نزلت وكاني بنزولها سحبت الاكسجين من رئته فاتكلم بهدوء :

_سمعت كده والله اعلم انك متجدم لك عريس النهارده وجاي يخطبك يا مرتي يا ام ولدي .

ضحكت قمر بسخريه وقالت له:

_كانك دماغك فوتت وما انتاش مركز ولسه عايش في الوهم الكذاب انا ما بجتش مراتك يا زين اني طليجتك .

اول زين ما سمع اسمه من بين شفايفها وكانه كان مشتاق راح وقف قدامها وقال لها وهو باصص جوه عيونها :

_عايزه تبجي لحد غير زين يا نن عين الزين وروحه وجلبه ،

عايزه واحد غيري يتهنى بحضنك وبدفاه وبجربك وبجمالك ده غير الزين يا عمر الزين ،

كانت بقى لها كتير ما شافتهوش وموقفش قدامها بالقرب ده اللي اهلكها للاسف هي لسه بتحبه بس هي مصممه انها ما ترجعلوش ودقات قلبها بتعلن العصيان عليها وهو بيبص لها قوي علشان يقدر ياثر على مشاعرها ولكن استجمعت قوتها وقالت له :

_امال انت مفكرني هفضل عايشه إكده من غير راجل يحبني ويحتويني واكون بالنسبه له كل الدنيا وكل الحياه اكيد هشوف حياتي زي ما انت سبج وشفت حياتك ولا نسيت يا زين .

جز زين على اسنانه بغضب وما بقاش واقف اللي هو بيعمله وامسكها من كتافها وقال لها بفحيح وغضب شديد :

_طب واللي خلج الخلج يا قمر ان شفت راجل غريب معتب ناحيه الباب ده لاكون مكسر رجله لا ده انا هكسر لك عضمه كله وهيبجى ذنبه في رقبتك انت واخوك ده واد عمي اللي المفروض هو اللي يقف جنبي ويرجعنا لبعض .

اخوها رد عليه على طول وقال له :

_ما تظلمنيش يا زين اني كل يوم والثاني اجول لها واخبرها انها تسيبها من العناد ده وترجع لبيتها وجوزها واللي ما فيش حد في الدنيا يحبها قدك وهي راسها والف سيف ما فيش رجوع نهائي وان كرامتها تحتم عليها انها تنساك وما تفكرش فيك نهائي انا ما ليش ذنب .

بص لها زين وقال لها بتحذير شديد :

_بجى إنتي بجى لابسه ومتشيكه ومستنيه العريس الجديد علشان خاطر ياجي يخطبك يا ام الواد !

واديني قاعد مستنيه علشان خاطر يبجى هو اللي جاني على روحه انه فكر بس يبص لحاجه تخص زين العزيز .

ابتسمت من جواها وقالت له وهي فرحانه فيه وبنار قلبه المكويه بالغيره وده كان الهدف اللي عايزاه في دماغها جدا وقالت له :

_ خلاص خليك جاعد بجى من هنا لحد بكره انا هطلع أشيع له رساله واجول له ما يجيش النهارده وناجلها ليوم ثاني علشان خاطر عندنا ضيوف تقال مش هيمشوا عاد دلوقتي ،

وكملت بدلع وهي قصدها تستفزه :

_اصله بيحبني وبيغير عليا جدا وبيتمنى لي الرضا ارضى وعمره ما يزعل لما اجول له ما تاجيش ودايما بيلتمس لي الاعذار .

بص لها بغضب على طريقتها وعلى استفزازها لي وقال لها :

_شوفي يا قمر اما انظبطتيش في الحوار وانت بتتكلمي قدامي الله الوكيل لا هبعت اجيب الماذون دلوقتي وهردك غصب ويبقى انت اللي اخترت الطريق الصعب ما بينا فاحسن لك هاتي سكه ودغري معايا وسيبك من شغل كيد النسا اللي انت جايه فيه ده علشان خاطر انا صبري قرب ينفذ عليك .

بصيت له قمر من فوق لتحته وقالت له :

_لا يا حبيبي كان زمان لما كنت تكش وتزعق وتحمر لي عينيك اخاف واكش في جلدي وافضل مرعوبه منك ومن رد فعلك دلوقتي الكلام ده تنساه انت ما لكش حكم عليا واه هتجوز وغصب عنك ويلا بقى اتفضل علشان عايزه انام .

اول ما قالت له كلمه هتجوز وتصورها مع راجل تاني الغضب اتجمع قدامي ليه ما بقاش عارف اللي بيعملوا ايه ولقى نفسه بينزل على وشها بقلم شديد خلاها وقعت مكانها،

الكل انصدم من رد فعله حتى هو ذات نفسه انصدم اما هي قامت بقوه من مكانها وقالت له :

_هدفعك تمن القلم ده غالي قوي يا زين ولولا ان في بنا عيل كان زماني دلوقتي مجرجراك في الاقسام ومورياك النجوم في عز الظهر .

قالت الكلام ده وسابته وطلعت على فوق وهي منهاره من اللي بيحصل بينهم هي كرامتها بتوجعها قوي منه وهو بيحبها وعمره ما هيسيبها تروح لغيره ولا تضيع من ايديه ،

وعدت الايام لحد ما عدى اسبوع بحاله هو بعيد عنها خالص علشان خاطر يسيبها تنسى القلم اللي اداه لها ،

هو عارف ان النهارده ميعادها في المتابعه مع دكتوره السكر بتاعتها اتفق مع اخوها ان هو ما يروحش معاها علشان خاطر هو هيحاول يصلح اللي ما بينهم،

فركبت هي العربيه واثناء ما هي ماشيه لقيت عربيه اعترضت طريقها فنزلت تشوف مين وبسرعه كان طالع زين من وراها وشايلها ومركبها عربيته حاولت تعترض لكن ما قدرتش عليه طبعا واول ما دخلت عربيته قالت له بغضب :

_انت اكيد بني ادم مش طبيعي علشان تعمل اللي انت بتعمله ده ازاي تعترض طريقي بالمنظر ده وتركبني معاك في العربيه واحنا الاثنين اغراب ولا هيهمك سمعتي ولا شكلي ولا الناس تتكلم عليا حقيقي نظرتي فيك ما خيبتش .

بص لها بكل حب وحنان وقال لها :

_بحبك وحشتيني بحبك يا روحي اللي مفرقاني ارجعي لي علشان خاطر ما بقتش عارف اعيش من غيرك ودنيتي بقت دمار وانت مش فيها مش كفايه بقى عذاب وبعاد وعناد ما تعبتيش انا بجد ما بقتش قادر كفايه بقى انا اعتذرت على غلطتي مره واثنين وثلاثه وعشره وبقى لي سنه بعتذر عشانها وانت اللي في دماغي في دماغك .

بصيت له وعيونها مليانه دموع وقالت له :
_غصب عني مش قادره اسامح غصب عني كرامتي وكبريائي اللي انت جرحتهم بكل رضا منك صعبانين عليا وبيانبوني ان انا لو سمحت يبقى كده ضيعت نفسي ومش هيبقى ليا وش أواجهها تاني .

كان مشي بالعربيه شويه ووقف في مكان يعتبر ما فيهوش ناس فقال لها وهو بيمسك ايديها قوي :

_حقك على قلبي اللي جرحك في لحظه ضعف ،
حقك على عيني اللي شافت غيرك في لحظه غضب وزعل ما بينا واللحظه دي بدفع ثمنها لحد دلوقتي

انت عاقبتيني بما فيه الكفايه واجبرتينا على الطلاق رغم اني اعتذرت لك وقلت لك انت وبس اللي في قلبي وما فيش حد غيرك سكن قلبي وعمري غيرك ومهما اقول اللي في دماغك في دماغك اعمل ايه ثاني علشان ترضي وتسامحي ونرجع تاني نعيش انا وانت وابننا في بيتنا من غير اي مشاكل ونقفل على الجروح ونداويها .

شدت ايديها من ايديه بالراحه وبصت قدامها وقالت له :

_للاسف يا زين في جروح ملهاش دواء والطب ما عرفش يعمل لها حاجه،

انت كسرتني واللي انكسر ما بيتصلحش وقبل ما تقول بيتصلح هقول لك كذاب،

كذاب اللي يقول ان الوجع بيخف مع الايام والسنين،

كداب اللي يقول ان جرح الحبيب لحبيبه اللي بيفضل معلم في قلبه بيتنسي ،

كذاب اللي يقول ان الحياه بتمشي وكل حاجه بتتنسي والوجع بيخف والدنيا بترجع لطبيعتها تاني .

خبط زين على الدركسيون اللي قدامه بعصبيه وقال لها :

_لحد امتى هتفضلي كده معانده؟

لحد امتى هتفضلي معيشانا في الحزن ومضيعه سنين عمرنا الحلوه في البعاد ولا انت هتقدري تعيشي مع غيري وانا واثق من كلامي ولا انا هقدر اتاقلم واحب غيرك انا بتنفسك انت وعايزك انت ،

انت انا وانا انت .

حطت ايديها على وشها وهي بتكتم عياطها وقالت له :

_طب هعمل ايه في قلبي مش قادره انسى شكلك وانت حاضنها وبتقول لها انت اجمل واحده شفتها في الكون,

مش قادره انسى ايديك اللي كانت ماسكه ايديها وبتبوسها وبتقول لها عيوني بتحبك،

مش قادره انسى انك اتجوزتها عليا .

شدها لاحضانه ومسح دموعها وقال لها :

_ما كنتش في وعي وقلت لك 100 مره ما كنتش في وعي اعمل ايه كنت متضايق معاكي ومتخانقين خناقه كبيره وشطاني صور لي ان انا علشان اكيدك اتجوز عليك وكل الكلام اللي انا قلته لها ده كنت بغيظك بيه علشان خاطر تغيري وتيجي تصالحيني لكن انت ساعتها دماغك تركبت على اننا نتطلق رغم اني فهمتك 100 مره ان انا عمري ما حبيت ولا هحب ولا بحب غيرك يا قمر .

شدت نفسها من حضنه وقالت له بعيون مليانه بالغضب :

_علشان تخليني غير وتكدني تروح تتجوز عليا منطق ايه اللي بيقول كده ؟

علشان اجي اصالحك من خناقه حصلت ما بينا وطولت شويه عشان كنت زعلانه منك تروح تجيب لي بره وتكسر قلبي وتخليها تكسرني وتخليني مقهوره .

رد على كلامها:

_ده هو اسبوع واحد بس اللي فضلت فيه على ذمتي وكل يوم كنت هاجي عندك احاول اراضيكي وانت قافله على نفسك ولا بتتكلمي ولا بتنطقي ،

اسبوع واحد يخليكي تنهي حياتنا وحبنا علشان خاطر غلطه اعتذرت عليها واندمت وكانت في لحظه تسرع مني .

قالت له وهي بتمسح دموعها بالراحه :

_انا فضلت اسبوع مصدومه وبحاول استوعب ان انت فعلا خنتني وعرفت واحده غيري وقلت لها كلام زي اللي بتقوله لي هزيت ثقتي في نفسي خليتني شفتيني وحشه وضعيفه خلتني كرهتها وما بقتش عايزاني احبها تاني .

رد عليها زين وقال لها بحب :

_حقك على قلبي للمره المليون ،

بجد انا غلطت واعترفت بغلطي انا والله ما لمستها طول الاسبوع ده ولا عمري قلبي شاف ست حلوه غيرك ولا عيوني عرفت جميله في جمالك ولا قلبي واحساسي وكياني هيكونوا في قمه سعادتهم واحساسهم وهم معاكي وبين ايديكي ،

وكمل كلامه وهو بيمسك ايديها وبيوديها ناحيه قلبه :

_شايفه قلبي ما بيبطلش دقات في قربك،
كانه بيعلن العصيان عليا في وجودك وفي حضرتك يا اغلى من روحي يا قمر لياليه ونور ايامي اللي ضلمت من يوم ما بعدتي عني وسبتيني .

غصب عنها ما قدرتش تشيل ايديها من ايديها ولا عينيها تفضل بصه لعينيه حبيبها وابو ابنها وحب عمرها من وهي صغيره بس كل لما تفتكر لحظات الحب اللي بينهم وتفتكر لحظه حضنه لواحده غيرها قلبها يثور وكرامتها توجعها فشدت ايديها بسرعه وقالت له :

_من فضلك كفايه بقى انا تعبت وديني عربيتي عشان اروح للدكتوره لاني اعصابي تعبانه جدا ومش قادره استحمل اكتر من كده .

ما رضيش يضغط عليها النهارده تاني بس هو حاسس بلحظه انتصار انه قدر يسيطر عليها شويه ويخليها تبص في عينيه ويشوف نظره الحب اللي شافها دي ولو للحظات وده في حد ذاته تقدم ان في امل فعل علاقتهم ،

واخدها وصلها للدكتور بنفسه لانه وعد اخوها وبعدين روحها تاني وهو مش مبطل كلام علشان خاطر يحاول يفكرها بايامهم الجميله ويشغل دماغها وتفكيرها بيه ،

وبقى كل يوم يبعت لها رسائل حب وغرام على التليفون وهي حزنها بقى يتلاشى وبيتبدل لابتسامه ،

فدخلت عليها اختها لقيتها ماسكه الموبايل وحاضناه وبتبتسم فقالت لها :

_شايفه ابتسامات وعيون بتطلع قلوب وغرام وهيام وحاجات كده ما كنتش بشوفها من زمان وتقريبا نسيتها ونسيت ان انت اختي الفرفوشه بتاعه زمان .

ضحكت قمر على كلام اختها وقالت لها :

_اعمل ايه بس يا اختي في قلبي اللي معذبني بحبه وكل خليه فيا بتنادي بقربه وكل احساس حلو احسه هو بيكون اساسه وموجود فيه عيني مش قادره تشوف غيره وقلبي مش قادر يحب ويعشق غيره خلاص قربت اضعف واحن .

راحت عليها اختها وحضنتها وقالت لها بكل حماس :

_كفايه بقى عليك عذاب ووجع قلوب يا قمر كفايه بقالك اكثر من سنه وانت عايشه في المرار لحد ما بقى شكلك ضايع بسبب الحزن ،

كفايه بقى ما تخليش الحزن ياخد من عمرك ومن سعادتك اكثر من كده انت تستحقي تبقي احسن واحده في الدنيا ارجعي لبيتك وجوزك ولمي عيلتك جوه حضنك علشان خاطر ابنك وعلشان خاطر ما تشمتيش حد فيك اللي بيغيروا منك كثير قوي واللي بيحسدوكي على زين اكثر منهم برده وهو لو كان خاين ولا عينه زايغه ما كانش فضل مستنيكي ده كله يراضي فيك ويتمنى انك ترجعي له النهارده قبل بكره .

اتنهدت قمر بتعب على كلام اختها وقالت لها:

_ يعني انت شايفه كده اتوكل على الله واخذ قرار الرجوع واركن كرامتي دلوقتي على جنب واعيش وانسى وكل لما افتكر ما حزنش على نفسي ،

اني اهنتها ورجعت للي كسر قلبي .

شجعتها اختها على الرجوع وقالت لها على طول :

_كفايه اللي ضاع من عمرك يا قمر وكفايه حزن وما تبقيش شكايه بكايه وفي الحزن هتفني حياتك وعمرك وشبابك وارجعي خاصه لما يكون جوزك شاريكي وعايزك ومش عايز غيرك .

قررت قمر انها تسمع كلام اختها وفي اول محاوله من زين هيرجع لها ويطلب منها انها ترجع هتوافق على طول وهو مش بيبطل عرض عليها ،

ولكن حصلت المفاجاه اللي خلت قمر سعيده واسعد واحده في الدنيا وما كانتش متخيله ان زين هيعمل كده علشانها ،

وفي يوم قال لها اخوها ان هو معزوم على فرح وانها تلبس شيك جدا علشان خاطر فرح حد مهم وانا عايزك تبقي معايا ،

وفعلا لبسه قمر وما صدقت انها تخرج تروح فرح تفك عن نفسها شويه واول ما راحت قال لها اخوها :

_ انا رايح اجيب لينا ميه ساقعه ادخلي انت وانا خمس دقائق مش هتاخر عليك .

اول ما دخلت قمر المكان استغربت ان ما فيهوش ناس لسه ولا معازيم وبصت في كل اركان المكان لحد فجاه ما لقيت حد مغمي عينيها وسمعته بيقول :

_الجميل اللي نور المكان ببهجته وبطلته انا قررت اني اخطـ,ـفك عند قلبي وما اسمعش كلامك وكفايه علينا كده بعاد وسهر وعناد وعذاب خلينا نبدلهم بقى بالفرح والحب اللي حرماني منه والحضن اللي منعاه عن حبيبك اللي مش عايز من الدنيا دي غير وجودك جنبه .

قال لها الكلام ده ولف وشها ليه وهو لسه مغمي عينيها علشان خاطر محضر لها مفاجاه فقالت له :

_طيب مش تشيل الغمامه اللي على عيني دي علشان خاطر تشوف عيوني اللي وحشوك زي ما انت ما بتقول وخلاص يا سيدي عفوت عنك وهدي لك فرصه نرجع لبعض تاني لكن لو جرحتيني تاني ساعتها هتبقى القاضيه بالنسبه لي يا زين .

بدات كلامها معاه بضحك وهزار ونهيته بدموع نازله من عيونها لما افتكرت جرحه ليها فاخدها زين في حضنه وقال لها :

_عمري ما هعملها تاني ولا هسمح لك اصلا تغيبي عن حضني وتبعدي عن حياتي مره ثانيه ،

انا اتعلمت وانكويت في بعدك وقلبي اتعذب في غيابك وعمري ما هسيب العند والعصبيه توصلني اللي وصلت له ده ثاني انا بجد اسوا سنه عشتها في حياتي السنه اللي بعدتيها عني ربنا ما يحرمني منك تاني وتفضلي دايما في حضني وفي قلبي يا اجمل قمر شافتها عيوني .

قال لها الكلام ده وفجاه سمعوا صوت العاب ناريه وكانت تورتة عاملها لعيد ميلادها فشال الغمامه من على عينيها وقال لها :

_حبيت ارجعك لقلبي يوم ميلادك علشان خاطر احس ان علاقتنا وحبنا اتولدوا من جديد يوم من اهم ايام في حياتك اليوم اللي نورت فيه الدنيا فحبيت يكون هو نفسه اليوم اللي تنوري فيه حياتي من البدايه ،

فرحه قمر جدا بمفاجئته وعلى طول اول ما شلها الغمامه من على عينيها مسك ايديها ورجع دبلتها تاني مكانها وباس ايديها الاثنين بكل الحب اللي في الدنيا وقال لها :

_اهلا بيكي في عالمي اللي مستنيك من زمان اهلا بيكي يا قلبي وعمري وكل حياتي ،

بحبك يا اجمل وارق قمر في الدنيا كلها دلوقتي الماذون جاي وهنكتب كتابنا ونرجع على بيتنا واوضتنا اللي ما دخلتهاش من ساعه ما فارقتيني وبعدتي عني وعدت نفسي اني ما ادخلهاش من غيرك وهتلاقيها زي ما انت سايباها بالظبط حتى بنفس الفرش كنت بخليهم ينظفوها ويحطوه ثاني علشان خاطر لما ترجعي ما تحسيش بغربه في المكان وتحسي كانك لسه سايباه امبارح بس .

قال لها الكلام ده واخدها في حضن كبير وبقى ماسك في حضنها جامد مش عايز يسيبه وكاني لقى كنز خايف يضيع من ايديه تاني ،

ورجعت قمر لحبيبها زين وابو ابنها بعد ما تعذبت وعذبته سنه بحالها لكن قلبها وحبها ليه اتمرد عليها وما قدرتش تقوم قصاد حرب عشقه وحبه اللي شنها عليها وبقت بالنسبه له يا راجعه يا هترجع ومش هيسيبها مهما كانت التمن .

وتوته توته خلصت الحدوته
سكريبت حطام رجل
بقلمي فاطيما يوسف .